San Juan 20

1Na noming, dzi loga ni sman, gabee caas ru' zu, gua Li nu bruu Magadán ru' baa ni Jesuuz. Orze' bzaac ñi nu bi bdugyash gyita' nu rsoow ru' baa ze'. 2Orze' gush ñi carer yaañ lo Simo̱o̱ Bed, gal nu lo ya̱ tuuba' yu nu rsya' lo Jesuuz, yu nu dzi razañ lagy mi ze'. Orze' nañ rab ñi de̱: ―¡Bloo dem cuerp ni Shuaan den nañ gyerbaa za nu dem! Na ¿cyu cuic raso̱o̱ ca bicy dem ñii? ―nañ. 3Orze' Bed gal nu ya̱ za de̱ za güi̱i̱ ru' baa ze'. 4Orze' rup laa de̱ brush de̱ carer za̱, tees ya̱ bded lo̱ lo Bed. Orze' bru'ña̱ ru' baa loga la. 5Orze' bzaab tiilya̱ nu bgüi̱i̱ nañ gyerbaa ze'. Ze' bzaaca̱ se sab zi'l nim nguaañ. Tees wanchu̱' nañ gyerbaa ze'. 6Orze' par icha̱ bru'ña Simo̱o̱ Bed. Orze' lueg la gu'y nañ gyerbaa ze'. Nunu ni' zi'l bzaac yu sab ze' nguaañ. 7Nunu bzaaca'y negy nu ptiish dey too Jesuuz nguaa reñ ñi nu sab nim nunu nap nach cyup ñi nguaañ. 8Orze' gaze' nu ni' zi'l gu' ga̱' ya̱; mas laab ya̱ bru'ña̱ loga la ru' gyerbaa ze'. Orze' bzaaca̱ de nu nde'. Orze' guña lagya̱ nu byabañ mi. 9Tees de̱ ya̱ gabee nigul gyet lag de̱ cuen lac yaruu de riidz ni Ñgyoozh nu rniiñ nu mi ze' rlagy ñi nu gyabañ mi. 10Orze' bish cya de̱ ya̱a̱ de̱ par yu'. 11Orze' Li ze' gusuñ ruun ñi par ich ro' ni gyerbaa ze'. Lat nu ruun lañ ze', orze' bzaab tiily ñi bgüiiñ nañ gyerbaa ze'. 12Orze' bzaac ñi cyup anc nañ gyerbaa ze'. Zu dey negy cacy. Zub dey ze' nu gubish cuerp ni Jesuuz. Tub yu zub yu ze' nu gubish toom. Ze' tuuba'y zub yu par ze' nu gubish gyi'm. 13Orze' de anc ze' nay rab yu Li: ―Biñ mñaa, ¿la gyi', lagu ruun ru? ―na dey. Orze' na Li: ―Gun za nu mbecy Shuaana̱, nunu wagad lagya̱ ca bicy dem mi ―nam. 14Na ornu blazh mniiñ de riidz ze', orze' bish cyañ bgüiiñ par ich ñi. Orze' bzaac ñi nu zu Jesuuz. Tees wangyu' loñ ti laab mi. 15Orze' na Jesuuz rab mi ñii: ―Biñ mñaa, ¿la gyi', lagu ruun ru? ¿Cyu ryub ru? ―nam. Orze' mnii tooñ nu nde' tub mbecy nu ricy riiñ lat de ya mni nu nash ze'. Orze' nañ: ―Ze' benu ru gua nur cuerp nim, orze' mnii lo̱ ca bicy ru ñii, gun orze' ya̱ cha gyi̱ cuerp ze' ―nañ. 16Orze' na Jesuuz rab mi ñii: ―¡Li! ―nam. Orze' bish cyañ bgüiiñ lom. Orze' mnii nuñ mi nu riidz hebreo: ―¡Rabuni! ―nañ. Riidz ze', nde' yaruuñ moscuel. 