San Juan 3

1Bzu tub mbecy fariseo lay Nicodemo. Nac yu tub mbecy nu zu riiñ lat de mbecy Israeel. 2Orze' tub rel guay gua güiiy Jesuuz. Orze' nay rab yum: ―Masht, de̱ ya̱ rad lagy de̱ nu Ñgyoozh bzuu nez mi ru yad ru par nu lyuur ni de mbecy, gun ni tub la mbecy wac gyicy dey de nusuriidz nu ricy ru ze' benu walab Ñgyoozh nac num yu. 3Orze' na Jesuuz rab mi yu: ―Ya̱ rishli rne̱e̱ lor nu ni tub la mbecy wazac yu lo gyel gubier ni Ñgyoozh benu wal yu tuuba' tir ―nam. 4Orze' bdugyi' Nicodemo lom: ―¿Par lac mod gyicy tub mbecy gush nu gal yu tuuba' tir? ¿Walab gaal gac chu' tub mbecy gush nañ ñaay par nu gal yu tuuba' tir? ―nay. 5Orze' na ga' Jesuuz rab mi yu: ―Ya̱ rishli rne̱e̱ lor nu ni tub la mbecy wazac yu lo gyel gubier ni Ñgyoozh benu wal yu lat nis, nunu benu wal yu nu nac Espiriit Yon ni Ñgyoozh. 6Ornu tub mbecy ral yu ni ñaay, orze' mbecy zi'l nac yu. Tees benu tub mbecy gal yu nu nac Espiriit Yon ni Ñgyoozh, orze' ni Ñgyoozh nac yu. 7Cue' cha nu ic ru nu rne̱e̱ lor nu rlagy ñi nu gal der tuuba' tir. 8Gush ñuu shcab mod nu ricy bi. Ca zi'l lugaar druuñ. Reñ ru rsiigy ñi, tees wagad lagy der ca druuñ, nunu wagad lagy der ca par chañ. Ni' zi'l wagad lagy mbecy lac mod rac nu ral yu nu nac Espiriit Yon ni Ñgyoozh. 9Orze' na ga' Nicodemo rab yu Jesuuz: ―¿Ze' lac mod gac de coz nu rniir ze'? ―nay. 10Orze' na Jesuuz: ―Gunca ru nac ru tub moscuel zub lo ni de mbecy Israeel, ¿ze' a wagad lagy ru de coz ze'? 11Ya̱ rishli rne̱e̱ lo der de coz nu rad lagy de̱, nunu dric de̱ raso̱o̱ ni de coz nu bzaac de̱. Ze' ni tub la der wagnii der “O” nu de riidz nu rne̱e̱ de̱. 12Ze' benu wacheña lagy der ornu rne̱e̱ de coz nu rac gyishlombecy ii, ze' yegar benu ne̱e̱ ga̱' de coz nu rac gyibaa cheña ga' lagy der. 13’Ni tub la mbecy nigul chup yu gyibaa, sinu tub zi ya̱, biñ nu byac mbecy, bru̱u̱ gyibaa bri̱ gyishlombecy ii. 14Gal nu Moisees pcaay tub bily gyiib lo tub yag. Orze' pshes su dey yag ze' lat nu gusa de too bel nin tub lugaar ub zi, ni' zi'l ya̱, biñ nu byac mbecy, rlagy ñi nu caa dey ya̱ lo tub yag nu she su dey ñi. 15Gun orze' de yu nu gyicy cup consuel lo̱, orze' de yu ze' gad gyel mbañ nu tub la ni dey ―nam―. 16’Gun Ñgyoozh tona' la rcam de ru mbecy nu yu' gyishlombecy ii. Nde' nu gal briic lam ya̱ i'ñ mi nu tub zi zu nim ni der. Gun orze' de mbecy nu gyicy cup consuel lo̱, de yu ze' wanit lo dey, sinu gad nu cui mbañ dey tub la. 17Gun Ñgyoozh wanseed mi ya̱, biñ nu nac i'ñ mi, gyishlombecy ii par nu niim nu yu' falt ni de mbecy, sinu par nu co mbañ mi dey nu nac ya̱. 