San Juan 7

1Despuees ni de nu nde', orze' gusam de lugaar ni Galilea. Orze' wangalagy mi ñgyes sam Judea, gun lugaar ze' rded de yu zub lo ni de mbecy Israeel ryub yum par nu cut dey mi. 2Na tiem ze' bi yad shuub dzi nu chu' de mbecy Israeel tub sa' nu la sa' ni ramad. 3Orze' na de bicy mi rab yum: ―Cue' gyiyeeñ ru ii. Gush nez yaa par lo de yu ni Judea, gun orze' de yu nu rsya' lor zac dey de coz ily nu ricy ru. 4Gun ni tub la mbecy wayicy yu coz ngach benu rlagy yu nu nap cu' lo mbecy yu. Como bi ricy ru de coz ily, orze' rlagy ñi nu lyuur de coz nu ricy ru lo dela mbecy ni gyishlombecy ―na dey. 5Gun gashtal de bicy mi wangyicy cup dey consuel lom. 6Orze' na Jesuuz rab mi dey: ―Gaal zi nigul shuub tiem ne̱ nu chu̱' Jerusaleeng. Ze' par de ru la zi'l tiem nde' coz nu nap. 7De mbecy ni gyishlombecy wac gazi lagy dey lo de ru, tees lo ya̱ rzi lagy dey, gun naal la ricya̱ nu rabee nu de coz nu ricy dey, nde' coz a̱' nap. 8De ru yaa der sa', gun ya̱ waya̱ na, gun gaal zi nigul shuub tiem ne̱ nu gya̱ ―nam. 9Ornu blazh mniim de riidz ze', orze' byeeñ gam Galilea. 10Na despuees ornu bi gush nez de bicy mi nu ya dey sa' ze', orze' gush neza' ub mi yam. Nomaas walab nu suelt la yam, sinu yam tub mod nu dze ga. 11Na de mbecy zub lo ni de mbecy Israeel byub dey mi lat sa'. Orze' na dey rab yu losa'y: ―¿Ca rded yu ze' na? ―na dey. 12Na lat de mbecy zigy brugyi' ro dey riidz dze ga nu rzat dey mi. Yu' dey nay: “Yu ze' nac yu tub mbecy nap.” Tees yu' ga' dey rniiy: “Yu ze' walab mbecy nap nac yu, sinu ricy yu nu radza mbecy”, na dey. 13Nunu ni tub la mbecy wansat dey mi ye ga la nu nac nu rdzib dey lo de yu zub lo ni de mbecy Israeel. 14Na ornu bi guzeel sa', orze' gu' Jesuuz loli' ni yu' nu driib zily de mbecy Israeel Ñgyoozh. Orze' brugyi' rlyuum ni dey. 15Orze' tona' la za nu ic de yu zub lo ni de mbecy Israeel: ―¿Lac bicy yu ii nu gud lagy yu ni de coz nu rniiy, gun wanchay scuel? ―na dey. 16Orze' na Jesuuz rab mi dey: ―Riidz nu rlyu̱u̱, nde' walab riidz nu bruu nañ shcab ni uba̱, sinu nde' riidz nu bruu lo Ñgyoozh, biñ nu bzuu nez ya̱. 17Cyu zi'l mbecy benu shet ic yu nu gyicy yu coz nu rlagy Ñgyoozh, orze' gad lagy yu benu riidz nu rlyu̱u̱, nde' bruuñ lo Ñgyoozh, o nu rlyu̱u̱ riidz nu rlagy ub zi'l la̱. 18Gun benu mbecy nu rnii nu shcab ni ub zi'l, yu ze' ni rniiy gun rlagy yu nu gyabic mbecy gyel mbecy niy. Ze' yu nu ryub gyel mbecy par yu nu bzuu nez yu, yu ze' coz nu rniiy, nde' coz nu rishli, nunu sac la gyel rguu nañ lardooy. 