17Orze' na Jesuuz rab mi ñii: ―Bzaan yaa ya̱, gun gaal zi nigul gya̱ lo Ñgyoozh uza̱. Tees na yaa niir lo de bicya̱ nu bi gya̱ ga̱' lo biñ nu nac uza̱, gal nu uz der: lo biñ nu nac Ñgyoozh ne̱, gal nu Ñgyoozh ni de ru ―nam. 18Orze' Li nu bruu Magadán gush nez ñi yaa tooñ rishlo de yu nu rsya' lom. Mniiñ lo dey nu bzaac ñi Shuaan den. Nunu mnii ga'ñ lo dey de coz nu mniim looñ. 19Na ornu bi becheñ ni laab dzi loga ni sman ze', orze' byatublaazh de yu nu rsya' lom nañ tub yu'. Nunu nicy psoow dey ro' nu nac nu rdzib dey lo de yu zub lo ni de mbecy Israeel. Orze' Jesuuz bru'ñam gusum lat dey. Orze' nam rab mi dey: ―¡Gyel ri zu briñ lat der! ―nam. 20Ornu blazh mniim riidz ze', orze' blyuum yaam lo dey nunu blyuu ga'm rit lyush mi lo dey. Orze' tona' la bet lagy dey nu bzaac dey Shuaan den. 21Orze' na ga' Jesuuz rab mi dey tuuba' tir: ―¡Gyel ri zu briñ lat der! Gal nu Ñgyoozh uza̱ bzuu nez mi ya̱ yapa̱ gyishlombecy ii, nde' nu ni' zi'l ya̱ gzuu neza̱ der char lat de mbecy nu yu' gyishlombecy ―nam. 22Orze' blaam lo dey. Orze' nam: ―Na rica̱ Espiriit Yon ni Ñgyoozh nu gac num der. 23Benu de ru gyicy sulagy ru cyi ca na tub mbecy, orze' Ñgyoozh gyicy sulagy mi niy. Ze' benu wayicy sulagy der ni dey, orze' ni' Ñgyoozh wayicy sulagy mi ni de yu ze' ―nam. 24Na lo trocyup de yu nu rsya' lom, tub yu nde' Tomaas, yu nu rnii dey cuach. Orze' yu ze' sac yu lat dey ornu bru'ña Jesuuz. 25Despuees, orze' de' zir de losa'y nu rsya' lom byoo dey rishloy coz nu bzaac dey. Orze' na dey: ―Bi bzaac de̱ Shuaan den ―na dey. Tees Tomaas nay rab yu dey: ―Tees benu wazaca̱ ze' nu guud güii ni yaam nu bzub bey nunu benu wane' mbiza̱ ze' nu guud güii ze' nim, nunu benu wane' ya̱a̱ ze' nu guud güii ni rit lyush mi, orze' rila wayeña̱ lagya̱ de riidz nu rnii der ―nay. 26Na ornu bza' shuñ dzi na, orze' byatublaazha' de yu nu rsya' lom laaba' nañ yu' ze'. Orze' gaza' Tomaas riy lat dey. Nunu ni zi'l noow nicy de ro' ni yu' nu yu' dey. Orze' bru'ña Jesuuz gusum lat dey. Orze' nam: ―¡Gyel ri zu briñ lat der! ―nam. 27Orze' nam rab mi Tomaas: ―Tomaas, mne' mbiz ru lo rya̱a̱ ii, nunu güii la na ya̱a̱. Bzaab yaar lo̱ nunu mne' yaa ru' rit lyusha̱. Cue' gac ru mbecy nu wacheña lagy, sinu guc mbecy nu zeña lagy ―nam. 28Orze' na Tomaas rab yum: ―¡Ru nac ru Shuaana̱ nunu nac ru Ñgyoozh ne̱! ―nay. 29Orze' na Jesuuz rab mi yu: ―¿A guña lagy ru na par nu bzaac lar ya̱? Dzi ni de mbecy nu rzeña lagy sinu wacsac lay ―nam. 30Jesuuz zañ tona' la nusuriidz bicy mi lo rgüii la de yu nu rsya' lom nunu de nu nde' wanca ga'ñ lo gyicy ii. 31Tees de nu nii pcañ lo gyicy ii gun orze' cheña lagy der nu Jesuuz nac mi Mesías, biñ nu ca lo cuen nu cyid co mbañ mbecy, nunu nac mi i'ñ Ñgyoozh. Nunu par nu nac nu gyicy cup der consuel lom orze' cui mbañ der.

will be added

X\