1 Nese anzir nu gya gyishlombecy, biñ nu la riidz ni Ñgyoozh nil bi zum. Mi ze' nac num Ñgyoozh, nunu nac mi Ñgyoozh. 2 Nunu nil bi zum nu Ñgyoozh nese anzir nu gya gyishlombecy. 3 Dela coz nu psa' lagy Ñgyoozh, mi ze' bicy mi ñii. Nunu ni tub la coz wansa' lagy Ñgyoozh benu walab nu nac mi ze'. 4 Mi ze' nac mi biñ nu rbic gyel mbañ nu rishli. Nunu gyel mbañ ze' nañ gal nu na tub yaa nu ricy ñi nu gyal shcab ni de mbecy. 5 Ze' yaa ze' bzu laañ ze' nu cow, nunu de ze' nu cow ze' rila wangyicy ñi gan nu nsoow ñi lo yaa ze'. 6 Bzu tub mbecy, yu nu bzuu nez Ñgyoozh. Yu ze' lay Waa nu driib nis mbecy. 7 Biid yu par nu cuic yu nu gad lagy de mbecy nu cyu biñ nu na gal nu na yaa ze', gun orze' de yu nu gzuub gyidag de riidz nu niiy, orze' de yu ze' gyicy cup dey consuel lom nu nac de riidz nu mniiy. 8 Yu ze' walab biñ nu na gal nu na yaa ze', sinu Ñgyoozh bzuu nez mi yu biid yu par nu cuic yu nu gad lagy mbecy cyu nac mi ze'. 9 Gun biñ nu nac yaa nu rishli ze' bi yad mi par nu cuic mi nu gad lagy dela mbecy. 10 Laab biñ nu la riidz ni Ñgyoozh ze' brim gyishlombecy. Nunu mas Ñgyoozh psa' lagy mi dela coz ni gyishlombecy nu nac mi, tees de mbecy ni gyishlombecy wangyu' lo dey mi. 11 Brim ledz mi tees de mbecy nu yu' ledz mi wannii dey “O” nim. 12 Dela mbecy nu “O” mnii nim nunu bicy cup dey consuel lom, orze' de yu ze' briic mi mod ni dey nu gyac yu i'ñ Ñgyoozh. 13 Walab nu byac dey i'ñ Ñgyoozh par nu gul dey ni tub biñ mñaa, nunu walab nu byac dey i'ñ Ñgyoozh par nu nac coz nu rlagy ca na tub mbecy, sinu byac dey i'ñ Ñgyoozh gal nu ub mi bicy mi. 14 Nunu biñ nu la riidz ni Ñgyoozh ze' byac mi mbecy gyishlombecy, nunu pcyiiñ mi lat den. Nunu tona' la gugy nam num de ub na. Nunu rniim dub ub la coz rishli. Nunu de ub na bi bzaac na gyel lily nim, gyel lily nu yad ñi nu gad ni biñ nu tub zi zu ni uz. 15 Waa bzat yum. Orze' ye la mniiy: ―Mi ze' biñ nu bzata̱ ornu mne̱e̱ lo der nu biñ nu yad par icha̱ gya zir zum gaze' ya̱, gun mi ze' nil bi zum anzir nu gal ya̱ ―nay. 16 Par nu nac nu dzi gugy nam, zaab nap la ricy num de ub na. 17 Gun briic Ñgyoozh leey ni den nu nac Moisees. Ze' nu nac Jesuuz, nap ricy num de ub na nunu blyuum de coz rishli nim lo den. 18 Ni tub la mbecy wacsac dey Ñgyoozh. Tees i'ñ mi, biñ nu tub zi zu nim, nac num mi. Mi ze' briic mi nu gad lagy na la nam. 19 Nii de coz nu mnii Waa ornu de fushtiz ni de mbecy Israeel bzuu nez dey de uz gal nu la be de mbecy nu bruu lat nez Levita nu yu' Jerusaleeng nu cha dey cugyi'y lo Waa. Orze' na dey rab yu Waa: ―¿Cyu nac ru? ―na dey. 20 Orze' Waa naal la mniiy lo dey cyu nac yu. Orze' nay: ―Ya̱ walab Mesías, biñ nu ca lo cuen nu co mbañ mbecy ―nay. 21 Orze' bdugyi' ga' dey loy: ―¿Ze' cyu gaal nac ru beni? ¿A walab Elías, yu nu mnii por cuen ni Ñgyoozh, nac ru beni? ―na dey. Orze' na ga' Waa: ―Walab yu ze' naca̱ ―nay. Orze' na ga' dey: ―¿A walab ru yu nu rnii por cuen ni Ñgyoozh nu ca lo cuen nu cyid? ―na dey. Orze' na Waa: ―Walab ―nay. 22 Orze' na ga' dey: ―¿Cyu nac ru beni? Gun rlagy ñi nu gya du̱ de̱ raso̱o̱ lo deyu nu bzuu nez de̱ ya̱ nu yapa̱. ¿Cyu nac ub ru? Mnii beni ―na dey. 23 Orze' na Waa rab yu dey: ―Ya̱ naca̱ tub mbecy, tub yu nu bzat Isaías, yu nu mnii por cuen ni Ñgyoozh ornu nay: “Zaab ti' tub mbecy rbish tiy tub lugaar ub zi. Orze' nay: Bicy nap der nañ lardoor gal nu ricy nap der tub nez nu ded tub yu lily, gun bi cyid Shuaan den”, na Isaías ―na Waa. 24 Na de yu nu bzuu nez de mbecy fariseo nu gua tugyi'y lo Waa, 25 orze' na dey rab yu Waa: ―Ze' benu a̱' nac ru Mesías, biñ nu ca lo cuen nu co mbañ mbecy, ni a̱' nac ru Elías, ni a̱' nac ru yu nu rnii por cuen ni Ñgyoozh, ze' ¿lagu rbic ru nu zu nis mbecy beni? ―na dey. 26 Orze' na Waa rab yu dey: ―Ya̱ driib nisa̱ mbecy nu nis, tees lat de ub na zu tub mbecy nu a̱' yu' lo der. 27 Mi ze' cyid mi par lo ya̱, tees ya̱ wangyapa̱ nu shaagya̱ ni gyid nu zub gyid lab mi ―nay. 28 Dela de coz ii guc ñi tub lugaar ni tub gyedz nu la Betania, par tub la' ga' ru' gyoow Jordaang. Nde' lugaar ze' nu driib nis Waa de mbecy. 29 Na tuuba' dzi orze' bzaac Waa Jesuuz nu yad mi loy. Orze' nay: ―Güii der, re yad tub mbecy nu na gal nu na tub shily nu gac gun lo Ñgyoozh. Mi ze' cyib mi cyi de mbecy nu yu' gyishlombecy. 30 Mi ze' biñ nu bzata̱ lo der ornu ya̱ mne̱e̱: “Biñ nu yad par ich ya̱, gya zir zum gaze' ya̱, gun mi ze' nil bi zum anzir nu gal ya̱”, mne̱e̱. 31 Wangad lagya̱ cyu nac mi, tees ya̱ yapa̱ nu griib nisa̱ mbecy nu nis gun par nu cu' lo de mbecy Israeel mi cyu nac mi ―nay. 32 Nii riidz nu mnii Waa ornu nay: ―Ya̱ bzaaca̱ Espiriit Yon ni Ñgyoozh nam gal nu na tub begy bet mi. Bruum gal gyibaa. Gusub mi too mi ze'. 33 Ya̱ gabee wangyu' lo̱m cyu nac mi. Tees Ñgyoozh, biñ nu bzuu nez ya̱ nu griib nisa̱ mbecy nu nis, nam rab mi ya̱: “Ornu gzac ru nu gyet Espiriit Yon ne̱ too tub mbecy, orze' mi ze' biñ nu cuic Espiriit Yon ze' ne̱ ni de mbecy”, nam. 34 Ya̱ bi bzaaca̱ de coz ze'. Nde' nu ya̱ naca̱ teshtig nu mi ze' nac mi i'ñ Ñgyoozh ―na Waa. 35 Na orze' tuuba' dzi, orze' Waa laab lugaar ze' zuy nu cyup de yu nu rsya' loy. 36 Na ornu bzaac yu nu bded Jesuuz, orze' nay: ―Güii der. Re rded tub mbecy nu na gal na tub shily nu gac gun lo Ñgyoozh ―nay. 37 Na ornu güeñ cyup de yu nu rsya' loy de riidz ze', orze' za dey za cay ich Jesuuz. 