Hebreos 9

1Nu nac trat loga la, yu' mod nu briib zily mbecy Ñgyoozh. Nunu bzub tub yu' negy gyishlombecy ii. Ze' briib zily dey mi. 2Yu' ze' ricy cup ñi cyup cuart. Cuart loga la, nde' bloo la dey ñi Lugaar Yon. Ze' zub tub candeler ily nu tub mez. Ze' nguaa gyishtily nu bzu chu dey par Ñgyoozh. 3Na par ich tub ro' negy ca tuuba' cuart. Orze' cuart ze' bloo la dey ñi Ze' nu Blazha' Zir Lugaar Yon. 4Ze' zu tub mez or par nu zaay dey yaal. Nunu ze' zub gyiñ ni trat nu bicy nu Ñgyoozh dey. Gyiñ ze' briily dey or dutuub lañ. Nañ gyiñ ze' ri tub casit or. Ze' nañ ñi yu' maná, coz nu bdow dey lat nu gusay lugaar ub zi. Nunu laab nañ gyiñ ze' ri yanga Aroong nu briib i'ñ ich ze'. Nunu laab nañ gyiñ ze' ri cyup gyita' nu pca leey ni Ñgyoozh. 5Ze' par too gyiñ ze' zub cyup nab ni tub lo mbecy nu yu' gyibaa nu la Querubines. Nab ze', nde' muesht ni gyel lily ni Ñgyoozh. Nunu ptiily lowe'ñ par nu soow ñi lugaar ze' nu ricy sulagy Ñgyoozh cyi mbecy. Tees na wac shaal de̱ lac zu dela coz ze'. 6Na ornu bi zu lily de coz ze', orze' de uz nu zu riiñ lo Ñgyoozh zaab za la dey nañ cuart loga ze' par nu za' lo dey riiñ nu bi cay. 7Tees tub zi la uz nu rzu' lo Ñgyoozh por cuen ni de mbecy, tub zi la yu ze' gac chu'y nañ cuart cyup ze'. Nunu yu ze' tub tir zi gac chu'y nañ cuart ze' nañ tub ña'n. Rza nuy reñ nu rbic yu lo Ñgyoozh nu nac de cyiy, gal nu nu nac de cyi mbecy. 8Na Espiriit Yon ni Ñgyoozh rbic mi nu gad lagy den nu lat nu gabee zu uz riiñ nañ cuart loga ze', orze' wac chu' mbecy nañ cuart cyup ze', ze' nu blazha' zir lugaar yon. 9Mod nu ricy dey nañ yu' ze', nde' ricy ñi nu yet lag den cuen mod nu rac nu de ub na. Orze' yaruuñ nu de gun nu rbic mbecy lo Ñgyoozh tiem ze', gal nu de bañcyug nu rut dey lom, de nde' wac gyicy nap ñi lardoo mbecy, gun gabee wac chu' dey nañ cuart cyup ze'. 10De uz ze' tub lo zi'l cuen ni dey ni de coz row mbecy zi'l, gal nu ni de coz nu ro' zi'l dey. Cuen ni dey nu lac mod gyicy caacy yu de coz. Nunu de riiñ nu ricy de yu ze', nde' tub lo zi'l nu cyiiñ ñi gal tiem nu bruu zac tub mod cub. Orze' gya' lo de coz nu ricy de uz ze'. 11Tees na Crisht bi biid mi. Byac mi uz nu rzu' lo Ñgyoozh por cuen ni den. Ricy mi de coz nap nu rzac den na. Yu' nu zum riiñ nañ ze', nde' coz nap zir, nunu coz nu cyiiñ zir gaze' yu' nu bzu de uz riiñ nañ ze'. Nunu yu' ze', walab mbecy bzaay ñi. Nde' walab coz ni gyishlombecy ii. 12Ornu Crisht gu'm nañ cuart nu blazha' zir yon ze', orze' wancha num reñ chiib, ni reñ biser par nu cuic mi lo Ñgyoozh, sinu reñ ub lam gua num. Orze' gu'm tub tir zi'l nu nac dela mbecy, nunu bicy mi nu gac gruu mbañ den tub la. 13Gun gyishlombecy ii rbic dey reñ chiib, nunu rbic dey reñ tor, nunu rtush las dey di'ñ terner too de mbecy nu a̱' caacy, gun orze' gyicy caacy dey yu. 14Benu ni, orze' ¡dzi zir