San Juan 13

1Anzir nu shuub dzi nu chu' sa' ni Pas, orze' bi gud lagy Jesuuz nu bi pshuub or nim nu ruum gyishlombecy nu gyam lo Ñgyoozh uz mi. Nunu dub laa tiem pcam de mbecy nu bicy cup consuel lom gyishlombecy ii. Nunu ni laa bicy mi gashtal pshuub la dzi nim. 2Na Jesuuz gusub mi nu gyicy mi che nu de yu nu rsya' lom. Orze' nuras bi bicy yu nu mnii too Judas Iscariote i'ñ Simo̱o̱ nu cush cyay ich mi. 3Ze' Jesuuz gud lagy mi nu Ñgyoozh briic mi fers nim nu gac gyicy mi dela coz. Nunu gud lagy mi nu lo Ñgyoozh bruum. Nunu gud lagy mi nu cush cyam nu gyam lo Ñgyoozh. 4Orze' Jesuuz wes sum ze' nu zub mi ricy mi che. Orze' bloom shab mi nu riib par ich. Orze' gush mi tub negy nu cuiigy mi dey. Orze' brim ñii nañ mi. 5Orze' bdu'm nis nañ tub casuel. Orze' brugyi' nu rgyiib mi gyi' tub ga de yu nu rsya' lom, nunu pcuiigy mi gyi' dey nu negy nu bri nañ mi ze'. 6Na ornu bdugyi Bed nu cyib mi gyi'y, orze' nay rab yum: ―Shuaan na, ¿walab gaal ru cyib ru gyi̱' ya̱? ―nay. 7Orze' na Jesuuz rab mi yu: ―Na na la wagyet lag ru cuen de coz nu ricy du̱ ru, tees par lo, orze' gyet lag ru cuen ―nam. 8Orze' na ga' Bed: ―¡Mas lac ru' ya̱ washet ica̱ nu ru cyib ru gyi̱'! ―nay. Orze' nam rab mi yu: ―Ze' benu wadiba̱ gyi'r, orze' wac gac ru mbecy ne̱ ―nam. 9Orze' na ga' Simo̱o̱ Bed: ―¡Ze' benu ni, orze' cue' nu gyi' zi'la̱ cyib ru, sinu ni' zi'l ya̱a̱ gal nu to̱o̱! ―nay. 10Orze' na Jesuuz rab mi yu: ―Cyu zi'l mbecy nu bi blaagy, yu ze' walagy ñi nu cyib yu de' zir lugaar ni cuerp niy. No maas gyi' zi'l yu rlagy ñi nu cyib yu, gun dutuub la cuerp niy bi byacaacy ñi. Ze' de ru bi byacaacy der, tees walab dela der ―nam. 11Jesuuz mniim nu walab dela dey byacaacy yu, gun bi gud lagy mi nu ca na yu nu cush cya ich mi. 12Na ornu blazh nu bdiib mi gyi' dey, orze' bzu ga'm shab mi nu riib par ich ze'. Orze' bish cya ga'm nu gusub mi lo mez tuuba' tir. Orze' nam: ―De ru, ¿a bet lag der cuen coz nu bicy du̱ der ii na? 13De ru rnii der nu ya̱ naca̱ moscuel nunu naca̱ Shuaan der. Nunu laab ni gal nu de ru rniir nu naca̱. 14Tees como ya̱ naca̱ moscuel ni der, nunu naca̱ Shuaan der, se ya̱ bdiba̱ gyi' der, nde' nu ni' de ru rlagy ñi nu cyib tub, cyib tub zi'l der gyi' losa'r. 15Nii tub mod nu blyu̱u̱ ni der, gun orze' ni' zi'l mod gyicy nu der losa'r: gal nu ya̱ bicy du̱ de ru. 16Ya̱ rishli rne̱e̱ lo der, nu ni tub la moz walab nu zily zir nac yu gaze' patro̱o̱ niy. Nunu ni tub la mbecy nu rza nu raso̱o̱ walab nu zily zir nac yu gaze' yu nu rzuu nez yu. 17Na como bi gyet lag der cuen de coz ii, orze' dzi ni der benu gyicy der gal nu ya̱ mne̱e̱. 18’Walab nu rzata̱ dela de ru, gun rad lagya̱ la na lardoo de mbecy nu bi pcui̱. Tees rlagy ñi nu gyu' niñ gal nu rniiñ lat de riidz ni Ñgyoozh ze' nu rniiñ: “Tub mbecy nu bdow nu ya̱ gyishtily, mbecy ze' cush cyay icha̱”, rniiñ. 19Ya̱ tiem ne̱e̱ de riidz ii lo der, anzir nu gac ñii, gun orze' ornu gac ñii, de ru cheña lagy der nu ya̱ naca̱ biñ nu naca̱. 