San Juan 16

1’Ya̱ bzata̱ de riidz ii lo der par nu cue' checa der nu gyicy cup ru consuel lo̱. 2Gun wabica' dey lugaar nu gyatublaazh der nu dey nañ yu' nu rsya' dey riidz ni Ñgyoozh. Nunu shuub dzi nu benu ca na tub mbecy cut yu de ru, orze' rash yu shcab nu gyicy yu nde' lo Ñgyoozh. 3Ni mod ricy dey gun a̱' yu' lo dey Ñgyoozh uza̱ nunu ni' a̱' yu' lo dey ya̱. 4Tees ya̱ bzata̱ de riidz ii lo der gun orze' ornu shuub dzi nu gac ñii, orze' gyeza' lagy der de riidz nu mne̱e̱ lo der. ’Ya̱ walab nu mne̱e̱ de riidz ii lo der nese nu loga la nu brugyi' nu rsya' der lo̱, gun nese tiem ze' bi nac du̱ ya̱ de ru. 5Tees na bi gya̱ lo Ñgyoozh, biñ nu bzuu nez ya̱. Tees ni tub la der wacugyi'r lo̱ ca gya̱. 6Nomaas ca nu ricy shni der ornu mne̱e̱ de riidz ii lo der. 7Tees ya̱ rishli rne̱e̱ lo der nu nap zir nu gya̱ par de ru, gun ze' benu waya̱, orze' Espiriit Yon, biñ nu glocyuub de ru, wayid mi lo der. Tees benu gya̱, orze' ya̱ zuu neza̱m cyid mi lo der. 8Ornu mi ze' cyid mi, orze' naal la cuic mi nu gad lagy mbecy nu yu' cyiy, nunu cuic mi nu gad lagy dey nu gac gyanap dey lo Ñgyoozh, nunu cuic mi nu gad lagy dey nu Ñgyoozh ri beem ni dela mbecy nu nac cyi dey. 9Cuic mi nu gad lagy dey nu yu' cyiy gun wagyicy cup dey consuel lo̱. 10Cuic mi nu gad lagy dey nu gac gyanap dey gun ya̱ gya̱ lo Ñgyoozh uza̱, nunu wazaca' der ya̱. 11Nunu cuic mi nu gad lagy dey nu gri beem ni de mbecy gun nuras, yu nu riib ic gyishlombecy ii, bi mnii Ñgyoozh nu gyay lo cashtig. 12’Yu' ru' zañ coz nu rlagya̱ ne̱e̱ lo der, tees na na la ni wagyee ga' der. 13Ornu cyid Espiriit Yon ni Ñgyoozh, biñ nu rnii de coz rishli, orze' mi ze' gyoom rishlo der dela coz rishli ni Ñgyoozh. Walab nu gniim nu nac shcab ni ub zi'l mi, sinu gniim de coz nu gnii Ñgyoozh lom. Nunu cuic mi nu gad lagy der ni de coz nu gac par lo. 14Mi ze' gyicy mi nu gyabic mbecy gyel mbecy ne̱, gun de riidz nu ya̱ gne̱e̱ lom, laaba' nde' gniim lo de ru. 15Gun dela coz nu rad lagy Ñgyoozh uza̱, ni' zi'l ya̱ rad lagya̱ de coz ze'. Nde' nu ya̱ mne̱e̱ lo der nu de riidz nu ne̱e̱ lo Espiriit Yon, laaba' nde' gniim lo de ru. 16’Nañ tub miiñ zi'l, orze' wazaca' der ya̱. Tees nañ tub miiña' zi'l, orze' gzaca' der ya̱ ―nam. 17Orze' la be de yu nu rsya' lom bee nu dey losa'y riidz. Orze' na dey: ―¿Lac yaruu de riidz ze' nu nam nu nañ tub miiñ zi'l, orze' wazaca' den mi; tees nañ tub miiña' zi'l, orze' bi gzaca' den mi, gun gyam lo Ñgyoozh, uz mi, nam? 18¿Lac yaruu de riidz ze' nu