San Juan 6

1Na despuees ni de nu nde', orze' Jesuuz zam tub la' ga' ru' nisyudoo ni Galilea. Laab nde' nisyudoo ni Tiberias. 2Orze' zigy mbecy za ca dey ich mi, gun bzaac dey de nusuriidz ily nu bicy mi nu de mbecy rat ze'. 3Orze' Jesuuz gup mi too tub bicy. Orze' gusub mi nu de yu nu rsya' lom. 4Na tiem ze' bi rgaab tub sa' ni de mbecy Israeel nu la sa' ni Pas. 5Na ornu bri' lom, orze' bzaac mi nu tona' la zigy mbecy bde' dey lom. Orze' nam rab mi Lip: ―¿Ca chan cha gyiin coz nu gric na gow dela de mbecy ii? ―nam. 6Ni mniim ben la gnii Lip, gun ub mi bi rad lagy mi la na coz nu gyicy mi. 7Orze' na Lip rab yum: ―Ni nu sac i moz ni cyup gaynal dzi wal ñii nu gad coz nu gow dey mas ñuu ga ―nay. 8Orze' brusu tub dey lat de yu nu rsya' lom, yu nu la Ndrees, yu ze' laab bicy Simo̱o̱ Bed. Orze' nay rab yu Jesuuz: 9―Ii zu tub yu nguzh nuuy gaay gyishtily nu byaa nu arin ni sebada, nunu nuuy cyup bel. ¿Par ca gal laa nde' lat de mbecy zigy? ―nay. 10Orze' na ga'm rab mi yu: ―Mnii der lo dela mbecy nu gzub dey ―nam. Lugaar ze' tona' la nash gyizh ca'. Orze' gucua dey loñ. Nac tub gaay miily yu gyeey lat de mbecy nu gucua lugaar ze'. 11Orze' Jesuuz gush mi de gyishtily ze'. Orze' briic mi gras ni Ñgyoozh. Orze' briic mi ñii nu dugyeez ñi lat de mbecy nu nguaa ze'. Ni' zi'l bicy mi nu de bel ze' nu dugyeez ma lat dey dub gal nu galagy ñi ni tub ga dey. 12Na ornu blazh bdow dey, orze' na Jesuuz rab mi de yu nu rsya' lom: ―Gua te' der de coz nu brusub gun cue' nu nit loñ ―nam. 13Orze' de yu ze' brugyi' rte' dey de gyishtily nguzh nu brusub ni gaay gyishtily sebada ze'. Orze' bdu' dey ñi nañ trocyup chicyiw nunu bdzaa lañ. 14Ornu bzaac de mbecy nu nguaa ze' nusuriidz nu bicy Jesuuz nu de gyishtily ze', orze' na dey rab yu losa'y: ―Rishli gaal mi ii nac mi tub biñ nu rnii por cuen ni Ñgyoozh. Mi ii nac mi biñ nu rnii por cuen ni Ñgyoozh nu ca lo cuen nu cyid gyishlombecy ―na dey. 15Tees Jesuuz gud lagy mi nu rlagy dey nu zeeñ yum rey por fers la. Orze' bruum lat dey zam ub zim too tub bicy. 16Na ornu becheñ, orze' de yu nu rsya' lo Jesuuz bet dey par ru' nisyudoo. 17Orze' gu' dey nañ tub barc. Orze' bded dey lo nisyudoo par nu cha dey par Capernaum. Na ornu bi bet rel nap la, orze' gaal zi nigul ru'ña Jesuuz lo dey. 18Laab or ze' tona' la fert bru'ña tub bi ily, nunu tona' la ricy ñi nu rzup nguuly lo nisyudoo ze'. 19Na ornu dzi bi psaa dey barc ze' lo nis nu rnii tub gaay o shuup miily metr, orze' bzaac dey Jesuuz nu rzam lo nis, nunu yagaab mi lo dey. Orze' tona' la gudzib dey. 20Orze' nam rab mi dey: ―¡Ya̱ nu nde'! ¡Cue' dzib der! ―nam. 21Orze' de yu ze' pshet ic dey nu chu'm nañ barc ze'. Orze' sij la bri dey gashtal lugaar ze' nu rsaap dey chay. 22Na ornu bza' yu tuuba' dzi, orze' de mbecy nu byeeñ tub la' ga' dzu ru' nisyudoo brugyi' rnii too dey. Gud lagy dey nu za ga de yu nu rsya' lo Jesuuz nañ tub zi barc nu zu lugaar ze'. Nunu gud lagy dey nu de yu ze' wancha nu dey Jesuuz. 