Hebreos 7

1Na Melquisedec, yu ze' rey ni tub gyedz nu la Salem. Nunu yu ze' tub uz nu zu riiñ lo Ñgyoozh, biñ nu zily zir nac. Na Abraham guay tub gyel yuu. Biit yu de rey nu riib ic. Orze' bish cyay yay. Na nez nu yay, orze' Melquisedec gua cheel yuy. Orze' Melquisedec bdiiñ yu lo Ñgyoozh nu nap gyicy num yu. 2Orze' Abraham briic yu tub ga coz lo tii de coz nu bicy yu gan lat gyel yuu ze' ni Melquisedec. Riidz Melquisedec, riidz ze' yaruuñ: Rey nu sac cyi. Ni yaruuñ. Nunu riib ic yu tub gyedz nu la Salem. Como riidz Salem, nde' yaruuñ: Gyel ri zu, nde' nu ni' nac yu: Rey nu rbic gyel ri zu. 3Rlyu nu sac uz Melquisedec. Nunu sac ñaay. Rlyu nu sac la de gyitoo bel niy. Rlyu nu sac tiem nu gul yu. Rlyu nu sac la tiem nu gut yu. Nay gal nu na I'ñ Ñgyoozh, gun zaab zu lay riiñ lo Ñgyoozh rlyu. 4Orze' na gad lagy der nu dzi zily nac Melquisedec. Mas gashtal Abraham, gyitoo bel ni den, briic yu tub ga coz lo tii de coz nu guud niy lat gyel yuu ze' nu ganiy. 5De uz nu zu riiñ lo Ñgyoozh ni de mbecy Israeel, de uz ze' nac dey nez Leví. Orze' por leey la rgyiiñ dey tub ga de coz lo tii de coz lo de mbecy Israeel. Rte' dey de coz ze' lat losa'y, mas ni' ub yu nac yu nez Abraham. 6Ze' Melquisedec mas walab nez Leví guc yu, tees gush yu tub ga coz lo tii de coz ni Abraham. Nunu bdiiñ yu lo Ñgyoozh nu nap gyicy num yu. Nunu Abraham guc yu mbecy nu mnii Ñgyoozh lo nu segur la nap gyicy num. 7Segur la yu nu cyiñ lo Ñgyoozh nu nap gyicy num losa', yu ze' zily zir nac yu gaze' losa'y nu zac lo gyel nap ze'. 8Tees lat de ub na, de mbecy nu rgyiiñ tub ga coz lo tii coz, de yu ze' nac dey mbecy nu gat. Ze' Melquisedec, riidz ni Ñgyoozh rniiñ nu yu ze' nay gal nu na tub mbecy mbañ. 9De nde' yaruuñ nu ornu briic Abraham tub ga coz lo tii de coz, orze' ni' zi'l bicy Leví, gal nu de nez yu, mas de yu ze' rgyiiñ dey tub nac ga tiñ lo tii nac ñii ni de mbecy Israeel. 10Ni yaruuñ mas Leví nigul gal yu ornu ni bicy Abraham. Gun nañ cuerp ni Abraham bi ri mbigy yu nu byac Leví. Ri mbigy ze' nañ cuerp niy ornu bdzeel yu Melquisedec. Orze' ni' Leví briic yu tiñ ni Melquisedec lat nu riy nañ cuerp ni Abraham. 11Ñgyoozh briic mi leey ni de mbecy Israeel nu nac de nez Leví, de uz nu zu riiñ lom. Benu riiñ nu zu de nez Leví, benu nde' beñ par nu gyanap mbecy lo Ñgyoozh, orze' walagy ñi nu ndruu sac tuuba' mbecy nu dugyi laaba' riiñ nu bdugyi Melquisedec, tub yu nu dugyi riiñ nu reña' na par riiñ nu bdugyi Aroong. 12Gun ornu rdza mod nu zu uz riiñ lo Ñgyoozh, orze' ni' zi'l rlagy ñi nu dza ga' leey. 13Nunu Shuaan den, biñ nu rzat riidz ni Ñgyoozh ii, mi ze' reña' nez mi, walab nez Leví. Nunu lat nez mi ze' nigul gruu sac ni tub uz nu gzu riiñ lo Ñgyoozh. 