19’¿A walab nu rishli nu Moisees bzeeñ yu leey yaa der? Tees ni tub la der wagyicy yac der niñ. Orze' ¿ze' lagu ryub der mod nu cut ru ya̱? ―nam. 20Orze' na la be de mbecy zigy ze' rab yum: ―¡Ru bicy ni nuras ru! ¿Ze' cyu nu rlagy cut ru ze' beni? ―na dey. 21Orze' na ga' Jesuuz rab mi dey: ―Dela de ru za nu ic der nu nac tub zi coz nu bicya̱ sab, dzi nu rzu lagy mbecy Israeel. 22Tees Moisees pcaay der nu caar beey sircunsision cuerp ni de yu nguzh ni der. Mas sab, dzi nu rzu lagy mbecy Israeel, rcaa der beey ni sircunsision cuerp ni yu nguzh ni der, como nde' coz nu pcaa Moisees der nu gyicy ru. Tees nde' walab coz nu bzuub Moisees gyi'ñ, sinu nde' coz nu nil ricy de gyitoo bel ni den. 23Benu de ru rcaar beey sircunsision cuerp ni yu nguzh ni der mas sab, dzi nu rzu lagy mbecy, par nu cue' chu' falt ni der nu leey ni sircunsision nu bzeeñ Moisees, orze' ¿lagu rzi lagy der lo̱ gyi' nu bicy yaca̱ dutuub la cuerp ni tub mbecy rat, sab, dzi nu rzu lagy mbecy Israeel? 24Cue' nii too der la na tub coz tub nu rgüii zi'l der looñ. Ornu nii too der la na tub coz, orze' bicy der mod nu se'ñ. 25Na la be de mbecy nu yu' Jerusaleeng, orze' brugyi' rgugyi' dey lo losa'y: ―¿Ze' a walab yu ii yu nu ryub dey mod nu cut yu ze'? 26¡Güii ñuu! Lo rgüii la mbecy rniiy. Nunu ni tub la mbecy wagnii dey nu yu' falt niy. ¿Posib a walab nu rad lagy de fushtiz nu rishli gaal nu yu re nac yu Mesías? 27Tees ornu cyid Mesías, orze' ni tub la mbecy wad lagy dey ca gruum. Ze' yu ii rad lagy den ca ledz yu ―na dey. 28Na tiem ze' zu Jesuuz loli' ni yu' nu driib zily de mbecy Ñgyoozh, nunu rlyuum ni dey. Orze' brugyi' ye ga la rniim: ―¡Laab ni yu' lo der ya̱, nunu rad lagy der ca bru̱u̱! Tees walab nu yapa̱ nu nac nu rlagy ub zi'l la̱, tees biñ nu bzuu nez ya̱, mi ze' nac mi biñ nu ricy paa, nunu mi ze' a̱' yu' lo der mi. 29Tees ya̱ yu' lo̱m, gun ya̱ bru̱u̱ lom, nunu mi ze' bzuu nez mi ya̱ yapa̱ ―nam. 30Yu' mbecy ngulagy dey ñgya nu dey mi pres, tees ni tub la dey wanshet yaay mi gun nigul shuub tiem nu ni gyicy nu dey mi. 31Tees zigy mbecy bicy cup dey consuel lom. Orze' na dey: ―Ornu cyid Mesías, ¿walab gaal gyicy zir mi nusuriidz, gaze' gal nu ricy yu ii? ―na dey. 32Na ornu güeñ de mbecy fariseo de riidz nu bee de mbecy dze ga nu nac Jesuuz, de yu ze' gal nu de yu zub lo ni de uz bzuu nez dey la be de yu nu rña nañ yu' ni Ñgyoozh nu cha nu dey mi pres. 33Orze' nam rab mi dey: ―Gabee chesa du̱ de ru se la be dzi. Orze' gru̱u̱ lat der nu gya̱ lo biñ nu bzuu nez ya̱ nu yapa̱. 34De ru yub der ya̱, tees wayada̱' ni der, gun wac cha der lugaar ze' nu ya̱ gya̱. 