San Juan 8

1Tees Jesuuz pcam zam par too bicy ni ya Oliva. 2Na or nu bza' yu tuuba' dzi, orze' bish cyam yam loli' ni yu' nu driib zily de mbecy Ñgyoozh. Orze' brugyi' rde' mbecy lom. Orze' gusub mi nunu brugyi' nu rlyuum ni dey. 3Orze' de yu nu rlyuu leey nu bzeeñ Moisees, gal nu de' zir mbecy fariseo, gua nu dey tub biñ mñaa lo Jesuuz par nu byu' beem nu yu gyeey nu walab ñgyeem. Orze' bzu dey mi gazel de mbecy ze'. 4Orze' na dey rab yu Jesuuz: ―Masht, biñ mñaa ii bdub dey mi lat nu gucyaal la yu' num yu gyeey, yu nu walab ñgyeem. 5Ornu Moisees bzeeñ yu leey ni den, orze' nay nu rlagy ñi nu gow gyita' den biñ mñaa nu na gal nu na mi ii gal gat lam. Ze' ru, ¿la ñuu niir? ―na dey. 6Ni bicy dey par nu bzu dey tub caa ni Jesuuz, gun orze' gad mod nu griib dey cyi ic mi. Orze' Jesuuz gusab tiily mi. Orze' brugyi' rcaam lo yu nu mbiz mi. 7Lat nu zu dey rgugyi'y lom, orze' wes sum. Orze' nam rab mi dey: ―Ca na de ru, mbecy nu wangyicy coz cyi, orze' pshet der gyita' biñ mñaa ii loga la ―na Jesuuz. 8Orze' gusab tiilya'm tuuba' tir. Orze' brugyi' rcaa ga'm letr lo yu. 9Na ornu güeñ dey riidz ze', orze' brugyi' tub ga, tub ga dey druu chuy. Brugyi' druu chu de yu gush loga la. Gaze' nu brugyi' druu chu de yu feñ. Orze' se Jesuuz zi'l byeeñ mi nu biñ mñaa nu gabee zum lugaar ze'. 10Orze' wes su Jesuuz. Orze' nam rab mi biñ mñaa ze': ―Biñ mñaa, ¿ca za de yu ze' na? ¿A sac ni tuba' la mbecy nu niiy nu yu' falt nir? ―na Jesuuz. 11Orze' na biñ mñaa ze' rab mi Jesuuz: ―Sac ni se tuba' la dem ―na biñ mñaa ze'. Orze' na ga' Jesuuz: ―Ni' ya̱ wane̱e̱ nu yu' falt nir. Na yaa yu'r, nunu cue' ga' gyicy ru cyi ―na Jesuuz. 12Orze' na Jesuuz rab mi de mbecy ze': ―Ya̱ naca̱ yaa nu rbic nu gyal shcab ni de mbecy gyishlombecy. Yu nu cyid ca ich ya̱, yu ze' gad yaa ze' niy nu gyicy ñi nu cui mbañ yu. Nunu rila a̱' nac yu mbecy nu wagad lagy de coz nu rlagy Ñgyoozh ―nam. 13Orze' na de mbecy fariseo rab yum: ―Ru laab ub zi'l ru rzat ru ub ru, nde' nu se la la cyiiñ de riidz nu rniir ―na dey. 14Orze' na ga' Jesuuz rab mi dey: ―Mas laab uba̱ rzata̱ uba̱, tees riidz nu rne̱e̱ nde' riidz nu rishli. Gun rad lagya̱ ca bru̱u̱, nunu rad lagya̱ ca gya̱. Ze' de ru wagad lagy der ca bru̱u̱, nunu ni wagad lagy der ca gya̱. 15De ru rnii too der ben lac na tub mbecy mod nu ricy mbecy gyishlombecy. Ze' ya̱, a̱' nii to̱o̱ ti yu' falt ni ni tub la mbecy. 16Tees benu ya̱ nii to̱o̱ nu yu' falt ni tub mbecy, orze' nde' coz rishli, gun walab ub zi̱ gyicya̱ ñii, sinu nu Ñgyoozh uza̱, biñ nu bzuu nez ya̱, mi ze' nac num ya̱ ornu gyicya̱ de nde'. 17Gun bi cañ lat leey nu bzeeñ Moisees ni der nu rniiñ: “Benu cyup mbecy tub zi'l riidz rnii dey, orze' nde' riidz nu cyiiñ”, rniiñ. 