14Gun dela mbecy rad lagy dey nu mi ze' nac mi nez Judá. Nunu Moisees wansat yu nez Judá ornu mniiy ca na mbecy gac yu riiñ nu gac yu uz. 15Orze' naal la rad lagy den nu bdza mod nu ricy Ñgyoozh, gun bruu zac tub mbecy nu zu riiñ ni uz, tub mbecy nu na gal nu na Melquisedec. 16Mi ze' walab nu zum riiñ ze' nu nac tub leey nu rniiñ ca na nez mbecy rlagy ñi nu gzuy riiñ ze', sinu byac mi biñ nu zu riiñ ze' nu nac nu ricy cup mi tub mod par nu cyiiñ mi tub la. 17Gun lat de riidz ni Ñgyoozh ze' rniiñ, ornu nam: Ru dugyir riiñ nu zu uz nu cyid ru lo̱ por cuen ni de mbecy tub la. Nunu ya̱ zu̱ ru laaba' riiñ nu bzu̱ Melquisedec, rniiñ. 18Orze' mod ni Leví bya' loñ, bded niñ, gun wancyiiñ ñi. 19Gun leey nu bzeeñ Moisees wangac ñgyicy ñi nu ñgyanap mbecy par lo Ñgyoozh. Nde' nu na drish lo den lo tub coz nu nap zir. Nu nac nde' gac gyecha' den lo Ñgyoozh. 20Nunu ornu Ñgyoozh mniim nu dugyi Jesucrisht riiñ ze', orze' bzat mi ub mi par nu gabe nu segur la gyicy mi ñii. 21Ornu de' zir mbecy bdugyi dey riiñ lom, orze' Ñgyoozh wansat mi ub mi. Tees Ñgyoozh bzat mi ub mi, ornu bdugyi Jesuuz riiñ ze'. Ni rnii de riidz nim: Shuaan den mniim, nunu bzat mi ub mi par nu gabe nu segur la gac ñii. Nunu rila wadza shcab nim. Orze' nam: “Ru dugyir riiñ nu gac ru uz nu chu' lo̱ por cuen ni de mbecy par tub la”, nam, rniiñ. 22Nde' nu Jesuuz ricy mi nu rad lagy den nu trat nu ricy Ñgyoozh nu de ub na, nu nde' segur la. Nde' trat nap zir gaze' trat nu bicy mi num de mbecy nu loga la. 23Nunu tuuba' coz. Dela de' zir uz nu zu riiñ lo Ñgyoozh, zigy dey nac yu, gun zaab rat la dey. Orze' tub gay wagac zu tuñ yu riiñ. 24Tees Jesuuz mbañ mi tub la. Nunu waruum riiñ nu zum par nu chu' tuuba' mbecy lom. 25Nde' nu na, gal nu par dub laa tiem gac co mbañ mi de mbecy nu gyecha' lo Ñgyoozh nu nac mi. Ni ricy mi, gun zum tub la par nu rnishbaam lo Ñgyoozh nu nac de mbecy. 26Orze' Jesuuz, mi ze' zum riiñ lo Ñgyoozh dub gal mod nu galagy ñi ni den. Nac mi biñ Yon. Sac la falt nim. Ni sac cyim. Mi ze' tub biñ nu a̱' nac nu de mbecy shiñ ricy. Gya zir zum gaze' de' zir mbecy gyibaa. 27Wagyicy mi gal nu ricy de' zir de uz nu rza lo Ñgyoozh por cuen ni de mbecy. Gun de yu ze' de dzi la rlagy ñi cuic dey gun lo Ñgyoozh. Nu loga la cuic dey gun par de cyi ub yu. Despuees gaze' nu cuic dey gun par cyi de mbecy. Ze' Jesuuz tub tir zi'l briic mi gun par dela mbecy ornu briic mi ub mi. 28Yu' uz nu zu riiñ nu rzu' dey lo Ñgyoozh por cuen ni de mbecy dub gal mod nu rnii leey ni Moisees. Tees de yu ze' nac dey mbecy wancyiiñ. Tees despuees ornu biid leey ni Moisees, Ñgyoozh bzum I'ñ mi nu gac mi uz nu chu' lom. Nunu bzat mi ub mi ornu bzum I'ñ mi. Orze' na I'ñ mi byac mi biñ nu ricy riiñ nu briic Ñgyoozh nim tub la.

will be added

X\