San Juan 4

1De mbecy fariseo güeñ dey nu zigy zir de mbecy nu za ca ich Jesuuz, gaze' de yu nu za ca ich Waa. Nunu rbic zir mi nu zu nis mbecy gaze' Waa. 2Mas walab ub la Jesuuz driib nis mi mbecy, sinu de yu nu rsya' lom rbic dey nu zu nis mbecy. 3Na ornu gud lagy Jesuuz de nu nde', orze' bruum lo yu ni Judea, orze' yam par de lo yu ni Galilea. 4Na ze' nu yam rlagy ñi nu ded mi lo de yu ni Samaria. 5Orze' bru'ñam tub gyedz nu la Sicar nu ri lo yu ni Samaria. Gyedz ze' gare ga ri tub nac yu nu briic Jacob ni i'ñ yu See. 6Lugaar ze' zub zo nu rnii dey, “Zo ni Jacob.” Ze' gusub Jesuuz nu rzu lagy mi gun gutsiñ mi nu tuñ bzam nez. Nde' tub or widoo. 7Orze' de yu nu rsya' lom bzeeñ dey mi. Orze' za dey lat gyedz nu za zii dey coz nu gow yu. Orze' bru'ña tub biñ mñaa Samaria, bru'ñam ru' zo ze' nu za gyiim nis. Orze' na Jesuuz rab mi biñ mñaa ze': ―Doo ñuu nis nir do̱' ―nam. 9Orze' na biñ mñaa ze' rab mi Jesuuz: ―Ru nac ru tub mbecy Israeel. Ze' ya̱ naca̱ tub biñ mñaa Samaria. Orze' ¿lagu rgyiiñ ru nis go'r lo̱? ―nam. Gun de mbecy Israeel wagac gyicy dey ni tub la coz nu mbecy Samaria, gun a̱' nap yu' dey. 10Orze' na ga' Jesuuz rab mi biñ mñaa ze': ―Bi bicy na nu ru gad lagy ru la na coz nu rbic Ñgyoozh, nunu bicy na nu gad lagy ru cyu nac ya̱, nu rdiña̱ nis do̱' lor, orze' ru cyiñ ru nis lo̱ ya̱ go'r. Orze' ya̱ rica̱ nis nu rbic gyel mbañ nu rishli nu go'r. 11Orze' biñ mñaa Samaria ze' nam rab mi Jesuuz: ―Ze' ru, ni a̱' nur la nu par nu cor nis, gun zo ii gyi ri nis nañ ñi. Ze' ru, ¿ca cor nis nu cuic gyel mbañ ze' ne̱? 12Gyitoo bel ne̱ de̱ Jacob bzeeñ mi zo ii ne̱ de̱ ya̱. Nunu laab ii go'm nis gal nu de i'ñ mi nu de bañcyug nim. ¿Walab gaal lily zir na ru gaze' gyitoo bel ne̱ de̱ ze'? ―na biñ mñaa ze'. 13Orze' na Jesuuz: ―Dela de mbecy nu go' nis ii, wayeca nu cuigy zir dey nis. 14Ze' de mbecy nu go' nis nu ya̱ grica̱, de mbecy ze' rila wabigya' dey nis. Gun nis nu ya̱ grica̱, nde' gyicy ñi nu gyac nañ lardoo dey gal na tub ze' nu driib nis. Nis ze' gyicy ñi nu cui mbañ dey tub la ―nam. 15Orze' na biñ mñaa ze' rab mi Jesuuz: ―Beni, orze' cuic ru nis ze' do̱' gun cue' ga' nu cuigya̱' ñii nunu cue' ga' gyap gyi̱i̱ ñii ii ―na biñ mñaa ze'. 16Orze' na ga' Jesuuz: ―Yaa, ya te ñgyeer, nunu cyid nur yu ii ―na Jesuuz. 17Orze' na ga' biñ mña̱a̱ ze': ―Sac ñgye̱e̱ ya̱ ―nam. Orze' na ga' Jesuuz: ―Ru gaal rishli rniir nu sac ñgyeer, 18Gun bi bzu gaay ñgyeer. Ze' yu nu zu ga' na, yu ze' walab ñgyeer. Ru rishli mniir lo̱ nu sac ñgyeer ―nam. 19Ornu biñ mñaa ze' güeñ mi nu nde', orze' nam rab mi Jesuuz: ―Na bet laga̱ cuen nu ru nac ru tub biñ nu rnii por cuen ni Ñgyoozh. 