Santiago 5

1¡Na de ru mbecy guani'ñ bzuub gyidag der ne̱! ¡De ru gun der, nunu cush ti der nu nac de gyel zi nu gzac der! 2De gyel nap ni der bi rtop ñi, nunu de shab der bi row bigyich ñi. 3De or gal nu de plat ni der bi driib guul ñi. Nunu guul ze', nde' tub teshtig nu shiñ ricy der. Nde' tub coz nu nit loñ der gal nu ricy gyi nu tub la coz. Na ornu bi rlazh tiem, orze' cyaañ der gyel nap nir. 4Nunu ni wangyabic der i de yu nu bicy riiñ nir, de yu nu rte' cosech ni der. Nunu nde' zañ contr ni der. Nunu Shuaan na, biñ nu riib ic de anc zigy, reñ mi ornu de yu nu bicy riiñ ni der ze' rgu' cyiy de ru lom nu nac riiñ nu bicy dey nir. 5Gyishlombecy ii tona' la zu baa der nunu ricy der gusht nir. Nunu bicy re'ñ der ub ru gal nu ricy re'ñ dey tub chigud nu cut yu. 6Rnii der nu yu' falt ni de mbecy nu sac falt ni, nunu rut der dey. Ii se la la coz bicy dey ornu gut yu. 7Nde' nu der bicy na, bicy cup der pase̱z gashtal cyid la Shuaan na. Bdu' cuen der mod nu ricy mbecy nu rnuuz la coz. Nu pase̱z rbez yu nu te'y cosech nu dzi sac. Nu loga la rbez yu nu pase̱z nu gri gyey loga. Niga rbeza'y nu gri gyey cyup. 8Orze' ni rlagy ñi nu gyicy cup der pase̱z. Cue' shi'ñ der baloor, gun bi shuub dzi nu cyid Shuaan den tuuba' tir. 9Der bicy na, tub ga la der walagy ñi nu nii deet ru nu nac de losa'r, gun orze' Ñgyoozh waniim ti yu' falt ni der. Tees Ñgyoozh, biñ nu gri bee ni mbecy, bi yad shuub dzi nu ru'ñam. 10Der bicy na, pcaa ic der de yu nu psaa raso̱o̱ ni Shuaan den, de yu nu mnii por cuen nim gulas, gun orze' gad lagy der lac mod gyicy ru. Benu rlagy der gad lagy ru lac mod gagyer ornu gzac zir, orze' bdu' cuen der lac mod gugyee dey ornu bzac ziy. 11De ru rad lagy der nu de ub na ricy na de mbecy nu ragyee ornu rzac zi par tub mbecy nu dzi ni. Bi rad lagy der nu Job gugyeey ornu bzac ziy. Rad lagy der lac mod bicy nu Ñgyoozh yu. Nunu rad lagy der nu Shuaan den dzi gushni lagy mi yu. Nunu nap bicy num yu. 12Der bicy na, mod nu ricy zir ñi presis, benu nii der tub coz lo losa'r, cue' zat der ni tub la coz par nu gabe nu rishli gal nu rnii der. Cue' zat der gyibaa. Ni cue' zat der gyishlombecy. Ni cue' zat der ni tub la coz. Tees benu laab ni rlagy der niir, orze' laab ni niir. Nunu benu walab ni rlagy der niir, orze' walab ni niir. Gun orze' Ñgyoozh waniim ti yu' falt ni der. 13¿A yu' mbecy lat der nu dzi rzac zi dey? Orze' rlagy ñi nu cyiñ yu lo Ñgyoozh. ¿A yu' mbecy lat der nu zu cyit lagy yu? Orze' rlagy ñi nu gul yu nunu gyabicy yu gyel mbecy nim. 14¿A yu' mbecy rat lat der? Orze' rlagy ñi nu cuedz dey de yu bel nu zu riiñ lat de mbecy ni Crisht. Orze' cyiñ dey lo Ñgyoozh nu nac yu rat ze'. Nunu coo dey asecy tooy. Orze' nii dey lo Shuaan den nu gyicy yac mi yu. 15Orze' nu nac nu gyicy cup dey consuel lo Ñgyoozh lat nu cyiñ yu lom, orze' yu rat ze' gyac yu. Nunu Ñgyoozh gyicy yac mi yu. Nunu gyicy sulagy mi de cyiy. 16Orze' tub ga la der bicy caacy der cyir lo losa'r. Nunu tub ga la der bdiiñ der lo Ñgyoozh ni losa'r. Nunu ornu tub mbecy nap cyiñ yu lo Ñgyoozh nu dutuub la lardooy, orze' tona' la coz ily gyicy ñi. 17Elías, tub yu nu mnii por cuen ni Ñgyoozh, guc yu tub mbecy gal nu na de ub na. Na ornu bdiiñ yu lo Ñgyoozh nu dutuub la lardooy nu cue' gyet gyey, orze' gyey wangyet ñi lugaar ze' chon ña'n nu. 18Na despuees ornu bdiiña'y lo Ñgyoozh, orze' brugyi' ga' nu yet gyey, nunu yu briic ñi cosech. 19Der bicy na, benu rusu tub mbecy lat der nu ruu chuy lo de coz rishli, nunu benu tuuba' mbecy gyicy yu nu cush cya ga'y lo coz rishli, 20orze' bi neñ der nu cyu zi'l mbecy nu gyicy yu nu mbecy cyi zaan yu de coz a̱' nap nu ricy yu, nunu orze' cush cyay lo Ñgyoozh, orze' yu nu ni bicy ze' gyicy yu nu gruu mbañ mbecy cyi ze', nunu gyicy yu nu gyicy sulagy Ñgyoozh dela cyiy.

will be added

X\