coz ily ricy reñ Crisht! Gun nu nac Espiriit nu zu tub la, orze' Crisht briic mi ub mi par tub gun nu rila sac falt ni. Nunu nu nac reñ mi, orze' gyicy mi nu wat den lo Ñgyoozh nu nac de coz to' lo nu bicy den, de coz nu gyicy nu yad ñi nu gat den, gun orze' gyicy den coz nu rlagy Ñgyoozh mbañ. 15Nde' nu Crisht nac mi biñ nu bzu trat cub. Nu nac nu gut mi, orze' guud mod par nu gyicy sulagy Ñgyoozh de cyi nu bicy de mbecy nu byub ic trat loga ze'. Nunu gut mi, gun orze' de mbecy nu bzum nu gac nim zeeñ mi gyel nap nu rila waded ni yaa dey, gal nu mnii Ñgyoozh nu segur la gyicy mi. 16Na benu tub mbecy gyicy yu tub trat nu rniiñ lac mod gyicy nu dey de coz nu yu' niy ornu gat yu, orze' rlagy ñi cuic de famil niy nu gad lagy de mbecy nu bi gut yu anzir nu gyicy dey gal nu rniiñ lo trat ze'. 17Tees wagyicy dey gal nu rniiñ lo trat ze' lat nu gabee mbañ yu nu bzu trat ze'. Sinu ornu bi gut yu, orze' gyicy dey gal nu rniiñ lo trat ze'. 18Nde' nu trat nu bicy Ñgyoozh nu loga la, bzu nap dey ñi nu nac nu pshu reñ. 19Gun Moisees blab yu dela coz nu mnii leey ze' lat de mbecy zigy. Gaze' nu gush yu tub nac gyich ña shily, nunu gush yu tub yaa yag nu la hisopo. Orze' psal yu nde' lo reñ chiib, nu lo reñ biser nu gu' can nu nis. Orze' pcooy nde' lo gyicy ni leey, nunu pcooy ñi lat de mbecy zigy. 20Orze' nay rab yu dey: “Nii reñ nu gyicy nu chesu nap trat ni Ñgyoozh, trat nu bzum nu gyicy yac der”, nay. 21Ni' zi'l mod pcoo Moisees reñ ich yu' yon ze', nunu pcoo ga'y reñ ze' lo de yuu nu nguaa nañ ñi. 22Gun par lo leey sñuu ga la gac dela coz yacaacy ñi nu nac reñ. Nunu Ñgyoozh rila wayicy sulagy mi ni de mbecy benu washu reñ. 23De coz ze', nde' nab de coz gyibaa. Tees ni mod rlagy ñi gyacaacy ñi. Na de coz rishli nu yu' gyibaa dzi zir gun ily rlagy ñi niñ. 24Gun Crisht wanchu'm nañ tub yu' yon nu bzaa mbecy. Yu' yon nu bzaa mbecy ze', nde' tub nab de coz rishli gyibaa. Tees Crisht ub la gyibaa gu'm. Ze' zum lo Ñgyoozh por cuen ni de ub na. 25Na uz nu zu riiñ lo Ñgyoozh por cuen ni de mbecy Israeel, yu ze' rzu'y nañ cuart ze' nu blazha' zir lugaar yon. Tub ña'n ga rzu' nuy reñ bañcyug ze'. Tees Crisht wancuic mi ub mi par tub gun lo Ñgyoozh nu zañ tir gal nu bicy de yu ze'. 26Gun benu ni, orze' rlagy ñi nu zañ tir gat mi nese nu bzub gyi' gyishlombecy. Tees na, ornu sñuu ga gya' lo tiem, orze' bruu sac mi tub tir zi'l par dela mbecy. Briic mi ub mi par tub gun lo Ñgyoozh par nu za' lom cyi de mbecy. 27Na dela mbecy rlagy ñi nu gat dey tub tir zi'l, nunu despuees orze' gri bee Ñgyoozh ni dey. 28Nunu ni' Crisht tub tir zi'l briic mi ub mi par tub gun lo Ñgyoozh par nu bza' lom cyi zigy mbecy. Orze' despuees gruu zac mi tuuba' tir, nunu nde' walaba' nu za' lom cyi de mbecy, sinu par nu co mbañ mi de mbecy nu rbez nu cyid mi.

will be added

X\