38 Orze' Jesuuz bish cyam, nunu bzaac mi nu yad dey. Orze' nam rab mi dey: ―¿La coz ryub der? ―nam. Orze' na dey rab yum: ―Masht, ¿ca rcyiiñ ru? ―na dey. 39 Orze' na Jesuuz rab mi dey: ―Yaa der chan gun cha güiir ca rcyiiña̱ ―nam. Orze' gush nez dey za nuy mi. Orze' bzaac dey ca rcyiiñ mi. Orze' byeeñ nu dey mi gua la nu gudze ze', gun bi yu'n tub gyiib tap or gudze ornu bri num dey ze'. 40 Tub de yu nu güeñ ni Waa, yu nu gua ca ich Jesuuz, lay Ndrees bicy yu Simo̱o̱ Bed. 41 Orze' lueg la gua yub yu bicy yu Simo̱o̱. Orze' nay rab yuy: ―De̱ ya̱ bi bdzeel de̱ Mesías, bin nu ca lo cuen nu co mbañ den ―nay. (Mesías, nde' tub zi'l yaruuñ nu Crisht.) 42 Orze' lueg la za nuy Simo̱o̱ lo Jesuuz. Orze' Jesuuz mbi la bgüiim loy. Orze' nam rab mi yu: ―Ru lar Simo̱o̱ i'ñ Waa. Tees na loo la̱ ru Cefas. (Cefas nu Bed tub zi'l nu yaruu riidz ze'. Nde' gyita'.) 43 Na tuuba' dzi, orze' Jesuuz mnii ic mi gyam tub lugaar ni Galilea. Orze' ze' bdzeel mi Lip. Orze' nam rab mi yu: ―Da, da ca icha̱ ―nam. 44 Na Lip nac yu tub mbecy gyedz nu la Betsaida. Laab ze' ledz Ndrees nu Bed. 45 Orze' Lip guay gua yub yu Natanael. Na ornu bdzeel yuy, orze' nay rab yuy: ―Na bi bdzeel de̱ biñ nu bzat Moisees lo de gyicy ze' nu ca leey ni Ñgyoozh. Laab mi ze' biñ nu bzat de yu nu mnii por cuen ni Ñgyoozh. Mi ze' Jesuuz i'ñ See. Ze' ledz mi, nde' Nazaret ―na Lip. 46 Orze' na ga' Natanael: ―¿Walab gaal gac gruu ñuu la coz nap gyedz Nazaret? ―na Natanael. Orze' na Lip rab yuy: ―Da güiir ben a walab ―nay. 47 Na ornu Jesuuz bzaac mi nu byagaab Natanael lom, Orze' nam: ―Güii, ii yad tub mbecy nu rishli gaal nac mbecy Israeel, tub yu nu sac gyel rguu nañ lardoo ―nam. 48 Orze' Natanael bdugyi'y lom: ―¿Lac bicy ru? ¿Lagu nu gud lagy ru lac mbecy na̱? ―nay. Orze' na Jesuuz rab mi yu: ―Ya̱ bzaaca̱ ru lat nu gusub ru gyi' yalas anzir nu cuedz Lip ru ―nam. 49 Orze' na Natanael rab yum: ―Masht, ru nac ru i'ñ Ñgyoozh. Ru nac ru rey nu nac Shuaan de mbecy Israeel ―nay. 50 Orze' Jesuuz nam rab mi yu: ―¿A ricy cup ru consuel lo̱ nu nac zi'l nu mne̱e̱ nu bzaaca̱ ru nu gusub ru gyi' yalas? Coz ily zir gzac ru par lo gaze' coz nu bzaac ru na ―nam. 51 Orze' na ga'm rab mi dey: ―Ya̱ rishli rne̱e̱ lo der nu gzac der nu gyal gyibaa, nunu gzac der nu chup gyet la de anc ni Ñgyoozh lo̱ ya̱, biñ nu byac mbecy ―nam.
