San Juan 12

1Jesuuz guam Betania shuup ru' dzi anzir nu chu' sa' ni Pas. Betania ze' nu pcyiiñ Lázaro, yu nu bicy mi nu byabañ ze'. 2Orze' de mbecy nu yu' ze' bzu ye dey tub che nu gow nuy mi. Ze' Mart psaañ gya'n. Nunu gaza' Lázaro riy lat de yu nu nguaa lo mez nu gyicy che ze'. 3Orze' Li bru'ña nuñ chon gaynal gram tub lo asecy zguul nu la nardo nu tona' la ñgyup sac. Orze' pcooñ nde' gyi' Jesuuz. Orze' pcuiigy ñi asecy ze' nu gyich ic ñi. Orze' bzu laa nu zguul dutuub la nañ yu' ze'. 4Ze' zu Judas Iscariote, tub yu nu rsya' lom. Laab yu ze' yu nu bgu' Jesuuz yaa de yu nu rzi lagy lom. 5Orze' nay: ―¿Lagu wansa'y asecy zguul re nu sac i mbecy ni chon gaynal dzi? Gun orze' gad tiñ nu gric na ni de mbecy zi ―nay. 6Tees Judas ni mniiy, gun nac yu gubaan walab par nu nac nu rcay de mbecy zi. Nunu bzuy riiñ nu ri yaay nerbid nu rgu' dey tiñ ni dey. Nunu yu' nu rboo dzey tiñ ze' par ub zi'l yu. 7Orze' na Jesuuz: ―Cue' gyicy zeed ru fiñ ii, gun bi bzu lily ñii asecy ii par nu duzu cuerp ne̱ par ornu shuub dzi nu cach dey ya̱. 8Ya̱ walab nu tuñ cyiiña̱ lat der, tees de mbecy zi zaab yu' la dey lat der ―nam. 9Zigy de mbecy nu zu riiñ ni de mbecy Israeel güeñ dey nu zu Jesuuz Betania. Orze' gua dey ze' walab tub lo zi'l nu za güii dey mi sinu ni' zi'l par nu za güii dey Lázaro, yu nu bicy mi nu byabañ ze'. 10Orze' de yu zub lo ni de uz bza' lo dey nu ni' cut dey Lázaro, 11gun par nu nac yu ze' zigy de mbecy Israeel druu chu dey lo de uz par nu ricy cup dey consuel lo Jesuuz. 12Orze' tuuba' dzi de mbecy zigy nu gua sa' ni Pas güeñ dey nu bi yeed Jesuuz par Jerusaleeng. 13Orze' blag dey de yaa ya gyiñ. Orze' za cheel dey mi. Nunu rbish ti dey. Orze' na dey: ―¡Dzi ga zily nac Ñgyoozh! ¡Ñgyoozh nac num ru, biñ nu bzuu nez mi! ¡Ñgyoozh nac num ru, biñ nu nac rey ni de ub na, mbecy Israeel! ―na dey. 14Orze' guud tub bur mi' ni Jesuuz. Orze' byub mi ma gal nu rniiñ lat de riidz ni Ñgyoozh. Rniiñ: 15Cue' dzib der, mbecy nu yu' gyedz Sión. Güii der. Re yad rey ni der. Riib mi tub bur mi', rniiñ. 16Tiem ze' de yu nu rsya' lom wangyet lag dey cuen de nu nde'. Tees ornu Jesuuz bish cyam lo gyel lily nim, orze' byeza' lagy dey nu de riidz ni Ñgyoozh mniiñ nu ni zac mi nunu mniiñ nu ni gyicy nu mbecy mi. 17Na gaza' de mbecy nu bzaac ornu Jesuuz bredz mi Lázaro nu ruuy gyerbaa niy nunu bicy mi nu byabañ yu, de yu ze' mnii dey lo mbecy coz nu bzaac yu. 18Nde' nu zigy mbecy gua cheel dey mi, gun güeñ dey nu bicy mi nusuriidz ze'. 