San Juan 14

1Orze' na ga'm rab mi dey: ―Cue' zaan der nu gac deet nañ lardoor. Bicy cup der consuel lo Ñgyoozh, nunu ni' zi'l bicy cup der consuel lo̱ ya̱. 2Gun lugaar ze' nu rcyiiñ Ñgyoozh uza̱, tona' la yu' lugaar par nu cyiiñ mbecy. Ze' benu walab ni, orze' ya̱ bi mne̱e̱ lo der. Nde' nu ya̱ gya̱ ga̱. Gun zu napa̱ lugaar nu cyiiñ der. 3Nunu despuees ornu bi ya̱a̱, nunu bi bzu napa̱ lugaar nu cyiiñ der, orze' yapa̱ tuuba' tir par nu gya du̱ der, gun orze' cyiiñ der laab lugaar ze' nu ya̱ cyiiña̱. 4De ru bi rad lagy der ca par gash ru nez par nu gri der ze' nu ya̱ gya̱ ―nam. 5Orze' na Tomaas rab yu Jesuuz: ―Shuaana̱, wagad lagy de̱ ca gyar. Yegar nu gad lagya̱' de̱ ca par riib nez nu ya ze' ―nay. 6Orze' na ga' Jesuuz rab mi dey: ―Ya̱ naca̱ biñ nu rlyuu nez nu gya mbecy lo Ñgyoozh, nunu naca̱ biñ nu rnii coz rishli ni Ñgyoozh, nunu naca̱ biñ nu gyicy nu cui mbañ de mbecy. Gun wac gri ni tub la mbecy lo Ñgyoozh benu walab nu nac ya̱. 7Como de ru bi yu' lo der ya̱, nde' nu ni' zi'l bi yu' lo der Ñgyoozh uza̱. Nunu nese na la bi yu' lo der mi. Nunu bi bzaac der mi ―nam. 8Orze' na Lip rab yu Jesuuz: ―Shuaana̱, blyuu Ñgyoozh uz ru lo̱ de̱. Orze' bi guuc la ―nay. 9Orze' na ga' Jesuuz: ―Lip, gula be la tiem rded du̱ de ru. ¿Walab gaal gabee a̱' yu' lor ya̱? Cyu zi'l mbecy nu rzac ya, yu ze' bi bzaac yu Ñgyoozh uza̱. ¿Lagu rniir nu lyu̱u̱ Ñgyoozh uza̱ lor? 10¿A wacheña lagy ru Lip nu ya̱ tub zi'l naca̱ nu Ñgyoozh uza̱, nunu Ñgyoozh uza̱ tub zi'l nac mi num ya̱? ―nam rab mi Lip. Orze' na ga'm: ―De riidz nu mne̱e̱ lo der na, nde' walab riidz nu bloo ic ya̱ zi'l, sinu Ñgyoozh uza̱, biñ nu rcyiiñ nañ lardo̱o̱, mi ze' ricy mi de coz ily nu rlagy mi. 11Guña lagy der nu ya̱ tub zi'l naca̱ nu Ñgyoozh uza̱, nunu Ñgyoozh uza̱ tub zi'l nac mi nu ya̱. Benu wacheña lagy der nu nac de riidz nu rne̱e̱ zi'l la, orze' guña lagy der mas ñuu nu nac de coz ily nu ricya̱. 12Ya̱ rishli rne̱e̱ lo der nu cyu zi'l mbecy nu gyicy cup consuel lo̱, ni' zi'l gac gyicy yu de coz ily nu ya̱ ricya̱, nunu coz ilya' zir gac gyicy yu, gun ya̱ gya̱ lo Ñgyoozh uza̱. 13Nunu dela coz nu cyiñ der lo̱ par nu nac der mbecy nu ricy cup consuel lo̱, orze' gyicya̱ ñii, gun orze' gabe gyel lily ni Ñgyoozh uza̱ nu nac ya̱, i'ñ mi. 14Gyicya̱ la zi'l coz nu cyiñ der lo̱ nu nac nu ricy cup der consuel lo̱. 