San Juan 10

1Orze' na Jesuuz: ―Tees ya̱ rishli rne̱e̱ nu de yu nu wayu' par gyero' ni chicyer ni shily, ze' chu'y par reña' lugaar ni chicyer, yu ze' nac yu tub gubaan, nunu nac yu mbecy a̱' nap. 2Tees yu nu rzu' par gyero' ni chicyer ni shily, yu ze' nac yu yu nu rña ma. 3Gun yu nu ca gyero' ni chicyer ze' rshaal yu ro' ze' ornu ru'ña yu nu rña de shily ze'. Orze' shily ze' reñ ma nu zaab ti'y rniiy. Orze' rbedz yu ma tub ga la ma niy nu nu la ma. Orze' rbooy ma nañ chicyer ze'. 4Na ornu bi blazh bruu dela ma, orze' yu nu rña ma rzay par lo ma. Orze' de shily ze' za ca ma ich yu gun yu' lo ma ti'y ornu rniiy. 5Tees de ma ze' wacha ca ma ich mbecy nu a̱' yu' lo ma, sinu druu chu ma loy, gun a̱' yu' lo ma ti'y, gun nac yu mbecy a̱' yu' lo ma ―nam. 6Jesuuz mniim de riidz tiily ze' lo dey, tees wangyet lagy dey cuen lac yaruuñ. 7Orze' nde' nu Jesuuz mnii ga'm tuuba' tir: ―Ya̱ rishli rne̱e̱ lo der: ya̱ na gal nu na gyero' ni chicyer ze' nu rzu' de shily. 8Dela de yu nu biid lo zir gaze' ya̱, mas mnii dey nu nac yu yu nu rña shily, guc dey gubaan, nunu guc dey mbecy a̱' nap. Tees de shily wangyicy cuen ma dey. 9Ya̱ na gal na gyero' ni chicyer ze'. De yu nu chu' gyero' ze', gruu mbañ yu. De yu ze' na dey gal nu na shily: nu rzu' ma nañ chicyer, nunu druu ga' ma, nunu rad gyizh nu row ma. 10’De gubaan ryiid yu par nu gyicy zi'l yu gubaan, nunu par nu cut yu, nunu par nu nit loy; tees ya̱ yapa̱ par nu grica̱ gyel mbañ ni der, nunu par nu gyicy cup za' la der ñii. 11’Ya̱ na gal nu na tub biñ nu nap rña shily. Ze' biñ nu nap rña shily ze', shet ic mi nu gat mi nu nac de shily ze'. 12Benu tub moz nu ryash ni nu rña de shily, ze' nde' walab fis niy, nunu shily ze' walab niy ma, ze' benu zac yu nu yad tub lob, orze' zeeñ gay de shily ze'. Gash yu carer gyay. Orze' lob ze' shet ru' ma de shily ze', nunu tush las ma de ma. 13Orze' moz ze' gruu chuy lo de shily ze', gun nu nac tiñ zi'l ricy yu riiñ, walab nu rcay de ma. 14’Ze' ya̱ naca̱ biñ nu nap rña de shily. Gal nu ya̱ yu' lo̱ de ma ne̱, nunu yu' lo ga' de ma ya̱, 15ni' zi'l Ñgyoozh uza̱ yu' lom ya̱, nunu ni' zi'l ya̱ yu' lo̱ Ñgyoozh uza̱. Nunu ya̱ shet ica̱ nu gata̱ nu nac de shily ne̱. 16Nunu yu' ga' shily ne̱: bañ nu sac lat tub nac de bañ nu yu' ii. Ni' de ma ze' rlagy ñi nu cha te̱' ma. Orze' de ma ze' zuub gyidag de ma ne̱ nunu gyac se tub nac zi'l de ma. Orze' gyac se tub zi'l ya̱ biñ nu rña ma. 17’Ñgyoozh uza̱ rcam ya̱ gun shet ica̱ nu gata̱, gun orze' cush cya̱ nu gyabaña' tuuba' tir. 18Ni tub la mbecy wac cut yu ya̱, benu wazaana̱. Tees nde' coz nu bruu nañ lardo̱o̱ ub la̱ nu shet ica̱ nu cut mbecy ya̱. Ya̱ ricy cupa̱ rishbeey nu zaana̱ nu cut mbecy ya̱, nunu ricy cupa̱' rishbeey nu gyabaña̱ tuuba' tir. Nde' riiñ nu bdu' Ñgyoozh uza̱ ya̱a̱ ―na Jesuuz. 19Orze' byac cyup nac de mbecy Israeel tuuba' tir nu nac de riidz nu mniim ze'. 