Hebreos 5

1Zu tub riiñ. Nde' tub riiñ nu rzu' tub uz lo Ñgyoozh por cuen ni mbecy. Uz nu rdugyi riiñ ze' druuy laab lat mbecy zi'l. Orze' rac yu uz nu rbic de lo la gun lo Ñgyoozh nu nac de cyi mbecy. 2Ze' uz nu rdugyi riiñ ze' ni' wacyiiñ yu. Nde' nu ricy cup yu pase̱z nu de mbecy nu wagad lagy, gal nu de mbecy nu radza. 3Nunu gyi' nu nac yu mbecy waccyiiñ, nde' nu walab tub lo zi'l nu rbic yu gun nu nac cyi ub yu, sinu ni' zi'l rbica'y gun nu nac cyi dela mbecy. 4Na ni tub la mbecy wac gzuy ub yu riiñ ze', sinu Ñgyoozh zum yu gal nu bzuu ga'm Aroong. 5Ni' zi'l Crisht wansum ub mi riiñ ze', sinu Ñgyoozh bzum mi gal nu nam: Ru I'ña̱. Dzi na ya̱ ne̱e̱ nu ru biñ nu nac I'ña̱, nam. 6Tuuba' lugaar lat de riidz nim nam: Ru dugyir riiñ nu zu uz. Orze' cyid ru lo̱ por cuen ni de mbecy tub la. Nunu ya̱ zu̱ ru laaba' riiñ nu bzu̱ Melquisedec, nam. 7Lat nu gusa Crisht gyishlombecy ii, orze' fert la brish ti num Ñgyoozh nunu shni mnii num mi, gun mi ze' biñ nu gac co mbañ ub mi, gun orze' cue' nu gat mi. Tees gun “O” mniim ni Ñgyoozh, nde' nu bzuub gyidag Ñgyoozh riidz nu mniim. 8Crisht, mas nac mi I'ñ Ñgyoozh, tees byac mi mbecy nu bzuub gyidag nu nac nu bzac zim. 9Na ornu bya' lo riiñ nu biid mi gyishlombecy ii, orze' byac mi biñ nu rboo mbañ de mbecy nu rzuub gyidag. 10Orze' Ñgyoozh bzum Crisht riiñ nu zu uz nu rzu' lom por cuen ni de mbecy. Nde' nu laab riiñ nu bzum Melquisedec, laaba' riiñ ze' bzum Crisht. 11Yu' zañ riidz nu rlagy ñi ne̱e̱ de̱ nu nac de coz ze'. Tees dzi biigy par nu shaal de̱ lo der, gun dzi gyee gyet lag der cuen. 12Bi bicy na nu ñgyac der, bi nac der moscuel na, tees gabee rlagy ñi nu dulyuu ni der tuuba' tir de riidz nu bi bdulyuu ni der nu loga la nu nac Ñgyoozh, gun tanta' nu waccyiiñ der. Na der gal nu na tub mbecy nu ro' lech lugaar nu gow der coz cyigy. 13Cyu zi'l mbecy nu ro' ga ub lech zi'l, yu ze' nay gal nu na tub mdoo. Yu ze' wagyet lag yu cuen la na de coz nap nu gyicy den. 14Ze' de coz cyigy, nde' par nu gow de mbecy gush. De yu ze' rad lagy yu ca na coz nap, gun bi gubeey nu rcuiy la na coz nap, nunu la na de coz a̱' nap.

will be added

X\