San Juan 18

1Na ornu bded nu mnii Jesuuz de riidz ze', orze' bruum nu de yu nu rsya' lom lugaar ze' nunu zam tub la' ga' gyerlas nu la Cedrón. Ze' ri tub nac yag mni. Ze' gu' Jesuuz lat ñi nu de yu nu rsya' lom. 2Na Judas, yu nu bish cya ich mi, ni' yu' loy lat de yag mni ze', gun zañ tir byatublaazh Jesuuz nu de yu nu rsya' lom lugaar ze'. 3Orze' Judas bru'ña nuy tub nac soldad Rom gal nu cyup chon de mbecy nu rña nañ yu' nu driib zily de mbecy Israeel Ñgyoozh. De yu ze' güay par mandaar ni de yu zub lo ni de uz gal nu de mbecy fariseo. Orze' dela de yu ze' zu tañ dey. Nuu dey candiil, nunu nuu ga' dey yag nu zub gyi lo. 4Tees Jesuuz bi gud lagy mi dela coz nu gzac mi. Orze' bruum lat de yu nu rsya' lom. Orze' nam rab mi dey: ―¿Cyu ryub der? ―nam. 5Orze' na dey rab yum: ―Tub mbecy Nazaret, yu nu la Jesuuz, yu ze' ryub de̱ ―na dey. Orze' na ga' Jesuuz: ―Ya̱ nu nde' ―nam. Orze' Judas, yu nu bish cya ich mi, gaza'y zuy lat de yu ze'. 6Na ornu mnii Jesuuz: “Ya̱ nu nde'”, nam, orze' dela dey bya ich yu nunu wes saa la dey lo yu. 7Orze' na ga' Jesuuz rab mi dey: ―¿Ze' cyu gaal ryub der? ―nam. Orze' na ga' dey: ―Mbecy Nazaret. Yu nu la Jesuuz ―na dey. 8Orze' na ga'm rab mi dey: ―Ya̱ bi mne̱e̱ lo der nu ya̱ nde'. Ze' benu ya̱ ryub der, orze' bzaan der nu gya de yu ii ―nam. 9Tees mniim de riidz ze' par nu gyu' niñ gal nu mniim nu gac ñii ornu mniim: “Ñgyoozh, uza̱, ya̱ wansaana̱ ndune' ni tub la de yu nu briic ru ne̱”, nam. 10Orze' Simo̱o̱ Bed nuuy tub mandzicy. Orze' bloo zay ñi nunu pshi'ñ yu gyidag bee tub moz ni uz nu riib ic de' zir de uz. Moz ze' lay Malco. 11Orze' Jesuuz nam rab mi Bed: ―Dzach ru bri mandzicy ze' se'ñ. Taz nu gzuub Ñgyoozh, uza̱, ru̱', ¿walab gaal wane̱e̱ “O” nu do̱' ñii? ―nam. 12Orze' de soldad Rom ze' gal nu de yu nu riib ic dey gal nu de yu nu rña yu' nu driib zily mbecy Ñgyoozh, de yu ze' pcyiig dey yaa Jesuuz. Orze' za nu dey mi pres. 13Nu loga la gua nu dey mi lo Anás. Gun Anás nac yu uz gud Caifás, yu nu byub ic de uz ña'n ze'. 14Orze' laab Caifás nac yu yu nu byoo rishlo de yu nu riib ic de mbecy Israeel. Mniiy nu nap zir nu gat tub zi mbecy gaze' nu gat dela de mbecy. 15Orze' Simo̱o̱ Bed gal nu tuuba' losa'y nu rsya' lo Jesuuz gua ca dey ich mi. Ze' yu nu riib ic de uz ze' nap yu' loy tuuba' yu nu rsya' lom ze'. Orze' gu'y nu Jesuuz loli' ni yu' ni uz nu riib ic ze'. 16Tees Bed byeeñ gay par ich ze' nu ca ro'. Orze' laab yu nu nap yu' lo uz ze' bish cyay nu gua nii nuy fiñ mñaa nu zu riiñ nu rshaal ro' ze'. Nunu bicy yu nu gu' Bed loli' ze'. 17Orze' na fiñ nu rshaal ro' ze' rab ñi Bed: ―¿A gaza' ru nac ru tub mbecy nu rsya' lo mi re? ―nañ. Orze' na Bed rab yuñ: ―Walab ―nay. 18Como dzi rag, orze' de moz gal nu de yu nu rña ze' pcuaa dey gyi. Orze' dub yub la yu' dey nu rbidz dey ñi. Orze' gaza' Bed riy lat de yu ze' nu rbidz yu gyi ze'. 19Na yu nu riib ic de uz brugyi' nu rgugyi'y lo Jesuuz nu nac de yu nu rsya' lom gal nu nu nac de coz nu blyuum ni de mbecy. 20Orze' Jesuuz nam rab mi yu: ―Ya̱ lo nu loo la mne̱e̱ lat dela mbecy. Dub laa tiem blyu̱u̱ ni de mbecy nañ de yu' nu rsya' mbecy riidz ni Ñgyoozh gal nu nañ yu' ze' nu driib zily dey mi. Nunu ze' nu yatublaazh de mbecy, ze' rlyu̱u̱ ni dey. Ya̱ ni tub la coz wanne̱e̱ ngach. 