20Yu' zigy mbecy nu rnii dey: ―Cue' gyicy cuen der yu, gun bicy ni nuras yu. Orze' guloc yu ―na dey. 21Tees yu' ga' mbecy nu rnii dey: ―Benu tub mbecy gyicy ni nuras yu, rila wac niiy gal nu rnii yu ii. ¿Walab gaal gac gyicy nap tub nuras urlo tub mbecy lo ca'? ―na dey. 22Na ornu pshuub tiem nu bri nu rag, orze' gu' dey tub sa' Jerusaleeng par nu gyicy dey nu gyeza' lagy mbecy tiem nu bzu chu dey yu' par nu griib zily dey Ñgyoozh. 23Orze' rded Jesuuz tub lugaar ni yu' ze' nu la coredoor ni Salomoong. 24Orze' de mbecy Israeel bri lo' la dey mi. Orze' na dey rab yum: ―Ze' ¿la be ru' tiem gyicy ru nu wad lagy de̱? Naal la mnii lo̱ de̱ tub tir zi'l benu ru nac ru Mesías, biñ nu ca lo cuen nu co mbañ de̱ ya̱ ―na dey. 25Orze' na Jesuuz rab mi dey: ―Ya̱ bi mne̱e̱ lo der, tees wancheña lagy der. De coz nu mnii Ñgyoozh nu ricya̱, nde' rlyuuñ nu naca̱ Mesías. 26Tees de ru wacheña lagy der de coz nu rne̱e̱, gun a̱' nac der shily ne̱. 27De shily ne̱ ryu' lo ma ti̱' ornu rne̱e̱. Nunu ya̱ yu' lo̱ de ma ne̱. Nunu de ma ze' ryiid ca ma icha̱. 28Gyicya̱ nu cui mbañ de ma tub la, nunu rila wanit lo de ma. Nunu se cyu la gac co za de ma ya̱a̱. 29Ñgyoozh uza̱, biñ nu briic de ma ne̱, mi ze' zily zir nac mi par de' zir mbecy. Nunu ni tub la mbecy wac co dey ma yaam. 30Ya̱ nu Ñgyoozh uza̱ tub zi'l nu nac de̱ ―nam. 31Orze' de mbecy ze' pte' ga' dey gyita' nu shet dey nim. 32Orze' nam rab mi dey: ―Bicya̱ zañ de coz nap nu bruu lo Ñgyoozh lo rgüii la der. ¿A nu nac ca na de coz ze' rgoow gyita' der ya̱? ―nam. 33Orze' na ga' de mbecy rab yum: ―Walab nu rgoow gyita' de̱ ru nu nac ca na tub coz nap nu ricy ru, sinu rgoow gyita' de̱ ru nu nac nu mnii zir ni Ñgyoozh, gun ru mbecy zi'l nac ru, tees ricy ru nu nac ru Ñgyoozh ―na dey. 34Orze' na Jesuuz rab mi dey: ―Lat de riidz nu bzeeñ Ñgyoozh ni der, Ñgyoozh nam rab mi de mbecy: “De ru nac der de ñgyoozh”, nam. 35Rad lagy den de coz nu rnii riidz ni Ñgyoozh, nu rila wagruu fals ñi. Ñgyoozh bloo lam de mbecy “De ñgyoozh”: de yu nu bri riidz nim lo. 36Ze' Ñgyoozh bzum ya̱, nunu bzuu nez mi ya̱ yapa̱ gyishlombecy ii. Benu ni, ¿lagu rnii der nu ya̱ rne̱e̱ zi̱ ni Ñgyoozh nu nac nu mne̱e̱ nu naca̱ i'ñ mi? 37Benu wagyicya̱ de coz nu bruu lo Ñgyoozh, uza̱, orze' cue' cheña lagy der de coz nu rne̱e̱. 38Tees benu ricya̱ de coz ze', mas wacheña lagy der ne̱, tees guña lagy der ni de coz nu ricya̱, gun tub tir zi'l gad lagy der nu ya̱ tub zi'l naca̱ du̱ Ñgyoozh, uza̱, nunu Ñgyoozh, uza̱, tub zi'l nac mi nu ya̱ ―nam. 39Orze' tub tira' ngulagy dey ngu' yaay mi nu ñgya nu dey mi pres. Tees blam yaa dey zam. 40Orze' Jesuuz bish cyam za ga'm tub la' ga' ru' gyoow Jordaang. Orze' pcyiiñ mi ze'. Ze' lugaar nu gusa Waa briib nis yu mbecy anzir. 41Zigy mbecy bde' dey lom. Orze' na dey: ―Waa wangyicy yu ni tub la nusuriidz, tees dela coz nu mniiy nu nac mbecy ii, nde' coz rishli ―na dey. 42Orze' zañ mbecy bicy cup dey consuel lo Jesuuz lugaar ze'.

will be added

X\