Hebreos 6

1Nde' nu rlagy ñi nu ded lo den lo de riidz a̱' biigy ni Crisht, nunu rlagy ñi nu gac den mbecy nu gul shcab ni. Walagy ñi nu gnii ga' den de riidz nu bi bdulyuu nese nu loga la. Ni cue' ga' nii den nu rlagy ñi nu ne' mbecy de cyi nu ricy yu, de cyi nu gyicy nu gat yu. Ni cue' ga' nii den nu rlagy ñi nu gyicy cup mbecy consuel lo Ñgyoozh. 2Ni cue' ga' lyuu den nu nac nu zu nis mbecy. Ni cue' ga' lyuu den nu nac nu riib yaa mbecy too losa'y. Ni cue' ga' lyuu den nu gyabañ de mbecy nu bi gut. Ni cue' ga' lyuu den ni nu gri bee Ñgyoozh ni de mbecy. Dela nde' nac ñii coz a̱' biigy ni Crisht. 3Rlagy ñi nu ded lon lo de coz ze'. Benu Ñgyoozh zaan mi, orze' ni gyicy den. 4- 6Gun yu' mbecy nu bi gulas bet lag dey cuen de coz ni Crisht. Bi gud lagy dey la na de coz ni Ñgyoozh. Bi yu' lo dey Espiriit Yon nim. Bi gud lagy dey de coz nap nu rnii riidz nim. Bzaac dey nu ricy mi de coz ily gal nu gyicy mi de tiem nu yad par lo. Mbecy ze', benu gruu chu dey lo de coz ni Crisht, orze' rila waca' gyanap shcab ni dey par nu gac dey mbecy nim tuuba' tir. Gun nde' nañ gal nu na nu rcaa dey Crisht, I'ñ Ñgyoozh, lo cruuz tuuba' tir. Orze' ricy dey nu to' lo zum lo dela mbecy tuuba' tir. 7De mbecy ze' na dey gal nu na yu nu rzayo' nis gyey ornu yet tub poras gyey loñ. Benu yu ze' cuic ñi tub cosech nu cyiiñ ni de mbecy nu ricy riiñ loñ, orze' Ñgyoozh nap gyicy num ñii. 8Tees benu yu ze' cuic ñi gyish nu gyech, orze' se la la cyiiñ ñi. Orze' Ñgyoozh zaa lagy mi niñ. Nunu ornu gya' lo tiem, orze' ca gyiñ. 9Der bicy na nu dzi rca̱ de̱, mas ni mod rne̱e̱ du̱ de̱ de ru, tees rad lagy de̱ nu segur la gzac der lo de coz ily nu gad nir nu nac nu gruu mbañ der. 10Gun Ñgyoozh ricy mi mod nu se'ñ. Wanit lagy mi de riiñ nim nu bicy der nu nac nu rcar mi ornu blocyuub der de bicy ru nu nac Crisht. Nunu mas na gabee rlocyuub der dey. 11Coz nu rlagy de̱, nde' nu tub ga la de ru zaab co lo zir der gashtal gya' lo la tiem. Gun orze' dela coz nu rgyish lo der lo gac ñii. 12Walagy de̱ nu gyac der mbecy zed, sinu rlagy de̱ nu gyicy der gal nu ricy de mbecy nu ricy cup consuel. Bicy der gal nu ricy de mbecy nu bicy cup pase̱z, gun nu nac nu ni ricy dey, orze' dela coz nu mnii Ñgyoozh nu cuic mi ni dey, dela nde' gyiyeeñ ñi yaa dey. 13Ornu Ñgyoozh mniim lo Abraham, orze' bzat mi ub mi par nu gabe nu segur la gyicy mi gal nu mniim. Como saca' zir mbecy nu zily zir nac gaze' ub mi, orze' bzat mi ub mi. 14Orze' nam: “Ya̱ ne̱e̱ lor nu segur la nap gyicy du̱ ru, nunu segur la gyicya̱ nu gyañ de nez ru nu chu' par lo”, nam rab mi Abraham. 15Orze' Abraham bicy cup yu pase̱z. Orze' Ñgyoozh bicy mi gal nu mniim. 16Na benu tub mbecy rniiy nu segur la gyicy yu tub coz, orze' zat yu tub mbecy nu zily zir nac gaze' ub yu. Nde' nu benu tub su dey losa'y nu riidz, orze' rzat dey mbecy ze'. Orze' gya' loñ ni dey. 17Nde' nu Ñgyoozh rlagy mi nu naal la gad lagy de mbecy nu mniim nu nap gyicy num de mbecy ze', nunu rila wadza mod nu rlagy mi gyicy mi num dey. Nde' nu bzat mi ub mi par nu gabe nu segur la gyicy mi gal nu mniim. 18Orze' Ñgyoozh bicy mi cyup coz. Mniim nu ni gyicy mi. Nunu bzat mi ub mi par nu gabe nu ni gyicy mi. De nde' coz nu rila wac dza. Nunu Ñgyoozh waguum. Ni bicy mi, gun orze' de ub na, mbecy nu cha lom par nu ñam den, de ub na gric na baloor par nu gzu fert den nu nac de riidz nu drish lo den lo. 19Nunu de riidz nu drish lo den lo ze', nde' nañ gal nu na tub gyiib ye ni barc par nu cue' guul bi barc par re par ii la. Orze' nde' ricy ñi nu rzu fert den nañ lardoon. Riidz ze', nde' ricy ñi nu gac chu' den lo Ñgyoozh. Nde' nañ gal nu na nu gac ded den ro' negy nu zaab nañ yu' nu driib zily de mbecy Israeel Ñgyoozh. Orze' chu' den nañ yu' yon zir par de' zir lugaar. 20Jesuuz bi ya gam par lugaar yon ze' por cuen ni den. Mi ze' byac mi uz nu zu riiñ lo Ñgyoozh por cuen ni de ub na. Nde' nu laaba' riiñ nu bzu Melquisedec, laaba' riiñ ze' bdugyim. Na riiñ ze' ricy mi tub la.

will be added

X\