19Orze' na de mbecy fariseo rab dey losa'y: ―Na bi bzaac der nu rila wada' mod ni den. Güii der. Dela mbecy za ca dey ich yu ―na dey. 20Na lat de mbecy nu gua Jerusaleeng nu briib zily dey Ñgyoozh lat sa', lat de yu ze' ri la be mbecy griego. 21Orze' de yu ze' becha' dey lo Lip. Yu ze' nac yu tub mbecy Betsaida, tub gyedz nu ri lo yu ni Galilea. Orze' na dey rab yuy: ―De̱ ya̱ rlagy de̱ ne̱e̱ du̱ Jesuuz ―na dey. 22Orze' Lip gua niiy lo Ndrees. Orze' rup laa dey gua nii dey lo Jesuuz. 23Orze' nam rab mi dey: ―Bi rshuub tiem nu ya̱, biñ nu byac mbecy, gri̱ lo gyel lily ne̱. 24Ya̱ rishli rne̱e̱ lo der nu benu tub mbigy trig wayet lag ñi lo yu nu nit loñ, orze' laab tub zi'l mbigy nac ñii. Tees benu nit loñ, orze' cuic ñi zañ cosech. 25Yu nu rash shcab nu ricy ñi presis nu cui mbañ gyishlombecy ii, yu ze' gat yu. Tees yu nu rash shcab nu a̱' ricy ñi presis nu cui mbañ gyishlombecy ii, yu ze' gad nu cui mbañ yu tub la. 26Gun benu ca na tub mbecy rlagy yu nu gyicy yu gal nu rne̱e̱, orze' rlagy ñi nu cyid cay icha̱. Orze' ze' nu ya̱ zu̱, laaba' ze' gzuy. Nunu Ñgyoozh, uza̱, gyicy mi nu gya gzuy. 27’¡Na deet rac nañ lardo̱o̱! ¿Per la ñuu coz ne̱e̱? ¿A gne̱e̱: “Uza̱, bloo chu de coz nu gzaca̱ na”? ¡Tees laab par gyi' nde' nu yapa̱ gyishlombecy ii! 28Uza̱ bicy nu gyed gyel mbecy nir ―nam. Orze' zaab ti' nu mnii Ñgyoozh gashtal gyibaa. Orze' nam: ―Bi bicya̱ nu bruu zac gyel mbecy ne̱, nunu gyicya̱ nu gruu zac zir ñi par lo ―nam. 29Orze' de mbecy zigy nu yu' ze' güeñ dey nu zaab ti' ze'. Orze' yu' dey nu rniiy nu nde' guzii. Ze' yu' ga' dey nu mniiy nu nde' tub anc nu mnii nuy Jesuuz. 30Orze' Jesuuz nam rab mi dey: ―Walab nu nac ya̱ nde' nu zaab ti' rnii sinu par nu nac de ru. 31Na bi pshuub tiem nu gyu' bee nu dzi a̱' nap de mbecy nu yu' gyishlombecy ii. Nunu na Ñgyoozh gyicy mi gan nuras, yu nu riib ic gyishlombecy ii. 32Tees ornu caa dey ya̱ lo cruuz, orze' laab ya̱ gyicya̱ nu gyecha' dela mbecy lo̱ ―nam. 33Ni mod mniim par nu briic mi nu gad lagy dey nu lac mod gat mi. 34Orze' na de mbecy zigy ze' rab yum: ―De ub na rad lagy na nu lat de riidz ni leey ni den rniiñ nu Mesías, biñ nu ca lo cuen nu co mbañ mbecy, cui mbañ mi tub la, rniiñ. Benu ni, orze' ¿lagu rniir nu ru, biñ nu byac mbecy, caa dey ru lo cruuz, rniir? Orze' ¿ca na biñ nu byac mbecy nac ru beni? ―na de mbecy ze'. 