23Ze' lat ze' bri reña' barc. Barc ze' bruuñ gyedz Tiberias. Briñ gaab ga lugaar ze' nu bdow dey gyishtily despuees ornu Shuaan na Jesuuz briic mi gras ni Ñgyoozh. 24Na ornu de mbecy zigy ze' bzaac dey nu sac Jesuuz lugaar ze' gal nu de yu nu rsya' lom, orze' ni' zi'l de mbecy ze' gu' dey nañ barc. Orze' za dey za yub yum par Capernaum. 25Na ornu bri de mbecy zigy ze' tub la' ga' ru' nisyudoo, orze' bdzeel dey Jesuuz. Orze' na dey rab yum: ―Masht, ¿gul brir lugaar ii? ―na dey. 26Orze' na Jesuuz rab mi dey: ―Ya̱ rishli rne̱e̱ lo der nu de ru ryub der ya̱ par nu nac nu brica̱ nu bdow der nu byel la nir. Walab par nu bet lag der cuen de nusuriidz nu bicya̱. 27Cue' gyicy der riiñ par de coz nu gow der gyishlombecy ii, gun nde' wazu tuuñ ñi; sinu bicy der riiñ par de coz nu gow der nu gyicy ñi nu cui mbañ der tub la. Nde' coz nu gric ya̱, biñ nu byac mbecy. Gun de nusuriidz nu ricya̱, nde' tub sey nu briic Ñgyoozh ne̱ par nu gabe nu laab ñi de riidz nu rne̱e̱ ―nam. 28Orze' na dey rab yum: ―¿Ca na coz nu rlagy ñi nu gyicy de̱ par nu gyicy de̱ coz nu rlagy Ñgyoozh? ―na dey. 29Orze' na ga' Jesuuz rab mi dey: ―Coz nu rlagy Ñgyoozh nu gyicy der, nde' nu gyicy cup der consuel lo ya̱, biñ nu bzuu nez mi ―na Jesuuz. 30Orze' na dey rab yu Jesuuz: ―¿La ñuu nusuriidz lyuur lo̱ de̱ par nu gzac de̱, gun orze' gyicy cup de̱ consuel lor? ¿La ñuu na coz nu gyicy ru? 31Gun de gyitoo bel ni den bdow dey tub lo gyishtily nu la maná. Nde' bruuñ gal gyibaa lat nu gusa dey de lugaar ub zi, gal nu rniiñ lat riidz ni Ñgyoozh: “Ñgyoozh briic mi gyishtily nu bruu gyibaa gow dey”, rniiñ ―na dey. 32Orze' na Jesuuz rab mi dey: ―Ya̱ rishli rne̱e̱ lo der nu walab Moisees briic yu gyishtily nu bruu gyibaa nu gow dey, sinu Ñgyoozh, uza̱, briic mi ñii. Ze' na Ñgyoozh, uza̱, mi ze' rbic mi gyishtily nu rishli nu bruu gyibaa nu gow der. 33Gun gyishtily nu rbic Ñgyoozh ze', nde' gyishtily nu bruu gyibaa bet ñi gyishlombecy ii, nunu rishli rbic ñi nu cui mbañ de mbecy gyishlombecy ii ―nam. 34Orze' na dey rab yum: ―Jesuuz, cuic ru gyishtily nu rniir ze' da̱w de̱ de dzi la ―na dey. 35Orze' na Jesuuz rab mi dey: ―Ya̱ naca̱ gyishtily nu rbic gyel mbañ ze'. Yu nu gyecha' lo̱, yu ze' rila wariiba' nu gyan yu nañ lardooy. Nunu de yu nu gyicy cup consuel lo̱ rila wariiba' nu cuigy dey nis nañ lardooy. 36Tees ya̱ bi mne̱e̱ lo der nu mas rzac der ya̱, tees wayicy cup der consuel lo̱. 