Hebreos 4

1Na Ñgyoozh gabee ricy yac mi de riidz nu mniim ze'. Riidz ze', nde' nu gac zac den lo gyel rzu lagy nim. Tees rlagy ñi gyicy cuidad den, gun nis ruu su tub mbecy lat den nu wayicy yu gan nu wazac yu loñ. 2Gun ni' de ub na bi reñ den de riidz nu sac nim gal nu güeña' de yu ze'. Par de yu ze' se la la pcyiiñ ñi ni dey mas güeñ dey ñi, gun mas güeñ dey ñi, tees wancheña lagy dey niñ. 3Tees de ub na nu nac nu rzeña lagy den, orze' gzac na lo gyel rzu lagy nim. Orze' gac ñii gal nu mniim: Ya̱ guzi lagya̱ lo dey, nunu mne̱e̱ nu rila wazac dey lo gyel rzu lagy nu rica̱, nam. Ni mniim mas bi rad gyel rzu lagy nim ni dey, gun Ñgyoozh nese nu bzub gyi' gyishlombecy bi bza' lom riiñ nu bicy mi. 4Gun lat ca na tub nac riidz nim rniiñ nu nac sab dzi nu rzu lagy mbecy: Dzi gagy Ñgyoozh bzu lagy mi, gun bza' lom dela riiñ nim, rniiñ. 5Mas bi rad ñi, tees wansac dey loñ, gun lat de riidz nim rniim: Ñgyoozh nam: Rila wazac dey lo gyel rzu lagy nu rica̱, nam. 6Tees gabee ricy falt ru' nu gzac mbecy lo gyel rzu lagy nim. De mbecy nu güeñ loga la de riidz nim wansac dey loñ, gun wansuub gyidag dey nim. 7Nu nac nde', orze' Ñgyoozh bzum tuuba' tiem nu bloo lam Dzi Na. Na ornu bi bza' zañ ña'n nu gut de mbecy ze', orze' bzat mi tiem ze' lat de riidz ni Dabi. Orze' nam: Benu dzi na reñ der riidz nu rne̱e̱, orze' cue' gyicy cyigy lardoo der, nam, na de riidz nim. 8Benu Josué ñgya nuy de mbecy Israeel lo gyel rzu lagy nim, orze' wazata'm tuuba' tiem ze'. 9Nde' nu rad ru' gyel rzu lagy nim ni de mbecy nim. 10Gun de mbecy nu zac lo gyel rzu lagy nim, de yu ze' gzu lagy dey ni de riiñ nu ricy yu gal nu Ñgyoozh bzu lagy mi ni de riiñ nu bicy mi. 11Nde' nu rlagy ñi nu gyicy den tub fers nu zac den lo gyel rzu lagy nim. Walagy ñi nu zuub yaan de riidz nu mniim gal nu bicy de mbecy ze', gun benu ni, orze' ni' wayicy den gan. 12Gun riidz ni Ñgyoozh, nde' tub coz nu zaab cyiiñ la. Nde' tub coz nu dzi coz ily ricy. Dzi zir nap ricy ñi par tub mandzicy nu rup chu la' la ru' ri'ñ. Nu nac riidz ze' nap rzac den gashtal nañ lardoon. Lo riidz ze' naal la rniiñ de coz nu yu' nañ shcab nin. Nunu naal la rniiñ de coz nu rlagy den gyicy na nañ lardoon. 13Ni tub la coz wac cach loñ lo Ñgyoozh. Dela coz naal la rad lagy mi, nunu lo mi ze' dela mbecy rlagy ñi nu zeed cuen dey. 14Na zu tub biñ lily, biñ nu nac uz nu zu riiñ ni den. Mi ze' Jesuuz, I'ñ Ñgyoozh. Mi ze' rzam lo Ñgyoozh por cuen ni de ub na. Nde' nu rlagy ñi nu gzu fert den nu nac de riidz ni Crisht nu guña lagy na. 15Gun biñ nu zu riiñ ni den ze', mi ze' gac gashni lagy mi de ub na nu nac nu wacyiiñ den, gun ni' guc de lo la preb mi gal nu rzac de ub na na la. Nomaas mi ze' rila wangyicy mi cyi. 16Orze' na dub gusht la, walagy ñi nu dzib lagy den gyecha'n ze' nu zub Ñgyoozh biñ nu riib ic de ub na. Mi ze' gashni lagy mi den, nunu nap gyicy num den, nunu locyuub mi de ub na tiem nu galagy ñi.

will be added

X\