San Juan 19

1Orze' Pilato bicy yu mandaar lo de soldad nu cha nu dey Jesuuz nunu bicy yu mandaar nu gaaz dey mi. 2Orze' de soldad ptel dey yaa ya gyech. Orze' bzaa dey tub coron nu briy toom. Orze' bzuu dey mi tub negy bizat. 3Orze' byagaab dey lom. Orze' na dey: ―¡Shnu ru, rey ni de mbecy Israeel! ―na dey. Nunu brugyi' rshet dey yalom. 4Orze' bish cya Pilato lo de mbecy zigy tuuba' tir. Orze' nay rab yu dey: ―Güii der na, ya̱ yap du̱ yu lo der na gun orze' gad lagy der nu ya̱ wagyapa̱ ni tub la cyi nu bicy yu ―nay. 5Orze' bru'ña nu dey Jesuuz lo de mbecy zigy. Gabee ri coron gyech ze' toom nunu gabee zum negy bizat ze'. Orze' na ga' Pilato: ―¡Güii der, ii zu mbecy ii! ―nay. 6Na ornu bzaac de yu zub lo ni de uz gal nu de yu nu rña nañ yu' nu driib zily mbecy Ñgyoozh, orze' brugyi' rbish ti dey. Orze' na dey: ―¡Cut ruy lo cruuz! ¡Cut ruy lo cruuz! ―na dey. Orze' na ga' Pilato rab yu dey: ―Laab de ru gua nu der yu nu caa der yu lo cruuz. Ze' ya̱, ya̱ wagyapa̱ ni tub la cyi nu bicy yu ―nay. 7Orze' na ga' de mbecy zigy: ―De̱ ya̱ ricy cup de̱ tub leey. Nunu por leey la ze', yu ze' rlagy ñi gat yu, gun bicy yu ub yu nu nac yu i'ñ Ñgyoozh ―na dey. 8Na ornu güeñ Pilato riidz ze', orze' gudzib zir yu. 9Orze' bish cyay gu'y nañ yu' riiñ tuuba' tir. Orze' bdugyi'y lo Jesuuz. Orze' nay rab yum: ―Ze' ¿ca gaal ledz ru? ―nay. Tees Jesuuz wannii lam. 10Orze' na Pilato rab yum: ―Ze' ¿a wanii gaal ru lo̱ beni? ¿A wagad lagy ru nu ya̱ ricy cupa̱ rishbeey nu ca̱a̱ ru lo cruuz? Nunu ni' zi'l ricy cupa̱ rishbeey nu gla̱a̱ ru ―nay. 11Orze' na Jesuuz rab mi yu: ―Ru rila a̱' ricy cup ru rishbeey nu la gyicy nur ya̱ ze' benu walab Ñgyoozh briic mi ñii nir. Nde' nu cyi ily zir zaab yu nu bgu' ya̱ yaar gaze' ru ―nam. 12Nese or la ze' Pilato byub yu tub mod nu laay Jesuuz. Tees de mbecy zigy ze' brish ti nu zir dey yu. Orze' na dey: ―¡Ze' benu yu ze' glaar yu, orze' ru a̱' nac nur César, yu nu riib ic de nasyoong! ¡Gun cyu zi'l mbecy nu ricy yu nu nac yu rey, yu ze' zay contr ni César! ―na dey. 13Ornu güeñ Pilato de riidz ze', orze' mniiy nu cha nu dey Jesuuz ich yu' riiñ ze'. Orze' gusub yu ze' nu riib ic dey, tub lugaar nu la Gabata benu nu riidz hebreo. Riidz ze' yaruuñ: Lugaar ze' nu bdu' dey gyita' lo yu. 14Nde' tub or widoo tub dzi anzir ni sa' ni Pas. Orze' na Pilato rab yu de mbecy Israeel: ―¡Ii zu rey ni der na! ―nay. 15Orze' brish ti dey: ―¡Biit yu! ¡Biit yu! ¡Cut ruy lo cruuz! ―na dey. Orze' na Pilato: ―¿Walab gaal rlagy der nu duta̱ rey ni der lo cruuz? ―nay. Orze' na de uz zub lo: ―¡De̱ ya̱ a̱' ricy cup de̱ rena' rey sinu César zi'l! ―na dey. 16Orze' Pilato bgu'y mi yaa dey par nu cut dey mi lo cruuz. Orze' za nu dey mi. 17Orze' bruu Jesuuz lugaar ze' za num cruuz nu cam lo. Orze' bru'ñam tub lugaar nu la Gólgota benu nu riidz hebreo. Riidz ze' yaruuñ: Lugaar ni cyug too añ. 18Ze' pcaa dey mi lo cruuz gal nu cyupa' mbecy. Tub ga dey cay tub la' ga' cuit mi. 19Orze' Pilato bicy yu mandaar nu zaa dey tub nac letr. Orze' pcaa dey ñi too cruuz nim. Orze' letr ze' rniiñ: “Jesuuz, yu nu bruu Nazaret, rey ni de mbecy Israeel”, rniiñ. 20Orze' zigy mbecy Israeel psya' dey de riidz nu rnii de letr ze' gun lugaar ze' nu pcaa dey mi lo cruuz ze' garee ga ru' gyedz. Ze' letr ze' bzaa dey ñi nu riidz hebreo, nu riidz lati̱i̱, gal nu riidz griego. 