20De gyitoo bel ne̱ de̱, de biñ Samaria, briib zily dem Ñgyoozh too bicy ii. Ze' de ru rnii der nu gal Jerusaleeng rlagy ñi nu riib zily mbecy Ñgyoozh, rnii der ―na biñ mñaa ze'. 21Orze' na Jesuuz rab mi biñ mñaa ze': ―Biñ mñaa, guña ñuu lagy riidz nu rne̱e̱. Shuub tub dzi nu de mbecy griib zily dey Ñgyoozh, uz den. Orze' walagya'ñ nu cyid dey too bicy ii, ni nu gya dey Jerusaleeng. 22De ru mbecy Samaria wagad lagy der la na biñ nu driib zily ru. Tees de̱ ya̱ mbecy Israeel rad lagy de̱ la na biñ nu driib zily de̱, gun lat de mbecy Israeel gruu mod par nu gruu mbañ mbecy. 23Tees shuub dzi, nunu na la nde' ornu de mbecy nu rishli gaal griib zily Ñgyoozh uz na gyicy dey ñi tub mod nu rishli, mod nu rlagy Espiriit Yon ni Ñgyoozh, gun nde' mod nu rlagy Ñgyoozh uz na. Nde' mod nu rlagy mi nu gyicy de yu nu griib zily mi. 24Gun Ñgyoozh nac mi Espiriit, nunu de yu nu griib zily mi rlagy ñi nu gyicy dey ñi tub mod nu rishli, tub mod nu rlagy Espiriit Yon nim ―nam. 25Orze' na biñ mñaa ze' rab mi Jesuuz: ―Rad lagya̱ nu cyid Mesías, biñ nu pcui Ñgyoozh nu co mbañ mi den. Laab mi ze' lam Crisht. Ornu mi ze' cyid mi, orze' shaal mi dela coz lo̱ de̱ ―nam. 26Orze' na ga' Jesuuz: ―Mi ze' nac ya̱, biñ nu rnii nu ru na la ―nam. 27Laab or la ze' bri de yu nu rsya' lom. Orze' za nu la ic dey nu Jesuuz rom riidz nu tub biñ mñaa. Tees ni tub la dey wancuic yu baloor nu ngugyi'y lo biñ mñaa ze' la coz rlagy mi, o nu ngugyi' dey lo Jesuuz ben lagu ro num biñ mñaa ze' riidz. 28Orze' biñ mñaa ze' bzeeñ ga lam re' nim. Yam lat gyedz. Orze' nam rab mi de mbecy: 29―Da der gun cha güiir tub biñ gyeey nu mniim dela coz nu bicya̱. ¿Ben a chii la a walab mi ze' Mesías? ―na biñ mñaa ze'. 30Orze' bruu de mbecy lat gyedz ze' za dey lo Jesuuz. 31Lat nu ya biñ mñaa ze', orze' de yu nu rsya' lo Jesuuz rnishbaa dey lom nu gow mi gyit. Orze' na dey: ―Masht, bdow mas ñuu mi' ―na dey. 32Orze' nam rab mi dey: ―Ya̱ ricy cupa̱ coz nu da̱w. Tees de ru wagad lagy der la coz nde' ―nam. 33Orze' de yu nu rsya' lom brugyi' rgugyi' dey lo losa'y. Orze' na dey: ―¿Walab gaal bi biid nu ca na mbecy coz nu gow mi? ―na dey. 34Orze' na ga' Jesuuz rab mi dey: ―Ornu gyicya̱ coz nu rlagy Ñgyoozh, biñ nu bzuu nez ya̱, nunu ornu gza' lo̱ riiñ nim, orze' nde' nañ gal na de coz nu da̱w. 35De ru mbish tub riidz nu rnii der: “Gabee ricy falt ru' tap beey par nu te'n cosech”, rnii der. Ze' ya̱ rne̱e̱ lo der nu güiir lo de mbecy nu yad ii. Na dey gal nu na tub nac gyel. Güii la nañ. Bi guc niñ nu dude' cosech, gun bi zu lily dey nañ lardooy nu gyicy cup dey consuel lo̱ ―na Jesuuz―. 