Hebreos 3

1Nde' nu der bicy na, de ru mbecy nu bi bzu chu Ñgyoozh nu gac nim, gush der shcab nu nac Jesucrisht. Mi ze' biñ nu bzuu nez Ñgyoozh, nunu mi ze' uz nu rzu' lom por cuen ni de ub na dub gal mod nu rnii de riidz nu ricy cup den consuel lo. 2Jesuuz bicy paam nu Ñgyoozh, biñ nu bicy nu zum riiñ ze'. Bicy paam gal nu bicy paa Moisees nu nac riiñ nu bicy yu nañ yu' wedz ni Ñgyoozh. 3Yad ñi ni Jesuuz nu dzi zir ca lagy mbecy lom gaze' Moisees, gun zily zir nac mbecy nu rzaa tub yu' gaze' ub la yu' nu ryaa ze'. 4Na dela yu' rlagy ñi tub mbecy nu zaay ñi. Tees Ñgyoozh psa' lagy mi dela coz. 5Na Moisees, yu ze' tub moz nu bicy paa nañ yu' ni Ñgyoozh. Bzat yu de coz nu gniim par lo. 6Tees Crisht, como nac mi I'ñ Ñgyoozh, orze' mi ze' ricy paam ornu riib ic mi nañ yu' nim. Ze' de ub na na den gal nu na yu' ze' nim benu gzu fert den, nunu benu zu cyit lagy den nu nac de coz nu drish lon lo. 7Nde' nu rlagy ñi nu gyicy cuidad den gal nu rnii Espiriit Yon ni Ñgyoozh lat de riidz nim. Ñgyoozh nam: Dzi na, benu gyeñ der de riidz nu rne̱e̱, 8Orze' cue' gyicy cyigy lardoo der gal nu bicy de mbecy nu bish cya̱ icha̱, de yu nu bicy preb ya̱ lat nu gusa dey lugaar ub zi. 9Lugaar ze' bicy de gyitoo bel ni der preb ya̱. Ni bicy dey mas bzaac dey de coz nu bicya̱ lat cyuu ña'n. 10Nde' nu ya̱ guzi lagya̱ lo de mbecy nu gu' tiem ze'. Ya̱ mne̱e̱ nu dub laa tiem radza dey. Nunu wangalagy dey ñgyet lag yu cuen mod nu ya̱ rlagya̱. 11Nde' nu ya̱ guzi lagya̱, nunu ya̱ mne̱e̱ lo dey nu rila wazac dey lo gyel rzu lagy nu grica̱, nam, rniiñ lat riidz nim. 12Orze' der bicy na, bicy cuidad der nis gac der mbecy a̱' nap, nis gac der mbecy nu wagyicy cup consuel, gun orze' nu nac nde', dzi ga gruu chu der lo Ñgyoozh mbañ. 13Lugaar nu gyicy der nde', orze' tub ga la der briic der baloor ni losa'r de dzi la lat nu gabee gad tiem, gun orze' ni tub la der wadzar nu nac de coz cyi, nunu wayacyigy lardoo der. 14Gun Crisht nac num den benu wayecan nu gyicy cup den consuel lom gashtal gat lan, benu gyicy cup den consuel lom gal nu bicy den nu loga la. 15Nde' nu rnii riidz ni Ñgyoozh ornu nam: Dzi na, benu reñ der riidz nu rne̱e̱, orze' cue' gyicy cyigy lardoo der gal nu bicy de mbecy nu bish cya icha̱, nam, rniiñ. 16¿Cyu de mbecy nu güeñ de riidz nu mnii Ñgyoozh ze', na despuees orze' bish cya dey ich mi? ¿A walab nde' de mbecy nu bloo Moisees lo de yu ni Egipto? 17¿Cyu lo guzi lagy Ñgyoozh lat de cyuu ña'n ze'? ¿A walab lo de mbecy nu bicy coz cyi, de yu nu gut lugaar ub zi ze'? 18Ornu Ñgyoozh mniim nu rila wazac dey lo gyel rzu lagy nu cuic mi, ¿cyu nu rzat mi ze'? ¿A walab de yu ze' de mbecy nu wansuub gyidag nim? 19Orze' rad lagy den nu wansac de mbecy ze' lo gyel rzu lagy nu rbic mi nu nac nu wangyicy cup dey consuel lom.

will be added

X\