Santiago 3

1Der bicy na, walagy ñi nu dzi zañ der gac ru moscuel, gun bi rad lagy der nu ya̱ nu de moscuel ta zir gyicy nu Ñgyoozh de̱ ornu gri beem ne̱ de̱. 2Dela den zañ tir radzan. Benu tub mbecy wagadzay nu nac de riidz nu rniiy, orze' yu ze' sac la falt niy. Gac gyub ic yu dutuub la cuerp niy. 3Gyicy pee lan gal tub cuay, ornu zuun fren ru' ma. Orze' nap gyeñ ma. Orze' gac lyuun ni ma ca zi'l ze' nu galagy na cha dun ma. 4O gyicy pee lan gal nu ricy tub barc. Coz ily nac ñii, nunu bi ily rzuub yaañ ñi. Tees nu nac tub timo̱o̱ mi', orze' yu nu rsaañ gac cha nuy ñi ca zi'l ze' nu galagy yu. 5Ni' zi'l rzac de ub na nu lyuudz na. Nde' tub lugaar mi' ni cuerp ni den, tees tona' la coz ily gac gyicy ñi. Gush der shcab nu nac tub gyi mi'. Gac caañ gyi tub la ngush ily tona' la. 6Lyudz na nañ gal nu na gyi. Tona' la coz a̱' nap nac ñii nu ricy cup cuerp ni den. Gnuuñ dutuub la cuerp ni den. Nunu gashtal gabily rad baloor niñ. Dzi coz ily ricy nuñ den dub laa lat nu mbañ naa: nese lat nu gumiiñ na gashtal gat lan. 7Mbecy bi ricy dey gan de lo la bañcyug. Bi ricy dey gan bañ gyish. Bi ricy dey gan chigyiñ. Bi ricy dey gan de bañcyug nu rga' nañ lo yu. Nunu bi ricy dey gan bel nu yu' lo nis. 8Tees rila wagyicy dey gan lyudz yu. Nde' nañ gal nu na tub coz a̱' nap nu dza laa nañ ñi yu' benen par nu cut ñi. 9Nu lyudz den ryabic na gyel mbecy ni Ñgyoozh, Uz den. Nunu laab nu lyuudz na rzaa lagy na ni losa'n, de yu nu psa' lagy Ñgyoozh nu na gal nu na ub mi. 10Nunu laab nu ru' den ryabic na gyel mbecy ni Ñgyoozh. Nunu laab nu ru' den rzaa lagy na ni losa'n. Rup laa coz ze' druuñ laab tub zi'l ru'n. Nde' rila walab se'ñ der bicy na. 11Rila sac tub lugaar nu driib nis nu tub se' zi'l grib cyup lo nis: laab ze' nu grib nis ish, nunu laab ze' grib nis lya. 12Der bicy na, tub yalas wac cuic ñi uugy ni ya oliva. Nunu tub lyucy urbyay wac cuic ñi uugy ni yalas. Ni' zi'l tub zo, ze' nu yu' nis ri' wac cuic ñi nis ish. 13¿A ruu su tub mbecy lat der nu yu' shcab niy nunu siñ tooy? Orze' rlagy ñi nu gyicy yu nu gabey nu ni nay nu nac de coz nap nu ricy yu. Orze' gyicy yu gal nu ricy tub mbecy shni. 14Tees benu zaan der nu cheti gyel saap lagy nañ lardoor, nunu benu nu nac ub zi'l der zu bich ru, orze' walagy ñi gyicy der nu nac ru tub mbecy nu dzi yu' shcab ni. Orze' za der contr ni de coz rishli. 15Gun shcab ze', nde' walab shcab nu druu lo Ñgyoozh, sinu nde' shcab ni gyishlombecy zi'l ii. Nde' shcab nu yu' nañ lardoo mbecy, nunu shcab nu druu lo nuras. 16Gun ze' nu rasaap lagy mbecy, nunu ze' nu rzu bich mbecy nu nac ub zi'l yu, lugaar ze' yu' coz deet. Nunu de lo la coz a̱' nap rac ze'. 17Ze' de yu nu ricy cup shcab nu druu lo Ñgyoozh nu loga la rzu' dey nu gyel cacy. Niga gac yu mbecy nu rzu' nu gyel ri zu. Nunu gac yu mbecy gugy na. Nunu gac yu mbecy nu “O” rnii nu de' zir losa' nu nap rnii. Nunu rashni lagy dey losa'y. Nunu ricy dey coz nap. A̱' nac dey mbecy nu rcui losa'. Nunu a̱' nac dey mbecy nu ricy cyup ic. 18Nunu de yu nu ricy rishnap nu losa', yu ze' ricy yu nu rzu' gyel ri zu lat dey. Orze' nde' ricy ñi nu rzu' dey mod nu rlagy Ñgyoozh.

will be added

X\