21Orze' de uz zub lo ni de mbecy Israeel, bish cya dey nu gua niiy lo Pilato. Orze' na dey: ―Cue' ncaar “Rey ni de mbecy Israeel”, sinu nap zir nu caar “Yu nu rnii nu nac rey ni de mbecy Israeel” ―na dey. 22Orze' na Pilato: ―Bi cañ ca nu nu cañ ―nay. 23Despuees ornu bi pcaa de soldad Jesuuz lo cruuz, orze' byash dey shab mi, nunu orze' tap nac ñii bicy dey nu dugyi tub gay. Orze' gush dey negy duñ nu ca yeñ mi. Nde' tub negy nu tub zily la zuñ gal yeñ mi nu gal yeñ gyi' lam ornu bdugab ñi. Sac la ze' nu bdugyib niñ. 24Orze' na de soldad rab yu losa'y: ―Nap zir cue' shaan ñi sinu loon suert ni losa'n ben ca na den dugyin ñi ―na dey. Ni guuc ñi par nu byu' niñ gal nu rniiñ lat de riidz ni Ñgyoozh: “Bleez dey shaba̱ lat losa'y. Bloo dey suert ni losa'y ben ca nay dugyiy negy duñ nu pcaa yeña̱”, rniiñ lat riidz ni Ñgyoozh. De nde' coz nu bicy de soldad. 25Na garee ze' nu zu cruuz nu ca Jesuuz, ze' zu ñaam, gal nu bily ñaam, nu Li mñaa Cleofas, gal nu Li biñ nu bruu Magadán. 26Orze' Jesuuz bzaac mi ñaam nu zum garee ga nu ya̱, tub yu nu rsya' lom. Laab ya̱, yu nu dzi razañ lagy mi. Orze' nam rab mi ñaam: ―Ña, yu nu zu ze', bicy yu par tub i'ñ ru ―nam. 27Orze' nam rab mi ya̱, yu nu rsya' lom ze': ―Biñ nu zu ze', bicy mi par tub ñaar ―nam. Orze' nese laab or la ze' byasha̱ biñ mñaa ze' nu ya du̱m yu̱'. 28Na despuees ni de nu nde', orze' Jesuuz bi gud lagy mi nu bi bza' lom de riiñ nu biid mi. Orze' par nu gyu' niñ gal nu rniiñ lat de riidz ni Ñgyoozh, orze' nam: ―Rbigya̱ nis ―nam. 29Orze' ze' zu tub teg yu' ñup zii nañ ñi. Orze' psal dey tub coz nu chayo' nis lo ñup ze'. Pcyiig dey ñi lo tub lo yag nu la hisopo. Orze' pcaa dey ñi ru'm. 30Orze' go'm ñup ze'. Orze' nam: ―Bya' loñ ―nam. Orze' gusab tiily toom. Orze' gut mi. 31Nde' tub dzi anzir ni sa' ni Pas. Ze' de mbecy zub lo ni de mbecy Israeel walagy dey ca añ lo cruuz dzi sab, dzi nu rzu lagy mbecy, gun dzi ze', nde' tub dzi da. Orze' gua nishbaa dey lo Pilato nu gyicy yu mandaar lo soldad nu cha dey cyicy yu gyi' de yu nu ta' lo cruuz ze' par nu gyel gyet de añ ze' lo cruuz. 32Orze' gua de soldad ze'. Pcyicy dey gyi' yu nu bru'ña dey lo loga la. Gaze' nu pcyicya' dey gyi' yu nu ca lo cruuz, cruuz nu zu tub la' ga' cuit Jesuuz. 33Tees ornu bru'ña dey lo Jesuuz, orze' bzaac dey nu bi gut mi. Orze' nde' nu wancyicya' dey gyi'm. 34Tees tub de soldad mne'y tub yag too lyuch lat rit lyush mi. Orze' lueg la bruu reñ nunu bruu nis. 35Laab ya̱, yu nu rnii de coz nu guc ii, nde' coz nu bzaac urlo̱ la̱. Nunu rne̱e̱ coz rishli. Laab ya̱ rad lagya̱ nu coz nu rne̱e̱, nde' coz rishli. Ni mne̱e̱ gun orze' ni' de ru cheña lagy der. 36Dela coz ii ni guuc ñi par nu byu' niñ gal nu rniiñ lat de riidz ni Ñgyoozh ze' nu rniiñ: “Ni tub rit mi wacyicy dey”, rniiñ. 37Ze' tub se' ga' lat riidz ni Ñgyoozh rniiñ: “De mbecy güii dey lo biñ nu mne' dey yag too lyuch nañ”, rniiñ. 38Despuees ni de nu nde', orze' See, tub yu nu bruu Arimatea, bdiiñ yu rishbeey lo Pilato nu cha nuy cuerp ni Jesuuz. Ze' yu ze' ni' nac yu tub yu nu rsya' lom. Tees dze ga rsya'y lom nu nac nu rdzib yu lo de yu zub lo ni de mbecy Israeel. Orze' Pilato briic yu rishbeey. Orze' See gua nuy cuerp nim. 39Orze' Nicodemo, yu nu gua bee riidz nu Jesuuz nu loga la tub rel, yu ze' bru'ña nuy tub nu rnii gal rup tii cyil coz zguul. Coz zguul ze' nde' tub lo bid nu la mirra gu' can nu tub lo gyez ni yag nu la áloe. 40Orze' laab de yu ze' gua nu dey cuerp ni Jesuuz. Orze' ptiish dey cuerp ze' negy. Lo negy ze' ta' de coz zguul. Bicy dey mod nu rlagy ñi gal nu na cushtom ni de mbecy Israeel ornu rcach dey añ. 41Gaab ga ze' nu pcaa dey mi lo cruuz, ze' ri tub nac yag mni. Nunu lat yag mni ze' ca tub gyerbaa cub nu nigul cui la añ. 42Orze' ze' bri dey cuerp ni Jesuuz, gun gyerbaa ze' garee ga cañ nunu sñuu ga shuub dzi nu rzu lagy de mbecy Israeel.

will be added

X\