Hebreos 13

1Rlagy ñi tub ga la der zaab ca zir der de bicy ru nu nac Crisht. 2Cue' nit lagy der nu nii nur de mbecy nu walab mbecy guledz nunu cha nu der yu yu'r. Yu' mbecy ornu ni bicy dey mas wangad lagy dey cyu, tees mas anc briic dey yu' chu'y. 3Ca ic der de yu nu yu' nañ yu' gyiib. Bicy der nu ri ga' der nañ yu' gyiib nur dey. Ca ic der de yu nu rzac zi, gun ni' de ru ricy cup der tub cuerp nu rzac zi. 4Dela mbecy rlagy ñi nu ca lagy yu lo compromis nu ricy yu ornu rchelaay. Nunu rlagy ñi gyicy paa de mbecy nu rchelaa ze' nu losa'y, gun Ñgyoozh cuic mi cashtig ni de mbecy nu ral losa' nu wanchelaa. 5Cue' ca der tiñ. Nunu gush der shcab nu beñ ca na la nu ricy cup der. Gun Ñgyoozh nam: “Ya̱ rila wazeeña̱ ru, nunu rila wazaana̱ ru”, nam. 6Orze' wadzib la den gac niin tub riidz. Nde' Shuaan den, mi ze' biñ nu locyuub ya̱. Orze' rila wadziba̱, gun se la la coz gac gyicy nu mbecy ya̱ rniiñ. 7Pcaa ic der de yu nu byub ic ru gulas, de yu nu pshaal riidz ni Ñgyoozh lo der. Gush der shcab nu nac de coz nap nu guc par nu nac nu pcyiiñ dey gyishlombecy, nunu gush der mod nu gusa dey ornu gusa nu dey Crisht. 8Jesucrisht laab mi naag, nunu laab mi na, nunu laab mi par tub la. 9Orze' cue' ruu chu der lo de coz nu laab ñi nu nac zañ lo riidz nu gareñ za nu rlyuu mbecy. Nap zir nu zu fert den nañ lardoon. Ni gyicy den nu nac faboor nu leew la ricy Ñgyoozh, walab nu nac nu gyicy den tub mod nu ta na nu de coz nu don. De yu nu ricy mod nu ta ze' rila wanruu nap dey nu nac ñii. 10De uz nu zu riiñ nañ yu' negy nu briib zily de mbecy Israeel Ñgyoozh rila sac rishbeey nu dugyi dey de gyel nap nu rad nu nac gun ni de ub na nu gua lo Ñgyoozh. 11Tees uz nu rza lo Ñgyoozh por cuen ni de mbecy Israeel, yu ze' rza nuy reñ bañcyug lugaar ze' nu yon zir par de' zir lugaar. Gun orze' cuic yu reñ ze' par nu cyib ñi de cyi de mbecy. Tees cuerp ni bañcyug ze' rcaa dey gyiñ gal zet ru' gyedz. 12Nde' nu ni' Jesuuz gut mi zet ru' gyedz. Gut mi par nu cyib mi cyi mbecy nu nac reñ mi. 13Orze' gal nu mi ze' gut mi zet ru' gyedz, ni' rlagy ñi ruu chu den lo mod nu ricy de' zir mbecy. Gun gal nu mi ze' bruu gyel mbecy nim ornu gut mi, orze' ni' zi'l de ub na shet ic na nu gruu gyel mbecy nin nu nac mi. 14Gun gyishlombecy ii sac tub gyedz nu chu' den tub la, sinu ryub den tub gyedz nu gruu zac par lo. 15Nde' nu rlagy ñi nu dub laa tiem gyabic den gyel mbecy ni Ñgyoozh nu nac Jesucrisht. Nde' gun nu rlagy ñi gric den nim. Gun ze' dric den nim nu ru' den ornu rzat nam. 16Cue' nit lagy der nu nap gyicy ru. Nunu tub ga la der blocyuub der losa'r, gun nde' tub gun nu gyedzu' lagy Ñgyoozh. 17Bzuub gyidag der ni de yu nu riib ic der, nunu “O” nii der ni de riidz nu rnii dey, gun dey ze' rña dey de ru. Nunu rad lagy der nu de yu ze' zeed cuen dey lo Ñgyoozh nu nac coz nu ricy yu. Bicy der nu dub gusht la gyicy dey riiñ nim. Cue' nu shni gyicy dey riiñ nim, gun benu ni, orze' wac locyuub dey de ru. 18Zaab cyiñ la der lo Ñgyoozh nu nac ya̱. Gun segur la de ub na wat lo den nu nac de coz nu ricy na, gun dub laa tiem rlagy den gyicy na mod nap. 19Nunu ya̱ rnishba̱a̱ lo der nu fert cyiñ der lo Ñgyoozh ne̱, gun orze' yap gyiilya̱ lo der. 20Orze' Shuaan den Jesuuz nac mi biñ lily nu rña de mbecy nu nac shily nim nu nac reñ mi nu bzu nap trat ni Ñgyoozh nu rila waded ni. Orze' Ñgyoozh, biñ nu rbic gyel ri zu, mi ze' bicy mi nu byabañ Jesuuz. 21Orze' mi ze' cuic mi la zi'l coz nu galagy ñi ni der par nu gyicy der gal nu rlagy mi. Nunu gyicy mi nu gyicy der de coz nu gyedzu' lagy mi nu nac Jesucrisht. ¡Mi ze' ricy cup mi gyel lily tub la! ¡Laab ni gac ñii! 22Der bicy na, ya̱ rnishba̱a̱ lo der nu pase̱z zuub gyidag der de consef nu rica̱ ni der, gun gyicy nu pca̱a̱ ii, nii tub gyicy mi'. 23Ya̱ rlagya̱ nu gad lagy der nu bicy na Timoteo, bi bruuy nañ yu' gyiib. Benu cyid gyiily yu, orze' yap du̱ yu ornu yap güi̱i̱ de ru. 24Ya̱ zeeda̱ ñgyoozh ni de yu nu riib ic lat der, nunu zeeda̱ ñgyoozh ni dela mbecy ni Ñgyoozh. De mbecy Italia zeeda' dey ñgyoozh ni der. 25Ñgyoozh gyicy mi faboor nu nap gyicy num dela der.

will be added

X\