20Ya̱ rishli rne̱e̱ lo der, benu ca na tub mbecy cueez yu tub yu nu gzuu neza̱ nu gyiyeeñ nuy yu, orze' ni' zi'l cueez yu ya̱ nu gyiyeeñ du̱ yu. Nunu cyu zi'l mbecy nu cueez ya̱, ni' zi'l cueez yu Ñgyoozh biñ nu bzuu nez ya̱ nu yapa̱ ―nam. 21Na ornu blazh mnii Jesuuz de riidz ze', orze' tona' la deet guc nañ lardoom. Orze' naal la mniim lo dey. Orze' nam: ―Ya̱ rishli ne̱e̱ lo der nu lat de ru gruu tub mbecy nu cush cya icha̱ ―nam. 22Orze' de yu nu rsya' lom, brugyi' nu rgüii tub, rgüii tub zi'l dey lo losa'y, gun wagad lagy dey cyu rniim. 23Cuit Jesuuz gusub ya̱, tub yu rsya' lom, nu gyicy du̱m che. Laab ya̱ yu nu dzi razañ lagy mi. 24Orze' Simo̱o̱ Bed briic yu nu gad lagya̱ nu rlagy yu nii nuy ya̱. Orze' nay: ―Bdugyi' lom ben ca na den rzat mi ―nay. 25Orze' byagaab zira̱ lo Jesuuz. Orze' mne̱e̱: ―Shuaan de̱, ¿cyu nde'? ―mne̱e̱. 26Orze' na Jesuuz: ―Ya̱ sala̱ tub la' gyishtily. Orze' yu nu grica̱ ñii ni ze' orze' yu ze' nde' ―nam. Na ornu blazh mniim de riidz ze', orze' psal mi tub la' gyishtily. Orze' briic mi ñii ni Judas, yu nu nac i'ñ Simo̱o̱ Iscariote. 27Nunu cuanzir gush Judas gyishtily ze', orze' nuras gutib ic yu nañ lardooy. Orze' na Jesuuz rab mi yu: ―Na bicy lal gua gyicy ru ca na coz nu gyicy ru ―nam. 28Tees ni tub la de yu nu nguaa lo mez ze' wangyet lag dey cuen lagu nu ni mniim gugy mi Judas. 29Gun Judas nac yu yu nu riib ic nerbid tiñ. Orze' la be de yu nu nguaa ze' mnii too dey nu Jesuuz mniim lo Judas nu cha ziiy coz nu cyiiñ par sa'. O benu walab ni, orze' nu cha leez yu la tub coz lat de mbecy zi, na dey. 30Orze' laab gush la Judas gyishtily ze'. Orze' bruuy zay. Nde' tub or bi rel. 31Na despuees ornu bi bruu Judas nu zay, orze' na Jesuuz: ―Na bi pshuub dzi ne̱ ya̱, biñ nu byac mbecy, nu gabe nu dzi lily na̱, nunu nu nac ya̱ gabe nu dzi lily na Ñgyoozh uza̱. 32Nunu benu gabe nu dzi lily na Ñgyoozh nu nac ya̱, orze' ni' zi'l Ñgyoozh gyicy mi nu gabe gyel lily ne̱ ya̱, nunu bi gyicy gyiily lam ñii. 33De ru, yu nu na gal nu na i'ña̱, walaba' nu tuñ tiem cyiiñ du̱ der. De ru yub der ya̱, tees ni' zi'l rne̱e̱ lo der na gal nu mne̱e̱ lo de mbecy Israeel: “Wac gya der ze' nu ya̱ gya̱.” 34Ya̱ gzeeña̱ tuuba' riiñ cub nu gyicy der: nu ca tub, ca tub zi'l der losa'r. Gal nu ya̱ rca̱ de ru, ni' zi'l gyicy der nu ca tub, ca tub zi'l der losa'r. 35Ze' benu de ru ca tub, ca tub zi'l der losa'r, orze' dela mbecy gad lagy dey nu de ru nac der mbecy nu rsya' lo̱ ―nam. 36Orze' na Simo̱o̱ Bed rab yu Jesuuz: ―Shuaan de̱, ¿ze' ca char? ―nay. Orze' na Jesuuz: ―Na na la wac cyid car icha̱ ze' nu ya̱ gya̱. Tees par lo gac cyid car icha̱ ―nam. 37Orze' na Bed rab yum: ―Shuaan de̱, ¿lagu wac yap ca̱ ich ru na la? ¡Ya̱ bi zu̱ la̱ ca na nu zu̱, mas gata̱ nu nac ru! ―nay. 38Orze' na ga' Jesuuz rab mi yu: ―¿A rishli gaal bi zur nu gat ru par nu nac ya̱? Ya̱ rishli rne̱e̱ lor nu anzir nu cuedz ngüel, orze' chon tir niir nu a̱' yu' lor ya̱ ―nam.

will be added

X\