Santiago 4

1¿Ca druu de gyel yuu, gal nu de gyel deet nu yu' lat der? Druuñ lat de coz a̱' nap nu ricy gyel yuu nañ lardoo der. 2Rlagy der nu gad la coz nir, tees wagad ñi ni der. Orze' rzu lily der nu cut ru losa'r. Rzaab lagy der la coz, tees wagad ñi ni der. Orze' rucoo der, nunu rtub su losa' der. Wagad coz nu rlagy der, gun wacyiiñ der ñii lo Ñgyoozh. 3Nunu mas rgyiiñ der ñii lo Ñgyoozh, tees wagyicy mi gal nu rnii der lom, gun rgyiiñ ton der. Rgyiiñ der coz nu yet zi'l lagy der. 4¡A̱ mbecy wagyicy paa! ¿A wagad lagy der nu benu yet lagy ru de coz a̱' nap nu ricy mbecy ni gyishlombecy, orze' yac losa' yuu der Ñgyoozh? Cyu zi'l mbecy nu rlagy gac amig ni de coz ni gyishlombecy, yac losa' yuuy Ñgyoozh. 5¿Walab gaal rnii too der nu se la la sac riidz ni Ñgyoozh ze' nu rniiñ: “Ñgyoozh tona' la rcam espiriit nu brim nañ lardoo den, nunu se par ub zi'l mi rlagy mi ñii”, rniiñ? 6Tees Ñgyoozh faboor ily zir ricy num de ub na gal nu rniiñ lat de riidz nim: “Ñgyoozh zam contr ni de mbecy le', tees ricy mi faboor num de yu nu ricy gyel gyidz ni”, rniiñ. 7Orze' “O” mnii der ni Ñgyoozh. Gua der contr ni nuras, gun orze' ruu chuy lo der. 8Becha' der lo Ñgyoozh. Orze' Ñgyoozh gyecha' ga'm lo der. Gal nu ricy der ornu rgyiib ru yaar, ni bdiib der de coz cyi nu ricy ru, de ru mbecy cyi. ¡Bicy der nu gyacaacy lardoor, de ru mbecy nu ricy cyup ic! 9¡Bicy shni der! ¡Bzu der rishsulagy! ¡Biiñ der! ¡Lugaar nu gyigy der, orze' biiñ der! ¡Lugaar nu yet lagy der, bicy shni der! 10Bicy gyidz der ub ru lo Ñgyoozh, gun orze' gyicy mi nu gyac der mbecy nu gya zu. 11Der bicy na, tub ga la der walagy ñi nu nii zi der ni losa'r. Nunu walagy ñi nu nii der nu yu' falt niy. Yu nu rnii zi ni bicy o yu nu rnii nu yu' falt ni bicy, orze' yu ze' rnii ziy ni leey ni Ñgyoozh, nunu rniiy nu yu' falt niñ, gun wacsuub gyidag yu niñ. Benu rniiy nu yu' falt ni leey, orze' yu ze' walab tub yu nu rzuub gyidag niñ, sinu tub yu nu rnii nu yu' falt niñ. 12Tees tub zi Ñgyoozh briic mi leey, nunu tub zi lam gac niim nu yu' falt ni den. Tub zi lam gac co mbañ mi, nunu tub zi lam gac nit lom. Ze' de ru, ¿cyu guc ru par nu niir nu yu' falt ni losa'r? 13Na bzuub gyidag der ne̱, de ru mbecy nu rnii: “Dzi na o ina chan ca na gyedz. Ze' cyiiñ den tub ña'n. Gyicy den dalje̱z. Gyicy den gan tiñ”, rnii der. 14Tees wagad lagy der la coz zac ru ina. De ru na der gal nu na za nu ta' baa. Nañ tub miiñ zi'l gruu zac ñi nunu nañ tub miiña' zi'l bi mniit ñi. 15Coz nu rlagy ñi nu nii der, orze' i niir: “Benu Shuaan den rlagy mi, orze' cui mbañ na. Orze' gyicy na nii o nde”, nii der. 16Tees na ricy der gyel le' nir, nunu rnii der nu dzi coz ily ricy ru. Nde' rila a̱' nap nu ni mod rnii der. 17Mbecy nu rad lagy nu gyicy coz nap, ze' wagyicy yu, yu ze' ricy yu cyi.

will be added

X\