San Juan 11

1Bzu tub mbecy rat: yu nu la Lázaro. Yu ze' tub mbecy Betania, gyedz ze' nu rcyiiñ Li nu bily ñii Mart. 2Laab Li ze', fiñ ze' nu pcoo asecy zguul gyi' Shuaan den Jesuuz. Orze' pcuiigy ñi gyi'm nu gyich ic ñi. Fiñ ze' zan Lázaro, yu nu gurat ze'. 3Orze' rup laa deñ nu bily ñii bzeed ñi tub raso̱o̱ lo Jesuuz. Orze' na raso̱o̱ ze': ―Shuaan de̱, amig nir riib rat ñi ―na raso̱o̱ ze'. 4Na ornu güeñ Jesuuz raso̱o̱ ze', orze' nam: ―Tees güii ze' walab nu za' loñ yu tub tir zi'l, sinu gush güii ze' par nu gabe nu dzi lily na Ñgyoozh, nunu ni' zi'l par nu gabe gyel lily ne̱ ya̱, i'ñ mi ―nam. 5Na Jesuuz tona' la guzañ lagy mi Mart, gal nu bily ñii Li, gal nu Lázaro. 6Tees ornu bri raso̱o̱ nu riib rat Lázaro, orze' byeeñ mi se cyup dzi lugaar ze' nu rcyiiñ mi ze'. 7Na ornu bded cyup dzi ze', orze' nam rab mi de yu nu rsya' lom: ―Yaa ga' der gyan Judea tuuba' tir ―nam. 8Orze' na de yu nu rsya' lom: ―Masht, ¿a walab nu sa ñuu, de mbecy Israeel bicy pee dey ngoow gyita'y ru gashtal ñgyat lar? ¿Walab gaal rlagy ru gya ga'r tuuba' tir? ―na dey. 9Orze' na Jesuuz: ―¿A walab rishli nu trocyup or nde' yu' yaa nañ tub dzi? Benu ca na tub mbecy rded yu ze' nu yu' yaa, orze' waglagy gyi'y, gun rzac dey ya̱, biñ nu rbic yaa lo de mbecy gyishlombecy ii. 10Tees benu rded yu rel, orze' rlagy gyi'y, gun sac yaa nu gzac yu. 11Orze' na ga'm: ―Lázaro, amig ni den, gush pcaal yu, tees na cha̱ gun cueeña̱ yu ―nam. 12Orze' na ga' de yu nu rsya' lom: ―Shuaan de̱, benu nas yu, ¿orze' yaruuñ nu gruu nap yu shiñ? ―na dey. 13Tees riidz ni Jesuuz yaruuñ nu gut Lázaro, tees de yu nu rsya' lom guzii dey nu mniim nu nas zi'l yu. 14Orze' Jesuuz naal la mniim lo dey. Orze' nam: ―Gut Lázaro. 15Tees nu nac de ru yet lagya̱ nu saca̱ loy, gun orze' gyicy cup der consuel lo̱. Yaa der chan lo cuerp na ―nam. 16Orze' Tomaas, yu nu rnii dey cuach, nay rab yu de' zir de yu nu rsya' lo Jesuuz: ―Yaa der cha dun masht nin, gun orze' gat den tublaazh dun mi ―nay. 17Na ornu bri Jesuuz Betania, orze' briic mbecy nu gad lagy mi nu bi gut Lázaro nunu bi bza' tap dzi nu ri cuerp niy gyerbaa. 18Betania, nde' tub chon miily metr nu zet riñ nu Jerusaleeng. 19Nunu zigy de mbecy Israeel za güii dey Mart nu Li nu cuic dey consuel ni deñ nu nac nu gut zan ñi. 20Na ornu güeñ Mart nu bi zaab riidz nu bi yeed Jesuuz, orze' za cheel ñim. Tees Li byeeñ ñi yu'. 21Orze' na Mart rab ñi Jesuuz: ―Shuaana̱, bicy na nu zur ii, orze' cue' ñgyat zana̱. 