nañ tub miiñ? Rila wac gyet lag na cuen de coz nu mniim ―na dey. 19Orze' Jesuuz guud lagy mi nu rlagy dey cugyi'y lom. Orze' nam rab mi dey: ―Ya̱ bi mne̱e̱ lo der nu nañ tub miiñ zi'l orze' wazac der ya̱. Orze' nañ tub miiña' zi'l, orze' bi gzaca' der ya̱, mne̱e̱. ¿A walab riidz nu mne̱e̱ ze', rgugyi' der lo losa'r? 20Ya̱ rishli rne̱e̱ lo der nu de ru gun ru nunu gyicy shni der. Ze' de mbecy ni gyishlombecy cyit ni dey. De ru gyicy shni der tees gruu gyel shni zu lagy ze' ni der nunu gyet lagy der. 21Ornu tub biñ mñaa bi rac ye nim nu gaal mi mdoo, orze' ricy shnim gun bi pshuub or nim. Tees ornu bi bded nu gul mdoo nim, orze' nit lagy mi nu gutow nim gun cyit nim nu bri mdoo lom gyishlombecy ii. 22Ni' zi'l de ru. Ricy shni der na. Tees ya̱ cush cya̱ nu yap güi̱i̱ der par lo. Orze' gyel ni lardoo der nu gyet lagy ru. Nunu ni tub la mbecy wacgyicy dey nu checa der nu gyet lagy ru. 23Ornu shuub dzi ze', orze' wugyi' ga' der lo̱. ’Ya̱ rishli rne̱e̱ lo der nu Ñgyoozh, uza̱, cuic mi la zi'l coz nu cyiñ der lom nu nac ya̱. 24Nunu mas gal dzi na ni tub la coz nigul cyiiñ der lom nu nac ya̱. Bdiiñ der lom nunu gad ñi ni der gun orze' dub gal rii la lagy der gyet lagy ru. 25’Ya̱ bi mne̱e̱ lo der de coz ii mod ni riidz tiily. Tees shuub dzi nu wane̱e̱ ga̱' lo der nu riidz tiily, sinu naal la gne̱e̱ lo der nu nac de coz ni Ñgyoozh, uza̱. 26Ornu shuub dzi ze', orze' wane̱e̱ lo der nu ya̱ diña̱ coz nu rlagy der lom, sinu ub la de ru cyiñ der coz ze' lom nu nac ya̱, 27gun ub la Ñgyoozh, uza̱, rcam der. Rcam der gun de ru rca ga' der ya̱ nunu guña lagy der nu ya̱ bru̱u̱ lom. 28Ya̱ bru̱u̱ lo Ñgyoozh, uza̱, yapa̱ gyishlombecy ii. Na ya̱ gru̱u̱ gyishlombecy ii par nu gya̱ lo Ñgyoozh, uza̱ ―nam. 29Orze' na ga' de yu nu rsya' lom rab yum: ―Na gaal naal la rniir. Walab nu riidz tiily rniir. 30Na gaal gud lagy de̱ nu ru rad lagy ru dela coz. Ni walagy ñi nu cugyi' mbecy lor par nu gad lagy ru la na coz nu rlagy yu. Nde' gyicy ñi nu cheña lagy de̱ nu ru bruur lo Ñgyoozh ―na dey. 31Orze' na ga' Jesuuz rab mi dey: ―¿A nde' nu gal na guña lagy der? 32Na bi pshuub or, nunu na la nde', ornu de ru grush las der tub ga lar nu nez nir. Nunu gzeeñ ga der ya̱ ub zi̱. Tees walab ub zi gyiyeeña̱ gun Ñgyoozh, uza̱, gac num ya̱. 33De la riidz ii rne̱e̱ lo der gun cheti ri añ ni der nu nac nu tub zi'l nac der nu ya̱. Gyishlombecy ii, de ru gzac zi der. Tees briic der baloor. Ya̱ bi bicya̱ gan gyishlombecy ―nam.

will be added

X\