18Ze' na, ya̱ rne̱e̱ por cuen ne̱. Nunu uza̱, biñ nu bzuu nez ya̱, mi ze' biñ cyup nu rnii por cuen ne̱ ―nam. 19Orze' na ga' dey rab yu Jesuuz: ―¿Ze' ca zu uz ru beni? ―na dey. Orze' na ga' Jesuuz rab mi dey: ―De ru a̱' yu' lo der ya̱. Yegar uza̱ chu' lo ga' der mi. Gun ze' benu gyu' lo der ya̱, orze' ni' zi'l gyu' lo der uza̱ ―nam. 20De nii riidz nu mnii Jesuuz lat nu rlyuum ni de mbecy ze' nu zub yu' nu driib zily de mbecy Ñgyoozh. Laab lugaar ze' nu ca alcansi ni tiñ gun ze' zum. Tees ni tub la mbecy wancu' yaa dey mi ñgya nuy mi pres, gun nigul shuub dzi nu ni gyicy nu dey mi. 21Orze' Jesuuz na ga'm rab mi dey: ―Ya̱ gru̱u̱ lat der nu gya̱. Orze' de ru yub der ya̱, tees de ru gat der lat nu gabee nac der mbecy cyi. Nunu wac gya der ze' nu ya̱ gya̱ ―nam rab mi dey. 22Orze' na ga' de yu zub lo ni de mbecy Israeel: ―¿Lac yaruu de riidz ii niy nu wac gyan ze' nu gyay? ¿Walab gaal nu cut yu ub yu? ―na dey. 23Orze' na ga' Jesuuz rab mi dey: ―De ru nac ru ni gyishlombecy ii. Ze' ya̱ naca̱ ni gyibaa, gun de ru ledz ru gyishlombecy ii. Ze' ya̱ walab ii ledza̱. 24Nde' nu ya̱ mne̱e̱ lo der nu gat der lat nu gabee nac der mbecy cyi. Gun gat der lat nu gabee nac der mbecy cyi benu wacheña lagy der nu ya̱ naca̱ biñ nu mne̱e̱ nu naca̱. 25Orze' na dey rab yu Jesuuz: ―¿Ze' ru, cyu nac ru beni? ―na dey. Orze' na ga'm rab mi dey: ―Ya̱ bi mne̱e̱ lo der nese nu loga la cyu naca̱. 26Yu' tona' la coz nu gac ne̱e̱ nu nac de ru, nunu yu' tona' la cyi nu gac griiba̱ ic der, tees tub lo zi'l riidz nu mnii biñ nu bzuu nez ya̱, nde' gne̱e̱ lo de ru, mbecy nu yu' gyishlombecy ii. Nunu mi ze' rniim riidz nu rishli ―na Jesuuz. 27Lat de riidz nu mnii Jesuuz, bzat mi Ñgyoozh uz mi, tees wangyet lag dey cuen. 28Orze' nam rab mi dey: ―Ornu caa der ya̱, biñ nu byac mbecy, lo tub ya cruuz, orze' gad lagy der nu ya̱ naca̱ biñ nu mne̱e̱ nu naca̱. Nunu ni' zi'l gad lagy der nu walab nu rne̱e̱ nu nac ub zi'l la̱, sinu rne̱e̱ tub lo zi'l coz nu blyuu Ñgyoozh uza̱ ne̱ nu gne̱e̱. 29Gun Ñgyoozh, biñ nu bzuu nez ya̱, nac num ya̱. Mi ze' wansaan mi ya̱ nu chesa̱ ub zi̱ gun dub laa tiem ricya̱ coz nu mi ze' yet lagy mi. 30Ornu mnii Jesuuz de riidz ze', orze' zigy mbecy bicy cup dey consuel lom. 31Orze' na Jesuuz rab mi de yu zub lo ni de mbecy Israeel, de yu nu bicy cup consuel lom: ―Benu de ru zaab gyicy paa la der nu de riidz nu rne̱e̱, orze' rishli gaal nac der yu nu rsya' lo̱. 32Orze' gad lagy der ca na nu coz rishli. Orze' nu nac coz rishli ze' gla der ―nam. 33Orze' na dey rab yu Jesuuz: ―De̱ ya̱ nac de̱ nez Abraham, nunu rila nigul gac de̱ moz ni ni tub la mbecy. ¿Lac yaruu ga' nde' nu rniir nu gla̱ de̱? ―na dey. 34Orze' na ga' Jesuuz rab mi dey: ―Ya̱ rishli rne̱e̱ lo der nu de mbecy nu ricy coz cyi, yu ze' nac yu moz ni de cyi. 35Tub moz ni mbecy, a̱' nac yu famil ni mbecy tees yu nu nac i'ñ mbecy nac yu famil niy par tub la. 36Benu ya̱ i'ñ Ñgyoozh gyicya̱ nu gla der ni de cyi, orze' rishli gaal dulaa der lo cyi. 37Rad lagya̱ nu de ru nac ru nez Abraham, tees rlagy der cut ru ya̱, gun wayicy cuen der de riidz nu rne̱e̱. 38Ya̱ rne̱e̱ de coz nu rad lagya̱ lat nu gusa du̱ Ñgyoozh uza̱. Ze' de ru ricy der de coz nu blyuu uz der nir ―nam. 39Orze' na dey rab yum: ―¡Abraham, yu ze' nac yu uz de̱! ―na dey. Orze' na ga' Jesuuz rab mi dey: ―Bi bicy na nu rishli gaal nu nac der i'ñ Abraham, orze' ñgyicy der gal nu bicy yu. 40Tees ya̱ rne̱e̱ de coz rishli lo der, de riidz nu güeña̱ ni Ñgyoozh, tees rlagy der cut ru ya̱. ¡Abraham rila wangyicy yu ni tub la coz gal nu rlagy de ru gyicy ru nur ya̱! 