36’Gun de yu nu cha te' cosech ze', bi gyad iy, nunu cosech nu rte' dey ze', nde' de mbecy par nu cui mbañ dey tub la, gun orze' de yu nu rnuuz, gal nu de yu nu rte' tublaazh la gyet lagy dey. 37Nii tub riidz nu rishli nu rnii mbecy: “Tub yu rnuuz yu. Ze' tuuba'y rte'y.” 38Ya̱ bzuu neza̱ der nu gua te'r lat tub nac gyel ze' nu wangyicy la der riiñ. Ze' reña' dey bicy yu riiñ lat gyel ze'. Ze' de ru byash der cosech nu nac riiñ nu bicy reña' dey ―nam rab mi de yu nu rsya' lom. 39Na, tona' la zigy de mbecy Samaria nu yu' gyedz ze' bicy cup dey consuel lo Jesuuz nu nac nu mnii biñ mñaa ze' lo dey. Orze' nam: “Mi ze' mniim lo̱ dela coz nu bicya̱”, nam. 40Na ornu bru'ña de mbecy Samaria lom, orze' mnishbaa dey lom nu gyiyeeñ mi num dey. Orze' byeeñ num dey cyup dzi. 41Orze' zigy zir mbecy bicy cup dey consuel lo Jesuuz nu nac de riidz nu mniim. 42Orze' na dey rab yu biñ mñaa ze': ―Na ricy cup de̱ consuel lo Jesuuz walab nu nac riidz nu mnii zi'l ru, sinu nu nac nu güeñ gyidag la de̱. Nunu rishli gud lagy de̱ nu mi ii nac mi biñ nu co mbañ de mbecy nu yu' gyishlombecy ―na dey rab yu biñ mñaa ze'. 43Na ornu bded ni cyup dzi ze', orze' bruu Jesuuz Samaria nu yam par lo de yu ni Galilea. 44Gun laab ub mi mniim nu tub yu nu rnii por cuen ni Ñgyoozh waca lagy de mbecy ledz yu loy, nam. 45Na ornu brim lo de yu ni Galilea, orze' de mbecy nu yu' de lugaar ze' nap bicy nu dey mi, gun bi bya dey sa' ni Pas Jerusaleeng. Nde' bi bzaac dey de coz nu bicy mi lat sa' ze'. 46Orze' Jesuuz bish cyam zam Caná, tub gyedz nu ri lo yu ni Galilea. Laab lugaar ze' nu bicy mi nu byac nis ñup ni urbyay. Na zu tub mbecy nu zu riiñ ni gubier. Ze' i'ñ yu mbish rat yu Capernaum. 47Yu ze', ornu güeñ yu nu bruum Judea nu brim Galilea, orze' guay mnishbaay lom nu cham yu'y nu gyicy yac mi i'ñ yu, gun bi zuu lay nu gat yu. 48Orze' Jesuuz nam rab mi yu nu zu riiñ ze': ―De ru wagyicy cup der consuel lo̱ benu wazac der muesht o nusuriidz ―nam. 49Orze' na yu nu zu riiñ ze' rab yu Jesuuz: ―Jesuuz, yaa chan gun nis gat i'ña̱ ―nay. 50Orze' na Jesuuz rab mi yu: ―Yaa la gun i'ñ ru mbañ yu ―nam. Orze' mbecy ze' guña lagy yu de riidz nu mnii Jesuuz. Orze' yay. 51Na nez nu yay, orze' gua cheel de moz niy yu. Orze' na dey: ―¡I'ñ ru mbañ yu! ―na dey. 52Orze' bdugyi'y lo dey ben la or brugyi' nu zesu nap lagy i'ñ yu. Orze' na dey rab yuy: ―Naag, tub gyiib tub or gudze, orze' bruu zig yu ―na dey. 53Orze' byeza' lagy yu nu laab or ze' mnii Jesuuz loy. Ornu nam: “I'ñ ru gruu mbañ yu”, nam. Orze' bicy cup dey consuel lom nu dela famil niy. 54Nde' nusuriidz cyup nu bicy Jesuuz despuees nu bruum lo yu nu la Judea ornu zam par lo de yu ni Galilea.

will be added

X\