San Juan 21

1Na despuees ni de nu nde', orze' bru'ña Jesuuz lo̱ de̱ ya̱ yu nu rsya' lom tuuba' tir ru' nisyudoo ni Tiberias. Orze' i mod guc ñii. 2Orze' ze' yu' tublaazh la be de yu nu rsya' lom. Ze' zu Simo̱o̱ Bed, nu Tomaas, yu nu rnii dey cuach, gal nu Natanael, yu nu bruu Caná, tub gyedz nu ri lo yu ni Galilea, gal nu ya̱ nu bicya̱ Santiag, de̱ ya̱ nu nac i'ñ Zebedeo, gal nu se cyup mbecy nu rsya' lo Jesuuz. 3Orze' na Simo̱o̱ Bed rab yu de' zir de̱: ―Ya̱ cha̱ guuz bel ―nay. Orze' na dey rab yu Bed: ―Ni' de̱ ya̱ cha̱ du̱ ru ―na dey. Orze' brush nez de̱ za̱. Orze' gu' de̱ nañ tub barc. Gua la rel byub de̱ bel tees ni tub ma wangad ma. 4Na ornu bi brugyi' nu bi yad nu rza' yu, orze' bru'ña Jesuuz gusub mi ru' nisyudoo. Tees de̱ ya̱, yu nu rsya' lom, wangyu' lo de̱ mi. 5Orze' nam rab mi de̱: ―Der yu feñ, ¿a wangad la bel ni der? ―nam. Orze' mne̱e̱ de̱: ―Rila wangad ma ―mne̱e̱ de̱. 6Orze' na ga' Jesuuz rab mi de̱: ―Orze' mne' der gyish ze' par bee barc gun orze' gad ma ni der ―nam. Orze' mne' de̱ gyish ze' lo nis, nunu par nu tona' la zañ bel gu' ma nañ gyish ne̱ de̱, orze' ni wagaca' nu loo de̱ ñii lo nis nu cshup de̱ ñii nañ barc. 7Orze' ya̱, yu nu rsya' lo Jesuuz nu dzi razañ lagy mi ze', mne̱e̱ lo Bed: ―¡Laab Jesuuz, biñ nu nac Shuaan den! ―Mne̱e̱. Laab güeñ la Simo̱o̱ Bed nu laab mi ze' Shuaan den, orze' bzuy shab yu gun a̱' zuy shab yu. Orze' bet lay lo nis zay. 8Orze' de' zir de̱ ya̱, losa'y, gal ri zi'l de̱ nañ barc rgayu̱ tuñ la de̱ gyish nu yu' bel ze'. A̱' zet zaab barc lo nis. Nu rnii tub gaynal gaal metr nu zet nu zaab ñi lo nis. 9Na ornu bru̱u̱ de̱ nañ barc par lo yu bigy, orze' bzaac de̱ nu bi nguaa gyi nunu riib tub bel loñ. Nunu nguaa ga' gyishtily. 10Orze' na Jesuuz rab mi de̱: ―Da nu der la be bel, bañ nu sa bdub der na ―nam. 11Orze' Simo̱o̱ Bed gu'y nañ barc. Bdu' yaay gyish nu yu' de bel ze'. Bga' yu tuñ lay ñi za nuy ñi par ru' nisyudoo. Dza la nañ ñi yu' du ub bel ily la. Yu' tub gaynal nu̱ zub chon bel ze' nac ma. Mas tona' la bel zañ yu' nañ gyish ze', tees wanshaañ. 12Orze' na Jesuuz rab mi de̱: ―Gyeed der gun gyicy ru siily ―nam. Tees ni tub la de̱ wanric de̱ baloor nu ndugyi̱' de̱ lom ben cyu nac mi, gun gud lagy de̱ nu laab mi, nde' Shuaan de̱. 13Orze' Jesuuz becha'm lo de̱. Orze' bdu' yaam gyishtily ze'. Briic mi ne̱ de̱. Orze' ni' zi'l bicy num de bel ze'. 