41De ru gal gaa la ricy der nu uz ru ―nam. Orze' na dey rab yum: ―De̱ ya̱ a̱' nac de̱ gyid lab. De̱ ya̱ ricy cup de̱ tub zi uz de̱. Mi ze' Ñgyoozh ―na dey. 42Gaze' nu na Jesuuz rab mi dey: ―Benu rishli gaal ñgyac der i'ñ Ñgyoozh, orze' nca der ya̱, gun ya̱ lo Ñgyoozh bru̱u̱ yapa̱. Nunu walab nu yapa̱ nu nac coz nu rlagy ub zi'l la̱, sinu Ñgyoozh bzuu nez mi ya̱ nu yapa̱. 43¿Lagu wagac gyet lag der cuen de riidz nu rne̱e̱? Nde' gun walagy der nu zuub gyidag der de riidz nu rne̱e̱. 44Gun uz der, nde' ub la nuras. Nunu de ru na der gal nu na yu ze'. Orze' rlagy der gyicy ru coz nu gyicy ñi nu gyet lagy yu. Gun nuras bicy yu nu gut mbecy nese nu loga la. Nunu rila wagchay faboor ni coz rishli, gun rila wagniiy nu rishli. Ornu rguuy, ni ricy yu gun ni nay, gun nac yu mbecy rguu. Nunu nac yu cyoong de mbecy rguu. 45Tees como ya̱ rne̱e̱ de coz rishli lo der, nde' nu wacheña lagy der de riidz nu rne̱e̱. 46¿Ca na de ru gac gyicy ru nu gabe ca na cyi nu bicya̱? Ze' benu ya̱ rne̱e̱ coz rishli, orze' ¿lagu wacheña lagy der de coz nu rne̱e̱? 47Yu nu bi nac mbecy ni Ñgyoozh, yu ze' rzuub gyidag yu riidz nim. Ze' de ru par nu a̱' nac der mbecy nim, nde' nu wacsuub gyidag der nim ―na Jesuuz. 48Orze' na ga' de mbecy Israeel rab yum: ―¿A walab nu ricy cup de̱ raso̱o̱ ornu rne̱e̱ de̱ nu nac ru mbecy Samaria, nunu bicy ni nuras ru? ―na dey. 49Orze' na ga' Jesuuz rab mi dey: ―Walab nu bicy ni nuras ya̱. Tees driib zilya̱ Ñgyoozh uza̱. Ze' de ru rgüii naañ der lo̱. 50Walab nu rlagya̱ nu gyabic mbecy gyel mbecy ne̱, tees zu tub biñ nu rlagy nu gyabic mbecy gyel mbecy ne̱ ya̱, nunu mi ze' zam faboor ne̱. 51Ya̱ rishli rne̱e̱ lo der nu cyu zi'l mbecy nu zuub gyidag riidz nu rne̱e̱, yu ze' rila wat yu ―nam. 52Orze' na ga' de mbecy Israeel: ―Na gaal rishli rad lagy de̱ nu bicy ni nuras ru. Abraham gut yu, nunu de yu nu mnii por cuen ni Ñgyoozh guta' dey. Ze' ru na'r nu cyu zi'l mbecy nu gzuub gyidag de riidz nu rniir, de yu ze' mniir nu wat dey. 53¿A rsa' lagy ru nu zily zir nac ru gaze' gyitoo bel ni den Abraham? Yu ze' gut yu. Nunu guta' de yu nu mnii por cuen ni Ñgyoozh. ¿Orze' cyu rsa' lagy ru nac ru beni? ―na dey. 54Orze' na ga' Jesuuz rab mi dey: ―Benu griib zilya̱ uba̱, orze' se la la sac nde'. Tees biñ nu driib zilya̱, mi ze' uza̱, biñ nu de ru rniir nu nac Ñgyoozh nir. 55De ru rila wancu' lo der mi, tees ya̱ bi bdu' lo̱m. Bi bicy na nu ne̱e̱ nu wantu' lo̱m, orze' naca̱ tub mbecy rguu gal nu na de ru. Tees ya̱ rishli gaal bdu' lo̱m, nunu rzuub gyidaga̱ de riidz nu rniim. 56Gyitoo bel ni der Abraham tona' la bet lagy yu, gun briish loy nu zac yu dzi nu gruu zaca̱ gyishlombecy ii, nunu ornu bzaac yu dzi ze', orze' bet lagy yu ―nam. 57Orze' na ga' de mbecy Israeel rab yum: ―Ru, gaal zi nigul shuub ru cyaal gaynal ña'n, ze' na'r nu bi bzaac ru gyitoo Abraham ―na dey. 58Orze' na ga' Jesuuz rab mi dey: ―Ya̱ rishli rne̱e̱ lo der nu ya̱ nil bi zu̱ nese anzir nu gal Abraham gyishlombecy ii ―nam rab mi dey. 59Orze' brugyi' rte' dey gyita' nu gow gyita' dey mi gal gat lam. Tees wansac dey ca gush mi. Orze' bruum loli' ni yu' nu driib zily mbecy Ñgyoozh zam.

will be added

X\