San Juan 2

1Na ornu bi bza' chon dzi nu yu' fandang tub gyedz nu la Caná lo yu ni Galilea. Laab lat ze' ri ñaa Jesuuz. 2Nunu ni' zi'l mnii ga' dey lo Jesuuz nu lo de yu nu rsya' lom nu cha dey lo fandang ze'. 3Na ornu blazh ñup ni urbyay nu go' dey, orze' na ñaa Jesuuz rab mim: ―Blazh ñup ni urbyay ―nam. 4Orze' na ga' Jesuuz rab mi ñaam Li: ―Ña, ¿lagu rniir riidz ze' lo̱? Nigul shuub dzi nu gzac mbecy de gyel lily ne̱ ―nam. 5Orze' na ga' ñaam rab mi de moz nu yu' lo fandang ze': ―Bicy der la zi'l coz nu gniiñ ―nam. 6Na, ze' nguaa ga' shuup re' nu byaa nu gyita'. Nañ re' ze' rgu' de mbecy Israeel nis par nu rnaa dey nunu par nu rgyiib dey la coz gal nu rnii leey ni dey. Ze' tub ga de re' ze' rzu' tub cyaal gaynal, o tub setent litr nis nañ ñi. 7Orze' na Jesuuz rab mi de moz ze': ―Bdu' der nis nañ de re' re gal dzaa lañ ―nam. Orze' de yu ze' pchaa dey ñi gal ru' lañ. Orze' nis ze' byac ñi ñup ni urbyay. 8Orze' na ga'm rab mi dey: ―Na bda' der nis ii gua nu der go' yu nu riib ic lo fandang ―nam. Orze' gua nu dey ñi go' yu nu riib ic ze'. 9Orze' yu nu riib ic ze' bicy yu preb nis nu byac ñup ni urbyay ze', sinu wangad lagy lay ca bruuñ. Tees de moz nu bda' nis ze' gud lagy dey ca bruuñ. Orze' yu nu riib ic ze' bredz yu yu nu nac nob ze'. 10Orze' nay rab yuy: ―Dela mbecy nu loga la rbic dey ñup nap ni urbyay go' de mbecy nu rde' lo fandang. Na ornu dzi bi go' shaad dey ñup nap ze', orze' rbic dey de ñup corient go' dey. Ze' ru bzeeñ ru ñup nap gashtal na rbic ru go' dey ―nay. 11Nde' nusuriidz nu bicy mi nu loga la tub gyedz nu ri lo yu ni Galilea nu la Caná. Ze' blyuum gyel lily nim lo de mbecy, nunu de yu nu rsya' lom bicy cup zir dey consuel lom. 12Na ornu bded ze', orze' bruum Caná gush nez mi zam nu ñaam, gal nu de bicy mi, gal nu de yu nu rsya' lom za num dey par Capernaum. Ze' pcyiiñ mi la be dzi. 13Na ornu sñuu ga shuub dzi nu chu' de mbecy Israeel sa' ni Pas, orze' Jesuuz yam par Jerusaleeng. 14Na ornu brim Jerusaleeng, orze' gu'm loli' ni yu' nu driib zily de mbecy Israeel Ñgyoozh. Orze' byap mi de mbecy nu rut tor, nu shily, gal nu begy ni de mbecy. Nunu byapa'm de mbecy nu nguaa lo mez nu rchaa tiñ ni de mbecy nu bruu reña' lugaar. 15Na ornu bzaac mi de coz ze', orze' bzaam tub chicot nu duu lyaar. Orze' nu nde' pcyuu num dey, nu tor niy, gal nu shily niy. Bloom dey ich lo' ni yu' ze'. Orze' ptush las mi tiñ ni de yu nu rchaa tiñ ze' nunu blaagy yaam mez ni dey. Orze' brush las tiñ ni dey. 16Ze' de yu nu rut begy ze' nam rab mi dey: ―Bloo der de bañcyug ii lugaar ii. Cue' gyicy der yu' ni Ñgyoozh uza̱ par tub yagyi' ―nam. 17Orze' de yu nu rsya' lom byeza' lagy dey ze' nu rniiñ lat riidz ni Ñgyoozh: “Ya̱ rzu ferta̱ nu nac yu'r gashtal wagagye̱e̱ ga̱' la̱”, rniiñ. 18Orze' de yu zub lo ni de mbecy Israeel bdugyi' dey lom: ―¿La ñuu muesht lyuur lo̱ de̱ par nu gabe nu ricy cup ru rishbeey nu ricy ru de coz ii? ―na dey. 19Orze' na ga'm rab mi dey: ―Ptily der yu' ni Ñgyoozh ii. Orze' ya̱ zu napa̱ ñii nañ chon dzi tuuba' tir gal nu nañ ―nam. 20Orze' na de mbecy Israeel rab yum: ―Cyuu zub shuup ña'n gu' dey bicy yu riiñ, gaze' nu bya' lo yu' ni Ñgyoozh ii. Ze' ru na'r nu nañ chon zi dzi bi gzu nap ru ñii ―na dey. 21Tees yu' ni Ñgyoozh nu bzat Jesucrisht, nde' cuerp nim. 22Tees ornu byabañ mi, orze' de yu nu rsya' lom byeza' lagy dey nu bi mniim nu ni gac ñii. Orze' guña lagy dey de riidz ni Ñgyoozh gal nu de riidz nu mnii Jesuuz. 23Lat nu Jesuuz rded mi Jerusaleeng, lat sa' ni Pas, tona' la zigy mbecy bicy cup dey consuel lom nu nac de nusuriidz nu bicy mi. 24Tees Jesuuz wangyicy cup mi consuel lo dey gun gud lagy mi lac mod na dela mbecy. 25Ni tub la mbecy walagy ñi nu nii dey lom mod nu na de mbecy, gun ub mi rad lagy mi la na nañ lardoo dela dey.

will be added

X\