Hebreos 8

1Na coz nu ricy zir ñi presis nu nii den, nde' nu zu tub uz nu rzu' lo Ñgyoozh por cuen ni de ub na. Nunu mi ze' nam gal nu bi mne̱e̱. Na zub mi par yaa bee Ñgyoozh gyibaa. 2Zum riiñ nañ tub yu' yon nu rishli, tub yu' nu wansaa mbecy nu yaay, sinu coz nu bzaa Ñgyoozh. 3Na dela uz nu zu riiñ ze' bdugyi dey riiñ ze' par nu cuic yu gun lo Ñgyoozh, nunu par nu cut dey bañcyug nu shuy reñ ma lom. Nde' nu ni' zi'l rlagy ñi nu Jesucrisht cuic mi gun lo Ñgyoozh. 4Benu gyishlombecy ñcyiiñ mi, orze' wac gyicy mi riiñ ze', como par nde' bi yu' de uz nu rbic gun lo Ñgyoozh mod nu rnii leey ni Moisees. 5Ornu rzu dey riiñ ze', orze' rboo nab dey coz nu rac gyibaa. Ricy dey de coz ze' gyishlombecy ii gal nu na tub sheñ zi de coz rishli nu rac gyibaa. Rad lagy den nu nab zi'l nde' ricy dey, gun ornu Moisees bi zuu lay nu zaay yu' yon ze', orze' Ñgyoozh nam rab mi yu: “Bzu cuidad ornu gzaar ñii. Gal mod nu na nab ñii nu bzaac ru ornu blyu̱u̱ lor too bicy ze', ni na gzaar”, nam. 6Ze' Crisht zum tub riiñ nu gya zir zu par riiñ nu zu de' zir uz. Ni' zi'l trat nu bloom nu rniiñ nu lac gyicy nu Ñgyoozh den, nde' tub trat nu nap zir par trat gush ni leey, gun riidz ni trat cub, riidz nu mnii Ñgyoozh nu segur la gyicy mi, nde' riidz nu nap zir gaze' riidz ni trat gush. 7Benu cue' ñgyu' falt ni trat nu loga la nu bicy nu Ñgyoozh de mbecy, orze' walagy ñi tuuba' trat. 8Tees Ñgyoozh byap mi falt ni de mbecy nim. Orze' mniim: Shuaan den nam: Shuub dzi nu zu̱ tub trat cub lat de mbecy Israeel nu lat de mbecy Judá. 9Reña' mod nañ par trat nu bicy du̱ de gyitoo bel ni dey tiem nu blo̱o̱ dey lo yu ni Egipto ornu ya̱a̱ du̱ dey. Tees wangyicy yac dey trat ne̱. Orze' ya̱ blaa ya̱a̱ dey, na Shuaan der. 10Orze' na ga'm: Mod nu za trat nu gyicy du̱ de mbecy Israeel: Ornu shuub dzi ze', ya̱ gyicya̱ nu caa ic dey de riidz nu rne̱e̱. Gyicya̱ nu gad lagy dey ñi. Ya̱ naca̱ Ñgyoozh ni dey, nunu de yu ze' gac dey mbecy ne̱. 11Ni tub la mbecy walagy ñi nu lyuuy ni losa'y. Ni walagy ñi nu lyuuy ni bicy yu nu niiy: “Rlagy ñi nu chu' lor Shuaan den”, niiy, gun dela mbecy chu' lo dey ya̱. Dela mbecy shni, nunu gashtal dela mbecy lily, se tub ru' la chu' lo dey ya̱. 12Nunu ya̱ gyicy sulagya̱ dela cyi nu bicy dey. Nunu rila wayeza' ga' lagya̱ ñii, nam. 13Ornu bzat mi tub trat cub, orze' bicy mi nu trat loga ze' par tub trat nu bi bded ni. Nunu benu bi guush ñi, benu bi bded niñ, orze' sñuu ga nit loñ.

will be added

X\