15’Benu de ru rca der ya̱, orze' gzuub gyidag der de coz nu rne̱e̱ nu gyicy der. 16Orze' ya̱ ne̱e̱ du̱ Ñgyoozh uza̱ nu gzeed mi tuuba' biñ nu glocyuub de ru. Nunu mi ze' cyiiñ num der tub la. 17Mi ze' Espiriit Yon, biñ nu glyuu de coz rishli ni Ñgyoozh. De mbecy nu riib ic gyishlombecy wazaan dey nu cuez mi loy. Gun wacsac dey mi. Nunu a̱' yu' lo dey mi. Tees de ru yu' lo der mi, gun mi ze' nac num de ru, nunu rcyiiñ mi nañ lardoo der. 18’Ya̱ wazeeñ ga̱ de ru ub zir nu wad cyu nu glocyuub der. Sinu yapa̱ lo der tuuba' tir. 19Nañ tub mi' zi'l tiem de mbecy ni gyishlombecy wazaca' dey ya̱. Tees de ru gzac der ya̱. Nunu par nu nac nu ya̱ cui mbaña̱, nde' nu de ru cui mbañ der. 20Ornu shuub dzi nu ya̱ yapa̱, orze' de ru gad lagy ru nu ya̱ tub zi'l naca̱ nu Ñgyoozh uza̱, nunu de ru nac nu der ya̱. Ze' ya̱ nac du̱ de ru. 21Cyu zi'l mbecy nu “O” nii ni de riidz nu ya̱ rne̱e̱, nunu gyicy yac yu niñ, yu ze' yu nu rca ya̱. Nunu cyu zi'l mbecy nu rca ya̱, Ñgyoozh uza̱ rca ga'm yu. Nunu ni' ya̱ rca̱ yu. Nunu gyicya̱ nu gad lagy yu nu nac du̱ yu. 22Orze' na Judas (reña' Judas, walab Judas Iscariote): ―Shuaan de̱, ¿lagu gyicy ru nu gad lagy de̱ ya̱, ze' wayicy ru nu gad lagy de mbecy ni gyishlombecy? 23Orze' na ga' Jesuuz: ―Cyu zi'l mbecy nu rca ya̱, yu ze' ricy yac yu nu de riidz nu rne̱e̱. Nunu Ñgyoozh uza̱ rcam yu. Nunu ya̱ nu Ñgyoozh uza̱ cha̱ de̱ loy nu cyiiñ du̱ de̱ yu. 24Cyu zi'l mbecy nu waca ya̱, de yu ze' wagyicy yac yu nu de riidz nu ya̱ rne̱e̱. Tees de riidz ne̱, nde' walab riidz nu bruu ic ya̱ zi'l, sinu nde' riidz nu bruu lo Ñgyoozh uza̱, biñ nu bzuu nez ya̱ nu yapa̱. 25’Ya̱ rne̱e̱ dela de riidz ii lo der lat nu gabee zu̱ lat der. 26Tees Espiriit Yon, biñ nu gzeed Ñgyoozh uza̱ nu glocyuub de ru nu nac ya̱, mi ze' biñ nu lyuu ni der dela coz, nunu gyicy mi nu gyeza' lagy der dela riidz nu mne̱e̱ lo der. 27’Ornu bi gya̱, orze' gzeeña̱ gyel ri zu nañ lardoo der. Gyel ri zu ni ub la̱ grica̱ ni der, nunu walab nu grica̱ ñii mod nu rbic de mbecy ni gyishlombecy ii. Cue' zaan der nu gac deet nañ lardoor, nunu cue' dzib der. 28De ru bi güeñ der nu bi mne̱e̱ nu gya̱. Tees ya̱ yapa̱ cyiiñ du̱ der tuba' tir. Bi bicy na nu de ru rca der ya̱, orze' cyit ni der ornu gad lagy ru nu ya̱ gya̱ lo Ñgyoozh uza̱, gun mi ze' gya zir zum gaze' ya̱. 29Ya̱ tiem rne̱e̱ de coz ii lo der, anzir nu gac ñii, gun orze' ornu gac ñii, cheña lagy der de coz nu mne̱e̱. 30’Ya̱ watuuñ du̱' zir der nu riidz ii, gun bi yad nuras, yu nu riib ic gyishlombecy ii. Tees yu ze' se la la cyiiñ yu par ya̱. 31Tees ni rlagy ñi nu gac, gun orze' gad lagy de mbecy ni gyishlombecy nu ya̱ rca̱ Ñgyoozh uza̱ nunu gad lagy dey nu ricya̱ de coz nu mniim lo̱. Orze' nam: ―Wes su der yaa chan, gun gruun ii ―nam.

will be added

X\