35Na de yu zub lo ni de mbecy Israeel brugyi' ro dey riidz nu losa'y. Orze' na dey: ―¿Ze' ca cha ga' yu ii nu wayada'y ni den? ¿Walab gaal chay lat de mbecy Israeel nu rcyiiñ reña' nasyoong nu cha lyuuy ni de mbecy nu walab mbecy Israeel? 36¿Lac yaruu de riidz nu rniiy: “Yub der ya̱, tees wayada̱ ni der, gun wac cha der lugaar ze' nu ya̱ gya̱”, nay? ―na dey. 37Laab nde' la dzi nu bded ni sa' ze'; nde' dzi nu ricy zir ñi presis. Orze' dzi ze' wes su Jesuuz. Orze' ye la mniim: ―Benu ca na der rbigy ru nis nañ lardoor, orze' da der lo̱. Ya̱ grica̱ nis go' der. 38Nde' gal nu rniiñ lat de riidz ni Ñgyoozh. Rniiñ nu de yu nu gyicy cup consuel lo̱, grib nis nu cuic gyel mbañ nañ lardoo dey, rniiñ ―nam. 39Na nis nu bzat Jesuuz ze', nde' Espiriit Yon ni Ñgyoozh, biñ nu cuic Ñgyoozh ni de yu nu gyicy cup consuel lom, gun tiem ze' Ñgyoozh nigul cuic mi Espiriit Yon nim ni mbecy, gun Jesuuz nigul cush cyam nu gyam lo gyel lily nim. 40Na lat ze' yu' la be mbecy. Ornu güeñ dey de riidz ze', orze' na dey: ―Segur la yu ii nac yu yu nu mnii por cuen ni Ñgyoozh, yu nu ca lo cuen nu cyid ―na dey. 41Ze' yu' ga' dey nay: ―Laab mi ii nac mi Mesías, biñ nu ca lo cuen nu co mbañ de ub na ―na dey. Tees yu' ga' dey nay: ―Walab, gun Mesías walab Galilea ca lo cuen nu gruum ―na dey―. 42¿A walab nu rniiñ lat de riidz ni Ñgyoozh nu Mesías gruum lat de nez rey Dabi, nunu gal mi Beleeng, laab lugaar ze' nu gul rey Dabi? ―na dey. 43Orze' de mbecy byacyup nac dey nu nac Jesuuz. 44Yu' dey ngulagy yu ñgya nuy mi pres, tees ni tub lay wancu' yaay mi. 45Orze' bish cya de yu nu rña nañ yu' ni Ñgyoozh nu yay lo de mbecy fariseo, gal nu lo de uz zub lo. Orze' na de yu ze' rab yu de yu nu rña ze': ―¿Lagu wancyiid nu der Jesuuz? ―na dey. 46Orze' na ga' de yu nu rña ze': ―¡Rila wagrusu ni tub la mbecy nu gniiy gal nu rnii yu ze'! ―na de yu nu rña ze'. 47Orze' na ga' de mbecy fariseo rab yu dey: ―¿A ni' zi'l de ru bi bguu ga'y der? 48Guncar ni tub la de fushtiz ni den, ni de mbecy fariseo wacheña lagy dey nu nac yu Mesías. 49Tees de mbecy nu a̱' yu' lo leey nu bzeeñ Moisees, de yu ze' cuic Ñgyoozh cashtig ni dey ―na dey. 50Ze' ri tub mbecy fariseo nu la Nicodemo lat dey. Yu ze' yu nu gua güii Jesuuz anzir. Orze' nay rab yu dey: 51―Gun lo leey nu bzeeñ Moisees ni den rniiñ nu wac niin nu yu' falt ni tub mbecy anzir nu gyeñ na de coz nu rniiy, nunu anzir nu gad lagy na de coz nu bicy yu ―nay. 52Orze' na ga' dey rab yu Nicodemo: ―¿Walab gaal gaza'r nac ru mbecy Galilea? Nap psya' lat de riidz ni Ñgyoozh, gun orze' gad lagy ru nu rila waruu ni tub yu nu rnii por cuen ni Ñgyoozh Galilea ―na dey. 53Orze' tub ga la mbecy ya dey yu'y.

will be added

X\