San Juan 15

1Orze' na ga' Jesuuz: ―Ya̱ naca̱ biñ nu na gal nu na lyucy urbyay nu rishli. Ze' Ñgyoozh uza̱ ricy mi riiñ nu lyucy ze'. 2Nunu de ru na der gal nu na yaa lyucy ze'. Benu ca na tub yaa lyucy ze' wacuic ñi urbyay, orze' cyug mi ñii. Nunu de yaañ nu rbic urbyay dugyug loñ par nu gyanap zir ñi par nu cuic zir ñi urbyay. 3Tees de ru bi byanap der nu nac de riidz nu rne̱e̱ lo der. 4Bicy der nu cyiiñ nur ya̱ gal nu ya̱ rcyiiñ du̱ de ru. Gun tub yaa lyucy urbyay, wabic ñi urbyay benu ub zi'l ñi. Tees cuic ñi urbyay benu nash ñii cyong lyucy ze'. Ni' zi'l nu de ru, wac gyicy ru coz nu rlagy Ñgyoozh benu walab nu rcyiiñ nu der ya̱. 5’Ya̱ naca̱ biñ nu na gal nu na lyucy urbyay. Ze' de ru nac der yaañ. Ornu tub mbecy rcyiiñ nuy ya̱, nunu ornu ya̱ rcyiiñ du̱ yu, orze' yu ze' yu nu dzi ricy riiñ ni Ñgyoozh. Gun benu walab nu nac ya̱, orze' se la la gac gyicy der. 6Cyu zi'l mbecy nu nac reñ nu ya̱, yu ze' gdune'y. Gzac yu gal nu rzac tub yaa yag ornu rzi̱i̱ñ. Orze' gyicy tublaazh dey yaañ. Orze' ne̱' dey ñi lo gyi. 7’Benu de ru gyicy der nu cyiiñ nur ya̱, nunu benu riidz nu rne̱e̱ nde' checañ ic der, orze' la zi'l coz nu cyiñ der lo̱, orze' gad ñi ni der. 8Ñgyoozh uza̱ gruu zac gyel lily nim ornu de ru gyicy der zañ coz nu rlagy mi. Nunu ni mod gaze' nu rishli gyac der yu nu rsya' lo̱. 9Nunu ya̱ rca̱ de ru gal nu Ñgyoozh uza̱ rcam ya̱. Cue' dily lo der lo de coz nu rlagya̱ nu nac nu rca̱ de ru. 10Benu gzuub gyidag der de coz nu rne̱e̱ nu gyicy ru, orze' “O” nii der ni de coz nu rlagya̱ nu nac nu rca̱ der. Gyicy der gal nu ricya̱ gun ya̱ bzuub gyidaga̱ ni Ñgyoozh uza̱, nunu “O” mne̱e̱ ni de coz nu rlagy mi nu nac nu rcam ya̱. 11’Ni mne̱e̱ lo der, gun orze' gyet lagy der gal nu yet lagya̱. Nunu bded ru' ga' la nu gyet lagy der. 12Coz nu rne̱e̱ lo der nu gyicy ru nde' nu ca tub, ca tub zi'l der losa'r gal nu ya̱ rca̱ de ru. 13Benu tub mbecy “O” niiy nu gat yu nu nac amig niy, orze' yu ze' rca zir yu amig niy par de' zir mod nu gac cay amig ze'. 14De ru nac der amig ne̱ benu gyicy der de coz nu ya̱ rne̱e̱ nu gyicy der. 15Ya̱ wane̱e̱ ga̱' nu de ru nu nac der moz ne̱, gun tub moz wagad lagy yu la na coz nu ricy patro̱o̱ niy. Sinu ya̱ rne̱e̱ nu de ru nac ru amig ne̱, gun ya̱ bi mne̱e̱ lo der dela coz nu mnii Ñgyoozh uza̱ lo̱. 16De ru walab nu pcui der ya̱, sinu ya̱ pcui̱ de ru nunu bdu̱' riiñ yaa der nu gyicy der gan zañ de coz nu rlagy Ñgyoozh, coz nu wanit lo. Orze' Ñgyoozh, uza̱, cuic mi dela coz nu cyiñ der lom nu nac ya̱. 17Orze' nii coz nu rne̱e̱ lo der nu gyicy ru: Nu ca tub, ca tub zi'l der losa'r. 18’Como de mbecy ni gyishlombecy gazi lagy dey lo de ru, bicy der nu gad lagy ru nu lo ya̱ guzi lagy dey loga la. 19Bi bicy na nu de ru ñgyac der mbecy ni gyishlombecy, orze' de mbecy ni gyishlombecy nca dey de ru gal nu rca dey de' zir losa'y. Tees ya̱ pcui̱ de ru lat de mbecy ni gyishlombecy, nunu nde' nu de mbecy ni gyishlombecy rzi lagy dey lo der. Gun a̱' naca' der ni gyishlombecy. 20Bicy der nu gyeza' lagy ru nu ya̱ mne̱e̱ lo der: “Sac ni tub moz nu gya zir zuy par patro̱o̱ niy”, mne̱e̱ lo der. Como yu' mbecy nu bzab dey ich ya̱, nde' nu ni' zi'l gzab dey ich de ru. Nunu como yu' mbecy nu bzuub gyidag dey de riidz nu ya̱ mne̱e̱, orze' gzuub gyidaga' dey ni de riidz nu gnii de ru. 21Tees gzab dey ich der nu nac ya̱, gun a̱' yu' lo dey Ñgyoozh, biñ nu bzuu nez ya̱. 22’Bicy na nu cue' nu ya̱ nyapa̱ nu nne̱e̱ lo dey, orze' sac la falt ni dey nu nac nu zaab dey ich den. Tees na wac nii dey nu sac falt ni dey nu nac de coz nu ricy dey. 23Cyu zi'l mbecy nu rzi lagy lo ya̱, ni' zi'l rzi lagy yu lo Ñgyoozh uza̱. 24Bicy na nu cue' ñgyicya̱ zañ nusuriidz lat dey, coz nu rila nigul gyicy ni tub la mbecy, orze' sac la falt ni dey. Tees na bi bzaac dey de coz nu bicya̱ ze'. Mas ni tees rzi lagy dey lo̱ nunu rzi lagya̱' dey lo Ñgyoozh, uza̱. 25Tees ni mod rlagy ñi gac ñii par nu gyu' ni de riidz nu bi ca lat leey nu bzeeñ Ñgyoozh ni dey. Ze' rniiñ: “Rzi lagy dey lo̱ mas sac la la gyi'.” 26’Tees ya̱ zeeda̱ Espiriit Yon lo der, biñ nu glocyuub de ru. Mi ze' biñ nu gnii de coz rishli ni Ñgyoozh nunu mi ze' biñ nu gruu lom. Ornu cyid mi, mi ze' gniim lo der cyu naca̱. 27Nunu ni' de ru gnii der cyu nac ya̱ gun nac nu der ya̱ nese nu loga la nu brugyi' ricya̱ riiñ ni Ñgyoozh.

will be added

X\