18’Cyu zi'l mbecy nu gyicy cup consuel lo̱ ya̱, i'ñ Ñgyoozh, de yu ze' wanii Ñgyoozh ti yu' falt niy. Tees de yu nu wayicy cup consuel lo̱, Ñgyoozh bi mniim nu yu' falt ni dey nu nac nu wangyicy cup dey consuel lo̱ ya̱, i'ñ mi nu tub zi zu nim. 19Rnii Ñgyoozh nu yu' falt ni dey gun ya̱, biñ nu lyuu yaa ni coz rishli lo de mbecy, yapa̱ gyishlombecy ii, tees de mbecy bet zir lagy dey ze' nu cow, gaze' ze' nu yu' yaa ni coz rishli par nu nac nu shiñ ricy dey. 20Ca zi'l na mbecy nu shiñ ricy, yu ze' wagyet lagy yu ze' nu yu' yaa ni coz rishli, nunu wagyecha'y ze' nu yu' yaa ni coz rishli par nu walagy dey gyu' bee de coz cyi nu ricy dey. 21Tees ca zi'l na mbecy nu ricy coz nu laab ñi, yu ze' yecha'y ze' nu yu' yaa ni coz rishli, gun de coz nap nu ricy yu, nde' coz nu bruu lo Ñgyoozh ―na Jesuuz. 22Na, despuees ornu bded de nu nde', orze' Jesuuz gush nez mi za num de yu nu rsya' lom par de lo yu ni Judea. Ze' pcyiiñ mi num dey la be dzi. Orze' briic mi nu bzu nis mbecy. 23Ni' zi'l Waa rded yu driib nis yu mbecy tub gyedz nu la Enín garee ga gyedz nu la Salim, gun lugaar ze' yu' sheñ nis. Orze' de mbecy rza dey loy. Orze' rbic yu nu zu nis dey. 24Gun tiem ze' Waa nigul gyet lag yu nañ yu' gyiib. 25Na, la be de yu nu rsya' lo Waa, bee zi dey riidz nu tuuba' mbecy Israeel gyi' nu nac nu lac mod gyacaacy de mbecy par lo Ñgyoozh. 26Orze' gua too dey rishlo Waa. Orze' na dey rab yuy: ―Masht, yu nu byeeñ nu ru tub la' ga' dzu ru' gyoow Jordaang, laab yu nu bzat ru lo̱ de̱, yu ze' driib nis yu mbecy. Nunu dela mbecy rza dey loy ―na dey. 27Orze' na ga' Waa rab yu dey: ―Ni tub la mbecy wac gyicy yu tub riiñ ni Ñgyoozh benu walab Ñgyoozh bdu'm ñii yaay nu gyicy yuñ. 28De ru bi güeñ der nu naal la mne̱e̱ lo der nu ya̱ walab Mesías, biñ nu ca lo cuen nu co mbañ mbecy, sinu ya̱ naca̱ tub yu nu bzuu nez Ñgyoozh nu cha̱ ga̱ lo par mi ze'. 29Ya̱ na gal nu na tub amig ni tub yu nu nac nob. Biñ nu nac ni nob ze', mi ze' par yu nu nac nob ze'. Mi ze' walab par amig niy. Ze' yu nu nac amig niy, tona' la yet lagy yu ornu reñ yu nu zaab ti'y rniiy. Ni' zi'l na ya̱ tona' la yet lagya̱ nu nac de coz nu rniir lo̱, gal nu yet lagy de amig ni nob ze'. 30Gun mi ze' yagya zir zum. Ze' ya̱ nu yagash zir zu̱ ―na Waa―. 31’Biñ nu bruu lo Ñgyoozh, mi ze' gya zir zum par dela mbecy. Ze' de ub na, mbecy nu bruu gyishlombecy ii, nac naa ni gyishlombecy. Orze' rnii den de coz nu rac gyishlombecy. Tees biñ nu bruu gyibaa, mi ze' gya zir zum par dela mbecy. 32Mi ze' rniim de coz nu bzaac mi, gal nu de coz nu güeñ mi, tees se ñuu zi zi mbecy “O” rnii nu nac de coz nu rniim. 33Tees de mbecy nu “O” rnii ni de coz nu rniim, yu ze' ricy dey nu gabe nu par ub yu, de riidz nu rnii Ñgyoozh, nde' riidz rishli. 34Ze' biñ nu bzuu nez Ñgyoozh, mi ze' rniim riidz ni Ñgyoozh, gun Ñgyoozh briic za' lam Espiriit Yon nim ni mi ze'. 35Ñgyoozh, uz na, tona' la rcam i'ñ mi, Jesuuz, nunu bicy mi nu mi ze' gyub ic mi dela coz. 36De yu nu gyicy cup consuel lo i'ñ mi, de yu ze' cui mbañ dey tub la. Tees de yu nu wazuub gyidag nim, de yu ze' wad nu cui mbañ dey. Sinu Ñgyoozh zeed mi cashtig ily nim too dey ―na Waa.

will be added

X\