37Dela de yu nu rbic Ñgyoozh ne̱ yecha' dey lo̱. Nunu de yu nu gyecha' lo̱ walo̱o̱ chu̱ dey. 38Gun ya̱ walab nu bru̱u̱ gyibaa par nu yapa̱ nu gyicya̱ coz nu rlagy uba̱, sinu yapa̱ nu gyicya̱ coz nu rlagy Ñgyoozh, uza̱, biñ nu bzuu nez ya̱. 39Nunu biñ nu bzuu nez ya̱ ze' rlagy mi nu ni gyicya̱ nu cue' zaana̱ nu dune' ni tub la mbecy nu briic mi ne̱, sinu gyicya̱ nu gyabañ de mbecy nu bi gut ornu laab nde' la nu shuub dzi nu ded ni gyishlombecy. 40Gun coz nu rlagy Ñgyoozh, uza̱, nde' nu dela mbecy nu cu' lo ya̱, i'ñ mi, nunu gyicy cup dey consuel lo̱, orze' cui mbañ dey tub la; nunu gyicya̱ nu gyabañ de mbecy nu bi gut ornu laab nde' la nu shuub dzi nu ded ni gyishlombecy ―nam. 41Orze' la be de mbecy Israeel brugyi' rnii deet dey nu nac Jesuuz, par nu mniim: “Ya̱ naca̱ gyishtily nu bruu gyibaa beta̱ gyishlombecy ii”, nam. 42Nunu na ga' dey: ―¿A walab yu ii, yu nu nac i'ñ See? De ub na yu' lo den uz yu, nunu yu' lo den ñaay. Güii la rnii ga'y na. Nay nu gyibaa bruuy bet yu gyishlombecy ii ―na dey. 43Orze' na ga' Jesuuz rab mi dey: ―Cue' nii deet der lat losa'r. 44Ni tub la mbecy wac gyecha' dey lo̱ benu walab Ñgyoozh uza̱ biñ nu bzuu nez ya̱, rniim nañ lardoo dey nu gyecha'y lo̱. Nunu gyicya̱ nu gyabañ yu ornu shuub dzi nu ded ni gyishlombecy. 45Gun ca tub riidz lat de riidz nu bzeeñ de yu nu mnii por cuen ni Ñgyoozh. Orze' rniiñ: “Ñgyoozh rlyuum ni dela mbecy”, rniiñ. Nde' nu dela de yu nu rzuub gyidag de riidz ni Ñgyoozh uza̱, nunu rsya' dey lom, de yu ze' gyecha' dey lo̱. 46’Nde' nu walab nu ca na tub mbecy bi bzaac yu Ñgyoozh uza̱; sinu tub zi la ya̱, biñ nu bruu lom rzaca̱m. 47Ya̱ rishli rne̱e̱ lo der nu cyu zi'l yu nu gyicy cup consuel lo̱, yu ze' bi guud nu cui mbañ yu tub la. 48Gun ya̱ naca̱ gyishtily nu cuic gyel mbañ ni mbecy. 49De gyitoo bel ni de ru bdow dey gyishtily nu la maná nu briic Ñgyoozh lat nu gusa dey de lugaar ub zi, tees gut dey. 50Tees gyishtily nu ya̱ rzata̱ lo der, nde' gyishtily nu bruu gyibaa. Mbecy nu gow gyishtily ze' wat yu. 51Ya̱ naca̱ gyishtily nu cuic gyel mbañ: gyishtily nu bruu gyibaa. De yu nu gow gyishtily ze', cui mbañ yu tub la, nunu gyishtily nu ya̱ grica̱ ni dey, nde' laab cuerp ne̱. Rica̱ ñii, gun orze' de mbecy gyishlombecy gad nu cui mbañ dey ―nam. 52Orze' la be de mbecy Israeel brugyi' nu ro zi dey riidz nu losa'y. Orze' na dey: ―¿Lac mod gyicya' yu ii par nu cuic yu cuerp niy dow den? ―na dey. 53Orze' na Jesuuz rab mi dey: ―Ya̱ rishli rne̱e̱ lo der benu wow der cuerp ne̱ ya̱, biñ nu byac mbecy, nunu benu wo' der reña̱, orze' wad nu cui mbañ der. 54Cyu zi'l mbecy nu gow cuerp ne̱ nunu go'y reña̱, yu ze' bi guud nu cui mbañ yu tub la, nunu gyicya̱ nu gyabañ yu ornu laab nde' la nu shuub dzi nu ded ni gyishlombecy. 