14Orze' nde' tir chon nu bzaac de̱ Jesuuz despuees ornu bi byabañ mi. 15Na ornu blazh bicy de̱ siily, Jesuuz nam rab mi Bed: ―Simo̱o̱, i'ñ Jonás, ¿a rca zir ru ya̱, gaze' gal mod nu rca de' zir de yu ii ya̱? ―nam. Orze' na Bed: ―Laab Shuaana̱, ru rad lagy ru nu rca̱ ru ―nay. Orze' na ga' Jesuuz: ―Orze' mña de mbecy nu nac shily ne̱ ―nam. 16Orze' mnii ga'm tir cyup la loy. Orze' nam: ―Simo̱o̱, i'ñ Jonás, ¿a rca zir ru ya̱, gaze' gal mod nu rca de' zir de yu ii ya̱? ―nam. Orze' na ga' Bed rab yum: ―Laab Shuaana̱, ru rad lagy ru nu rca̱ ru ―nay. Orze' na ga' Jesuuz: ―Orze' mña de mbecy nu nac shily ne̱ ―nam. 17Orze' na ga'm rab mi yu tir chon la: ―Simo̱o̱, i'ñ Jonás, ¿a rcar ya̱? ―nam. Orze' tona' la bicy shni Bed gyi' nu bdugyi'm chon tir loy ornu nam: “¿A rcar ya̱?” nam. Orze' nay rab yum: ―Shuaana̱, ru rad lagy ru dela coz. Nunu rad lagy ru nu ya̱ rca̱ ru ―nay. Orze' na ga' Jesuuz. ―Mña de mbecy nu nac shily ne̱. 18Ya̱ rishli rne̱e̱ lor nu lat nu gufeñ ru, bzur shab ru nunu guar ca zi'l lugaar nu rlagy ru char. Tees ornu gyaguush ru, orze' zaab yaar lo tuuba' mbecy. Orze' yu ze' gzuuy ru shab ru. Orze' yu ze' cha nuy ru lugaar ze' nu walagy ru char ―nam. 19Na ornu mnii Jesuuz de riidz ze', nde' par nu gyicy mi nu gabe lac mod gruu zac gyel lily ni Ñgyoozh nu nac nu gat Bed. Orze' na ga'm rab mi Bed: ―¡Da ca icha̱! ―nam. 20Na ornu bish cya Bed bgüiiy par ich yu, orze' bzaac yu ya̱, yu nu dzi razañ lagy Jesuuz ze'. Laab ya̱ yu nu bzub cuit mi ornu bicy de̱ che du̱m, nunu bdugyi̱' lom: “Shuaana̱, ¿ca na yu nu cush cya ich ru ze'?” 21Na ornu bzaac Bed ya̱, orze' bdugyi'y lo Jesuuz. Orze' nay: ―Shuaan de̱, se yu re, ¿la zac yu? ―nay. 22Orze' na Jesuuz rab mi yu: ―Ze' benu ya̱ rlagya̱, orze' yu re gabee mbañ yu ornu yapa̱ tuuba' tir. Ru, ¿la nu ricy ñi nir? Nomaas nu da ca zi'l icha̱ ―nam. 23Orze' bzu riidz lat dela de yu nu rsya' lom nu ya̱ wata̱. Tees walab nu mnii Jesuuz nu wata̱. Coz nu mniim nde': “Ze' benu ya̱ rlagya̱, orze' yu re gabee mbañ yu ornu yapa̱ tuuba' tir. Ru, ¿la nu ricy ñi nir?”, mniim. 24Nunu laab ya̱, yu nu mnii de riidz ii. De riidz ii pca̱a̱ lo gyicy; nunu rad lagy de̱ nu nde' coz rishli nu mne̱e̱. 25Jesuuz zañ zir coz bicy mi. Nunu benu tub ga la de coz ze' ncaañ lo gyicy, ya̱ rze̱e̱ nu ni wal gyishlombecy nu chu' de gyicy ze', benu nca delañ.

will be added

X\