22Tees rad lagya̱ nu mas na, Ñgyoozh gyicy mi la zi'l coz nu cyiñ ru lom ―naañ. 23Orze' na ga' Jesuuz rab mi Mart: ―Zan ru gyabañ yu tuuba' tir ―nam. 24Orze' na ga' Mart: ―Bi rad lagya̱ nu gyabañ ñi ornu gyabañ de añ ornu shuub dzi nu gya' lo gyishlombecy ii ―nañ. 25Orze' na ga' Jesuuz rab mi ñii: ―Ya̱ naca̱ biñ nu gyicy nu gyabañ de añ, nunu naca̱ biñ nu gyicy nu cui mbañ de mbecy. Orze' cyu zi'l mbecy nu gyicy cup consuel lo̱, mas gat yu, tees cui mbañ yu. 26Cyu zi'l mbecy nu gabee mbañ, benu gyicy cup yu consuel lo̱, orze' yu ze' rishli gaal wata'y. ¿A rzeña lagy der de nu nde' Mart? ―nam. 27Orze' na ga' Mart: ―Laab Shuaana̱, rzeña lagya̱ nu ru nac ru Mesías, i'ñ Ñgyoozh, biñ nu ca lo cuen nu cyid gyishlombecy ii ―nañ. 28Na ornu blazh mnii Mart de riidz ze', orze' bish cyañ yaañ. Orze' dze ga bredz ñi bily ñii Li. Orze' nañ: ―Masht bi yeed gaab mi nunu rbedz mi ru nu char lom ―naañ. 29Na ornu güeñ Li riidz ze', orze' lueg la wes suñ zañ lo Jesuuz. 30Ze' Jesuuz gaal zi nigul chu'm ru' gyedz, sinu gabee zum lugaar ze' nu bdzeel mi Mart. 31Na de mbecy ze' nguaay yu' Li nu rbic dey consuel niñ. Ornu bzaac dey nu dzach wes suñ zañ, orze' za ca dey ich ñi, gun mnii too dey nu zañ nu gun ñi ru' baa ni zan ñi. 32Na ornu bru'ña Li lugaar ze' nu zu Jesuuz, orze' cuanzir nu bzaac ñim, orze' bdugyiñ yee lañ yeñ gyi'm. Orze' nañ: ―Shuaan de̱, bicy na nu zur ii, orze' cue' ñgyat zana̱ ―nañ. 33Na ornu bzaac Jesuuz nu dzi ruun Li gal nu de mbecy nu bru'ña nuñ, orze' tona' la shni guc añ nim nunu gyi la byash lagy mi. 34Orze' nam rab mi dey: ―¿Ca lugaar pcach der yu? ―nam. Orze' na ga' dey: ―Shuaan de̱, da güiir ―na dey. 35Orze' biiñ Jesuuz. 36Orze' na de mbecy Israeel: ―¡Güii ñuu la! ¡Razañ lagy yu Lázaro! ―na dey. 37Tees yu' de mbecy ze' nay: ―Yu ii bicy yu nu rzac mbecy lo ca'. ¿A walab nu ñgyac ñgyicy yu tub mod nu cue' ñgyat Lázaro? ―na dey. 38Orze' Jesuuz tona' la shni guc añ nim tuuba' tir. Orze' zam ru' baa. Baa ze', nde' tub blyuu. Nunu psoow dey ru'ñ nu tub gyita' ily. 39Orze' na Jesuuz: ―Byash der gyita' re ―nam. Orze' na Mart, zan yu nu gut ze': ―Shuaan de̱, dzi bi byafert ti' gun bi rac tap dzi nu pcach de̱ ñii ―nañ. 40Orze' na ga' Jesuuz rab mi ñii: ―¿A walab bi mne̱e̱ lor, benu gyicy cup ru consuel lo̱, orze' gzac ru gyel lily ni Ñgyoozh? ―nam. 41Orze' byash dey gyita' ze'. Orze' Jesuuz bgüiim par baa. Orze' nam: ―Ñgyoozh uza̱, ya̱ drica̱ gras nir gun güeñ ru de coz nu mne̱e̱. 