21¿Orze' lagu rgugyi'r lo̱? Bdugyi' lo de mbecy nu bzuub gyidag de coz nu mne̱e̱, nunu de yu ze' gyooy rishlor ni de coz nu mne̱e̱. De yu ze' rad lagy dey de coz nu mne̱e̱ ―nam. 22Ornu ni mnii Jesuuz, orze' tub yu nu rña ze' pshet yu tub yaa nim. Orze' nay rab yum: ―¿A ni na riidz nu rlagy ñi nu niir gab ru yu nu riib ic de uz? ―nay. 23Orze' na Jesuuz rab mi yu: ―Benu shiñ mne̱e̱, orze' mnii lo de mbecy nu yu' ii la na coz nu mne̱e̱. Ze' benu laab ñi gal nu mne̱e̱, ¿orze' lagu pshet ru ne̱? ―nam. 24Orze' gal nag zi'l mi bzuu nez Anás mi zam lo Caifás, yu nu riib ic de uz. 25Dub laa lat de nde', laab ze' gabee zu Bed nu rbidz yu gyi. Orze' na dey rab yu Bed: ―¿A walab gaza' ru nac ru tub yu nu rsya' lo mbecy re? ―na dey. Orze' Bed pcach ru'y. Orze' nay: ―Walab ya̱ nde' ―nay. 26Na ze' zu tub moz ni yu nu riib ic de uz ze'. Yu ze' nac yu famil ni mbecy nu pshi'ñ Bed gyidag ze'. Orze' nay rab yu Bed: ―Gaza' ru bzaaca̱ nu mbecy ze' lat de yag mni ze', ¿shiñ? ―nay. 27Orze' Bed pcach ru'y mi tuuba' tir. Orze' laab or la ze' bredz ngüel. 28Na or bi bza' yu, orze' bruu dey lo Caifás. Orze' za nu dey Jesuuz par ro' riiñ ni yu nu riib ic por cuen ni Rom. Ze' de yu nu riib ic lat de mbecy Israeel wanchu' dey nañ yu' riiñ, gun walagy dey nu gabag yu par lo Ñgyoozh, gun orze' gac gyicy dey che de coz nu row dey lat sa' ni Pas. 29Orze' bruu Pilato gua niiy lo dey. Orze' nay: ―¿La cyi driib der ic mbecy ii? ―nay. 30Orze' na dey: ―De̱ ya̱ wayap du̱ de̱ yu lor benu walab nu bicy yu coz cyi ―na dey. 31Orze' na Pilato rab yu dey: ―Laab de ru yaa nu der yu nu gri bee der niy gal nu rniiñ lo leey ni der ―nay. Orze' na ga' dey: ―Tees par lo leey a̱' ricy cup de̱ rishbeey nu gyicy de̱ nu gat ni tub la mbecy ―na dey. 32Ni guuc ñi par nu byu' niñ gal nu mnii Jesuuz ornu mniim lac mod gat mi. 33Orze' Pilato bish cyay gu'y nañ yu' riiñ tuuba' tir. Orze' bredz yu Jesuuz nu cugyi'y lom. Orze' nay: ―¿A ru nac ru rey ni de mbecy Israeel? ―nay. 34Orze' na Jesuuz rab mi yu: ―¿A nde' coz nu mnii too ub lar nu cugyi'r lo̱? Uti ¿a bzat reña' mbecy ya̱ lor? ―nam. 35Orze' na Pilato: ―¿Walab gaal rnii toor nu ya̱ naca̱ mbecy Israeel? Laab de mbecy ledz ru nunu de uz zub lo, de yu ze' bgu' dey ru ya̱a̱. Na niir la coz bicy ru ―nay. 36Orze' na ga' Jesuuz: ―Ya̱ walab nu riib ica̱ gal mod nu riib ic de rey nu yu' gyishlombecy ii. Gun benu ni, orze' de mbecy ne̱ chucoo dey par nu cue' gu' dey ya̱ yaa de mbecy Israeel. Tees ya̱ walab nu riib ica̱ gal mod nu ricy de rey nu yu' gyishlombecy ii ―nam. 37Orze' na Pilato rab yum: ―¿A nac ru tub rey, beni? ―nay. Orze' na Jesuuz: ―Laab ni gal nu ru mniir nu ya̱ naca̱ rey. Gyi' nde' nu yapa̱ gyishlombecy ii. Orze' ii gula̱, gun orze' rne̱e̱ de coz rishli. Cyu zi'l mbecy nu yet lagy de coz rishli, de yu ze' rzuub gyidag yu ne̱ ya̱ ―nam. 38Orze' na Pilato: ―¿Ca' zir na de coz rishli? ―nay. Na ornu blazh bdugyi' Pilato lom, orze' bruuy ich yu' tuuba' tir nu zay lo de mbecy zigy. Orze' nay rab yu dey: ―Ya̱ wagyapa̱ ni tub la cyi nu bicy mbecy ii ―nay―. 39Tees de ru ricy cup ru tub cushtom nu ya̱ gla̱a̱ tub pres lat sa' ni Pas. ¿Ze' na a rlagy der nu gla̱a̱ rey ni de ru, mbecy Israeel? ―nay. 40Orze' dela dey dub ru' lay rbrish tiy. Orze' na dey: ―¡Yu ze' cue' laar yu! ¡Blaa Barrabás! ―na dey. Ze' Barrabás guc yu tub gubaan.

will be added

X\