35Orze' na ga' Jesuuz rab mi dey: ―Ya̱, biñ nu rlyuu yaa, gabee chesa̱ ru̱' sñuu la be dzi lat der. Orze' zaab za la der lat nu gabee yu' yaa gun orze' cue' gyet cow ni der. Gun de mbecy nu rded ze' nu cow wagad lagy dey ca par gash yu. 36Orze' bicy cup der consuel lo ya̱, biñ nu rlyuu yaa, lat nu gabee rdeda̱ lat der, gun orze' nac der mbecy nu rded ze' nu yu' yaa ―nam. Na ornu blazh mniim de riidz ze', bruum lat dey nunu guam pcach lom ni dey. 37Mas Jesuuz bicy mi zañ nusuriidz ily lo dey, tees wangyicy cup dey consuel lom, 38gun orze' byu' niñ gal nu pcaa Isaías, yu nu mnii por cuen ni Ñgyoozh. Orze' nay: Ñgyoozh, ¿cyu guña lagy ni de riidz nu mne̱e̱? Nunu ¿Cyu gac gyet lag cuen de coz ily nu gac gyicy ru? na Isaías. 39Nde' nu wangac ñgyeña lagy dey, gun ni' zi'l pcaa Isaías: 40Ñgyoozh nam: “Ya̱ psowa̱ urlo dey. Gun orze' cue' gac zac dey nu urloy. Nunu bicya̱ nu guton shcab ni dey. Gun orze' cue' gac gyet lag dey cuen, nis cush cya dey lo̱. Orze' gyicy napa̱ dey”, na Ñgyoozh. 41De riidz ii mnii Isaías gun bzaac yu gyel lily ni Jesuuz nunu laab mi ze' bzat yu lat de riidz nu bzeeñ yu. 42Mas ni tees zigy de mbecy zub lo ni de mbecy Israeel bicy cup dey consuel lo Jesuuz. Tees wangyicy dey nu ñgyad lagy de losa'y gun rdzib dey lo de mbecy fariseo gun dzi ga cyuu nu dey yu nañ yu' nu rsya' dey riidz ni Ñgyoozh. 43Gun dzi zir yet lagy dey nu grib zily mbecy dey gaze' nu grib zily Ñgyoozh yu. 44Orze' Jesuuz ye la mniim. Orze' nam: ―Cyu zi'l mbecy nu ricy cup consuel lo ya̱, walab ti lo ya̱ zi'l ricy cup yu consuel, sinu ni' zi'l ricy cup yu consuel lo Ñgyoozh, uza̱, biñ nu bzuu nez ya̱. 45Nunu mbecy nu rzac ya̱, ni' zi'l rad lagy yu la na biñ nu bzuu nez ya̱. 46Ya̱ yapa̱ gyishlombecy ii par nu lyu̱u̱ yaa, gun orze' dela mbecy nu gyicy cup consuel lo̱, de yu ze' wagyiyeeñ yu ze' nu cow. 47Tees cyu zi'l mbecy nu gyeñ de riidz nu rne̱e̱, ze' wazuub gyidag yuñ, walab ya̱ ne̱e̱ nu yu' falt niy. Gun walab nu yapa̱ nu ne̱e̱ nu yu' falt ni de mbecy ni gyishlombecy, sinu yapa̱ par nu gloo mbaña̱ dey. 48Yu nu walagy gac nu ya̱, nunu yu nu wayicy cuen de riidz nu rne̱e̱, de yu ze' bi zu tub coz nu gyicy ñi nu gyu' bee nu yu' falt ni dey. Gun de riidz nu ya̱ mne̱e̱, nde' gyicy ñi nu gyu' bee nu yu' falt ni dey ornu shuub dzi nu gya' lo gyishlombecy. 49Gun ya̱ walab nu rne̱e̱ por cuen ni uba̱, sinu rne̱e̱ de riidz nu mnii Ñgyoozh, uza̱, biñ nu bzuu nez ya̱ nu gne̱e̱, nunu gne̱e̱ ñii mod nu mniim lo̱. 50Nunu rad lagya̱ nu de coz nu rnii Ñgyoozh, uza̱, nde' gyicy ñi nu cui mbañ mbecy tub la. Bi güeñ der beni nu de coz nu mne̱e̱, mne̱e̱ ñii lo der gal nu pcaam ya̱ nu ne̱e̱.

will be added

X\