42Rad lagya̱ nu dub laa tiem reñ ru de riidz nu rne̱e̱, tees ya̱ ni rne̱e̱ gun nde' coz nap par de mbecy nu yu' ii, gun orze' cheña lagy dey nu ru bzuu nez ru ya̱ ―nam. 43Na ornu blazh mniim de riidz ze', orze' brish tim. Orze' nam: ―¡Bruu ze' Lázaro! Da ii ―nam. 44Orze' Lázaro bruuy, tees gabee nag yaay nu gyi'y nu negy nu ptiish dey yu gal nu bay nu mbish loy. Orze' na Jesuuz: ―Pshaagy der yu, gun orze' gac gyay ―nam. 45Zigy de mbecy nu gua nu Li, ornu bzaac dey de coz nu bicy Jesuuz, orze' bicy cup dey consuel lom. 46Tees yu' ga' mbecy bish cya dey lo de mbecy fariseo nu byoo dey rishloy de coz nu bicy Jesuuz. 47Orze' de mbecy fariseo, nu de yu zub lo ni de uz, gal nu de yu nu riib ic ni junt zub lo, orze' na dey: ―¿La ñuu coz gyicy den na? Gun mbecy ze' dzi guzañ nusuriidz ricy yu. 48Benu zaan den nu ni gyicy zir yu, orze' dela mbecy gyicy cup dey consuel loy. Orze' cyid de soldad Rom nu nit lo dey yu' yon ni den gal nu de ledz na ―na dey. 49Tees lat dey brusu tub yu nu la Caifás. Yu ze' yu nu riib ic de uz ña'n ze'. Orze' nay rab yu dey: ―De ru rila wagad lagy der. 50Ni wagad lagy der ca na nu nap zir par de ru. Nap zir nu gat tub zi mbecy par lo dela mbecy gaze' nu nit lo dela losa'n: de mbecy Israeel ―nay. 51Tees Caifás walab nu mniiy riidz nu bruu ic ub zi'l yu, sinu mniiy por cuen ni Ñgyoozh ornu mniiy nu Jesuuz gat mi par de mbecy Israeel, como nac yu yu nu riib ic de uz ña'n ze'. 52Nunu walab nu nac mbecy Israeel zi'l gut mi, sinu ni' zi'l gut mi par nu nac dela mbecy ni Ñgyoozh nu yu' dela lugaar ni gyishlombecy, gun orze' gyac se tub nac zi'l dey. 53Gush ñi nese dzi ze' nu psaap dey riidz nu cut dey Jesuuz. 54Orze' Jesuuz wanchesa ga'm suelt la lat de mbecy Israeel. Orze' bruum lo de yu ni Judea zam tub lugaar ub zi ni tub gyedz nu la Efraín. Orze' ze' pcyiiñ mi nu de yu nu rsya' lom. 55Na ornu se ñuu ga shuub dzi nu chu' de mbecy Israeel sa' ni Pas, orze' zigy de mbecy nu yu' reña' gyedz ya dey par Jerusaleeng, gun orze' gyicy dey coz nu gyicy nu gyacaacy dey par lo Ñgyoozh anzir nu chu' sa' ze'. 56Orze' brugyi' rded dey ryub yu Jesuuz, nunu rgugyi' dey lo losa'y lugaar ze' nu driib zily dey Ñgyoozh. Orze' na dey: ―¿La ñuu rnii too der? ¿A cyid yu sa' o ti wayid yu? ―na dey. 57Orze' de yu zub lo ni de uz, gal nu de mbecy fariseo, orze' mnii dey lo de mbecy ben ca na dey rad lagy yu ca zu Jesuuz. Orze' rlagy ñi cha too dey rishlo dey gun orze' cha nu dey mi pres.

will be added

X\