55Gun cuerp ne̱, nde' tub comid nu rishli gaal. Ze' reña̱, nde' tub nis nu rishli gaal nu go' dey. 56Gun de yu nu gow cuerp ne̱ nunu go'y reña̱, de yu ze' cyiiñ du̱ yu, nunu de yu ze' cyiiñ nuy ya̱. 57Ñgyoozh uza̱, biñ nu bzuu nez ya̱, mbañ mi, nunu ya̱ mbaña̱ par nu nac mi ze'. Nde' nu ni' zi'l mod de yu nu gow cuerp ne̱, cui mbañ yu nu nac ya̱. 58Gyishtily nu ya̱ rzata̱ lo der, nde' gyishtily nu bruu gal gyibaa. Gyishtily nu rne̱e̱ ii, nii wasaap ñi gyishtily nu la maná nu bdow de gyitoo bel ni den. Mas bdow dey de gyishtily ze', tees gut dey. Ze' de yu nu gow gyishtily nu ya̱ rne̱e̱, de yu ze' cui mbañ dey tub la ―nam. 59De nii coz nu blyuu Jesuuz ni de mbecy nu byatublaazh nañ yu' nu rsya' de mbecy Israeel riidz ni Ñgyoozh Capernaum. 60Na zigy de yu nu rsya' lom, ornu güeñ dey de nde', orze' na dey rab yu losa'y: ―De riidz nu mniim ii, dzi ga biigy. ¿Cyu gagye nu gyeñ de nu nde? ―na dey. 61Na ornu gud lagy Jesuuz nañ lardoom nu rnii deet dey nu nac nde', orze' nam rab mi dey: ―¿A nu nac de riidz nu mne̱e̱ ii, nde' nu wangyu' lagy der? 62¿Ze' la gyicya' der benu gzac ru nu ya̱, biñ nu byac mbecy, nu chupa̱ gyibaa, ze' nu pcyiiña̱ nu loga? 63Espiriit Yon ni Ñgyoozh, mi ze' gyicy mi nu cui mbañ de mbecy gun de mbecy gyishlombecy se la la cyiiñ dey par nu gyicy dey nu cui mbañ yu. Tees de riidz nu mne̱e̱ lo der ii, nii coz nu bruu lo Espiriit Yon ni Ñgyoozh. Nunu mi ze' gyicy mi nu cui mbañ dey. 64Tees gabee yu' la be mbecy lat der nu wagyicy cup consuel lo̱ ―nam. Gun Jesuuz nil bi gud lagy mi nese anzir nu cuim dey nu ca na de yu nu wayicy cup consuel lom, nunu bi gud lagya'm ca na yu nu gu'm yaa mbecy rzi lagy. 65Orze' na ga'm: ―Nde' nu ya̱ bi mne̱e̱ lo der nu ni tub la mbecy wac gyecha' dey lo̱, benu walab Ñgyoozh niim nañ lardoo dey. 66Par nu nac de riidz ze', zigy de yu nu rsya' lom bya ich yu nunu wanchesa nu ga' dey mi. 67Orze' na Jesuuz rab mi de trocyup yu nu rsya' lom: ―Ze' de ru, ¿a ni' rlagy der ruu chur lo̱? ―nam. 68Orze' na Simo̱o̱ Bed: ―Shuaan de̱, ¿ze' cyu lo cha̱ de̱ beni? De riidz nu ru rniir, nde' riidz nu gyicy ñi nu cui mbañ de̱ tub la. 69Nunu de̱ ya̱ bi ricy cup de̱ consuel lor, nunu bi rad lagy de̱ nu ru nac ru biñ yon nu bruu lo Ñgyoozh ―na Bed. 70Orze' na ga' Jesuuz rab mi dey: ―¿A walab nu pcui̱ de trocyup de ru? Ze' lo trocyup der, tub yu nac yu tub mbecy ni nuras ―nam. 71Lat nu mniim de riidz ii, orze' bzat mi Judas, i'ñ Simo̱o̱ Iscariote, gun mas Judas nac yu tub de trocyup yu nu rsya' lom, tees yu ze' yu nu bgu' Jesuuz yaa mbecy nu rzi lagy.

will be added

X\