Hebreos 2

1Nde' nu rlagy ñi nu nap caa ic den de riidz nu bi reñ na gun nis ruu chu den loñ. 2Gun de riidz nu bzeeñ de anc ze', bi rad lagy den nu nde' coz rishli. Nunu cyu zi'l mbecy nu wangyicy yac ni de riidz ze', o cyu zi'l mbecy nu wansuub gyidag ni riidz ze', orze' za dey lo cashtig gal nu rlagy ñi. 3Benu ni, orze' ¿lac mod gruu chu den lo cashtig benu wayicy cuen den de riidz nu rniiñ nu lac ñuu mod gruu mbañ naa? Gun riidz ze' tona' la ricy ñi presis. Gun laab Shuaan den nu loga la pshaal mi de riidz ze'. Orze' despuees de mbecy nu gueñ de riidz ze' briic dey nu gad lagy den nu de riidz ze', nu nde' coz rishli. 4Ni' zi'l Ñgyoozh bicy mi nu gad lagy den nu laab nde' coz rishli. Ni bicy mi nu nac nu briic mi muesht, nu nac nu bicy mi de coz par nu cha nu ic mbecy, nunu nu nac nu bicy mi zañ lo nusuriidz. Nunu ni' zi'l bicy mi ornu bicy mi nu bicy Espiriit Yon nim nu cyiiñ tub ga la mbecy nu gyicy yu tub ga riiñ nim. Ni bicy Espiriit nim dub gal nu rlagy ub mi. 5Gun Ñgyoozh wangyicy mi nu gyub ic de anc gyishlombecy tiem nu yad par lo. Nde' gyishlombecy nu rzat den na. 6Sinu ricy mi gal nu rniiñ lat ca na tub riidz nim ornu rniiñ: Ñgyoozh, ¿la yad ñi ni de mbecy nu gyicy cuen ru dey? Nunu ¿La yad ñi ni dey nu gzur shcab nu nac yu? 7Ru bicy ru nu gash zir zu dey gaze' de anc par ñuu miiñ tiem. Tees bicy ru nu lily na dey. Bicy ru nu byaraso̱o̱ dey. 8Bicy ru nu riib ic yu dela coz, rniiñ. Na ze' nu rniiñ nu bicy mi nu riib ic mbecy dela coz, orze' wancam ni dey nu wac gyub ic yu ca na de coz. Tees na nigul zac den nu riib ic mbecy dela coz. 9Ze' Jesuuz, rad lagy mi nu ñuu miiñ zi tiem bzu Ñgyoozh mi tub mod nu gash zir par mod nu na de anc, gun orze' nu nac faboor nu bicy nu Ñgyoozh den, nde' nu gut Jesuuz nu nac dela mbecy. Nunu na Ñgyoozh bicy mi mi ze' par tub biñ nu ricy cup gyel lily, nunu tub biñ nu ca lagy mbecy lo nu nac mod nu gut mi. 10Ñgyoozh tona' la zily nac mi. Dela coz yu'ñ nu nac mi. Nunu bicy mi nu ni mod zuñ. Orze' Ñgyoozh rlagy mi nu dela i'ñ mi gzac dey lo gyel lily nim. Nde' nu na bi bza' lom riiñ nu biid Jesuuz, biñ nu rboo mbañ de mbecy nu nac nu bzac zim. 11Gun de mbecy nu bi byacaacy, gal nu biñ nu ricy caacy mbecy, tub zi'l Uz dey nuy mi. Nde' nu Jesuuz wagat lom ornu rniim lo dey: “Bicya̱”, rniim. 12Nde' nu lat de riidz ni Ñgyoozh rniiñ ornu nam: Ñgyoozh, ya̱ rzata̱ ru lo de bicya̱. Lat de mbecy nu yu' tublaazh rdula̱ nu ryabica̱ gyel mbecy nir, nam. 13Tuuba' tir nam: Ñgyoozh, lo ru ricy cupa̱ consuel, nam. Tuuba' tir mniim: Ii zu̱ du̱ de i'ña̱ nu briic Ñgyoozh ne̱, mniim. 14Como de mbecy nu nac i'ñ mi ze' nac dey gur mbecy la, orze' ni' Jesuuz gush mi mod nu na dey, gun orze' nu nac nu gut mi, bicy mi nu wacyiiñ nuras, yu nu ricy nu rat mbecy. 15Gun orze' bicy mi nu wadziba' de mbecy nu gat yu. 16Gun rishli biid mi, tees walab par nu locyuub mi de anc, sinu par nu locyuub mi de mbecy nu nac nez Abraham. 17Nde' nu gush mi tub mod nu gal gaa la nam nu de bicy mi. Gun orze' byac mi uz nu chu' lo Ñgyoozh par cuen ni de mbecy. Ornu rzu'm lo Ñgyoozh, orze' ricy paam, nunu rashni lagy mi de mbecy, gun bi briish mi cyi dey. 18Nunu como laab mi bzac zim, nunu guc preb mi, nde' nu cyiiñ mi nu locyuub mi de mbecy nu rzac preb.

will be added

X\