San Juan 17

1Na ornu blazh mnii Jesuuz dela de riidz ze', orze' bgüiim par gyibaa. Orze' nam: ―Ñgyoozh, uza̱, bi pshuub or ne̱ na. Bicy nu gabe gyel lily ne̱ ya̱, i'ñ ru, gun orze' ya̱ gyicya̱ nu gabe gyel lily ni ru. 2Gun ru briic ru rishbeey ne̱ nu gyub ica̱ dela mbecy. Gun orze' gyicya̱ nu cui mbañ dela de yu nu briic ru ne̱ tub la. 3Nunu mod nu cui mbañ dey tub la, nde' nu nac nu cu' lo dey ru, biñ nu tub zi la nac, Ñgyoozh rishli, nunu cu' lo dey ya̱, Jesucrisht, biñ nu bzuu nez ru. 4’Ya̱ bicya̱ nu gabe gyel lily nir gyishlombecy ii. Na bi bza' lo̱ de riiñ nu bdu'r ya̱a̱. 5Nde' nu, Ñgyoozh, uza̱, gyabica'r gyel lily ne̱ ornu gri̱ lor, gyel lily nu bicy cupa̱ lor nil nese anzir nu gzub gyi' gyishlombecy. 6’De mbecy nu bloo sur lat de mbecy nu yu' gyishlombecy ii par nu cuic ru dey ne̱, de yu ze' bi brica̱ nu gad lagy dey nu cyu nac ru. Nil nac de yu ze' nir. Ze' na de yu ze' briic ru ne̱. Nunu de yu ze' bzuub gyidag dey de riidz nu rniir, 7nunu na bi gud lagy dey nu dela coz nu briic ru ne̱, nde' bruuñ lor. 8Ya̱ bi mne̱e̱ lo dey de coz nu mniir lo̱, nunu de yu ze' “O” mnii dey. Nunu bi gud lagy dey nu rishli gaal lo ru bru̱u̱. Nunu guña lagy dey nu ru bzuu nez ru ya̱. 9’Na ya̱ rdiña̱ lor nu nac dey. Walab nu rdiña̱ lor nu nac de mbecy ni gyishlombecy. Tees rdiña̱ par de yu nu briic ru ne̱, gun nac dey nir. 10Dela mbecy nu nac ne̱, ni' nac yu nir. Nunu de yu nu nac nir, ni' nac dey ne̱. Nunu nu nac de yu ze' rabee de gyel lily ne̱. 11Ya̱ wacyiiñ tuña̱' gyishlombecy ii. Tees de yu ze' gyiyeeñ yu gyishlombecy ii lat nu ya̱ yapa̱ cyiiñ du̱ ru. Ñgyoozh, uza̱, biñ yon, mña de yu nu briic ru ne̱ nu mod fert nu ricy cup ru, gun orze' rishli gaal tub zi'l gac dey nu losa'y gal nu tub zi'l nac ya̱ nu ru. 12Lat nu pcyiiñ du̱ dey gyishlombecy ii, ya̱ mña̱ dey nu nac tub mod fert nu bruu lor. Mña̱ de yu nu briic ru ne̱. Nunu ni tub la dey wantune'y, sinu tub zi yu nu nil bi ca lo cuen nu dune'. Gun orze' gyu' niñ gal nu rniiñ lat de riidz nir. 13’Na ya̱ bi yapa̱ lor. Tees ya̱ rne̱e̱ de riidz ii lor lat nu gabee rcyiiña̱ gyishlombecy ii, gun orze' dub gal rii la lagy dey gyet lagy yu gal nu ya̱ yet lagya̱. 14Ya̱ bi brica̱ nu gad lagy dey de riidz nir. Tees de mbecy ni gyishlombecy rzi lagy yu lo dey gun a̱' zu dey shcab gal nu zu de mbecy nu yu' gyishlombecy ii shcab, como ni' zi'l ya̱ a̱' zu̱ de shcab ze'. 15Walab nu rdiña̱ lor nu cor dey lat de mbecy nu yu' gyishlombecy ii, sinu rdiña̱ lor nu ña nap ru dey nu cue' shiñ gyicy nu yu nu rnii dey nuras a̱' nap dey. 16Gal nu ya̱ a̱' zu̱ shcab nu zu de mbecy nu yu' gyishlombecy ii, ni' zi'l de yu ii a̱' zu ga' dey shcab ze'. 17Bzu chu dey par nu gzu bich yu nu nac ru zi'l. Ni bicy nu nac de riidz nu rishli. Gun de riidz nir, nde' coz rishli. 18Gal nu ru bzuu nez ru ya̱ lat de mbecy nu yu' gyishlombecy ii, ni' zi'l ya̱ gzuu neza̱ dey chay lat de mbecy ze'. 19Nunu par nu nac de yu ii ricya̱ uba̱ par tub mbecy nu rzu bich nu nac ru zi'l, gun orze' ni' zi'l de yu ii gyac dey mbecy nu rzu bich nu nac ru zi'l. Ni gyicy dey nu nac de riidz rishli nir. 20’Ya̱ walab nu rdiña̱ lor par nu nac de yu ii zi'l, sinu ni' zi'l rdiña̱ lor par nu nac de yu nu gyicy cup consuel lo̱ ornu gyeñ dey de riidz nu nii de yu ii. 21Ñgyoozh, uza̱, ya̱ rdiña̱ lor nu dela de yu ii, tub zi'l gac dey nu losa'y. Ni' zi'l tub zi'l gac yu nu de ub na gal nu ru tub zi'l nac ru nu ya̱ nunu ya̱ tub zi'l naca̱ du̱ ru. Nunu tub nac zi'l dey gac yu nu losa'y, gun orze' de mbecy nu yu' gyishlombecy cheña lagy dey nu ru bzuu nez ru ya̱ yapa̱ gyishlombecy ii. 22Bicya̱ nu gabe nu nac dey mbecy nu lily na gal nu ru bicy ru nu gabe gyel lily ne̱ ya̱, gun orze' tub zi'l nac dey nu losa'y gal nu de ub na tub zi'l nac naa. 23Ya̱ tub zi'l naca̱ du̱ dey, nunu ru tub zi'l nac ru nur ya̱, gun orze' wayicy falt par ni ñuu miiñ nu tub zi'l gac dey nu losa'y, gun orze' de mbecy nu yu' gyishlombecy ii gad lagy dey nu ru bzuu nez ru ya̱, nunu tona' la rcar de yu ii gal nu rca ga'r ya̱. 24’Ñgyoozh, uza̱, ru briic ru de yu ii ne̱, nunu ya̱ rlagya̱ nu cyiiñ dey ze' nu ya̱ cyiiña̱, gun orze' gzac dey de gyel lily ne̱: gyel lily nu briic ru ne̱. Gun ru rcar ya̱ nese anzir nu bzub gyi' gyishlombecy. 25Ñgyoozh, uza̱, ru biñ nu dzi nap. De mbecy nu yu' gyishlombecy ii a̱' yu' lo dey ru. Tees ya̱ yu' lo̱ ru. Nunu ni' zi'l de yu ii rad lagy dey nu ru bzuu nez ru ya̱ nu yapa̱ lat dey. 26Ya̱ bi brica̱ nu gad lagy dey nu cyu nac ru, nunu gric zira̱ nu gad lagy dey par lo, gun orze' mod nu ru rcar ya̱, laaba' mod ze' ca dey losa'y. Nunu laab ya̱ tub zi'l naca̱ du̱ dey ―na Jesuuz rab mi Ñgyoozh.

will be added

X\