Hebreos 12

1Nde' nu como tona' la mbecy zigy blyuu dey ni den de coz nu bzac dey nu nac Crisht, orze' nde' nu rlagy ñi zu chu den dela coz nu ricy ñi nu wagac gyicy paa den, nunu rlagy ñi loo chu den dela cyi nu ricy mandaar de ub na. Rlagy ñi nu loo lo den gal nu rboo lo de mbecy ornu rash dey carer. 2Rlagy ñi nu ca gaa la ic den Jesuuz. Mi ze' blyuum ni den lac mod gyicy na nu nac de coz nu bicy mi. Nunu bicy yac za' lam nu de coz nu rlagy Ñgyoozh. Gut mi lo cruuz. Wangyicy cuen lam ti to' lo gut mi, gun rad lagy mi nu ornu lazh zac zim, orze' chesu cyit lagy mi. Orze' gusub mi par yaa bee Ñgyoozh ze' nu riib ic mi. 3Orze' gush der shcab nu nac de coz nu bzac mi. Tona' la guzi lagy de mbecy cyi lom, tees gugyeem. Orze' nde' nu gush der shcab nu nac mi, gun orze' cue' nu gatsiñ der, nunu cue' shi'ñ der baloor. 4Gun lat nu za der contr ni de cyi nu ricy mbecy, nigul coo lo der gashtal gat lar. 5¿A mnit lagy der consef nu briic Ñgyoozh ni der como i'ñ mi nac der? De riidz ze' rniiñ: Orze' Ñgyoozh nam: I'ña̱, cue' nii too der nu se la la sac cashtig nu rbic Shuaan der nir ornu rshuu num der. Ni cue' shi'ñ der baloor ornu rdza'm ni der. 6Gun benu Shuaan ru rcam tub mbecy, orze' rshuu num yu. Nunu cuic mi cashtig ni de mbecy nu gyash mi par nu gyac dey i'ñ mi, nam, rniiñ. 7Orze' gugyee der ornu rzac zir, gun Ñgyoozh gyicy num der gal nu ricy num tub i'ñ mi, gun sac la tub yu nguzh nu washuu nu uz yuy. 8Benu washuu num der gal nu ricy num dela i'ñ mi, orze' walab i'ñ nap mi nac der, sinu i'ñ gyish zi'l nac der. 9Na de uz den nu yu' gyishlombecy ii, de yu ze' rbic yu cashtig ni den, nunu rca lagy den loy. Orze' dzi zir ricy ñi presis nu “O” nii der ni uz na nu zub gyibaa, gun orze' cui mbañ den. 10Na de uz na nu yu' gyishlombecy ii, rbic dey cashtig ni den dub gal lac rnii too dey nu nap par ñuu zi zi'l tiem. Tees Ñgyoozh, ornu rshuu num den, nde' tub coz nap par de ub na, gun orze' gac den mbecy cacy gal nu caacy ub mi. 11Tiem nu rzac den lo cashtig ze', shni rzac den rziin, nunu walab nu yet lagy den. Tees despuees orze' de yu nu pshuu num ze' gyad i dey. I dey ze', nde' nu cyiiñ dey nu gyel ri zu, nunu cyiiñ dey mod nu rlagy ñi. 12Orze' de coz ni Crisht, nde' nañ gal nu na tub coz nu psuun ñi der. Orze' yaa gutsiñ der, briic der fers niñ. Nunu tib gut siñ der briic der fers niñ. 13Nunu nez nu li byub der char, gun orze' gyi'r nu byatis ze' gyanap ñi lugaar nu gyatis zir ñi. 14Bicy der nu nap chu' der nu losa'r, nunu bicy der nu chu' der nu gyel cacy, gun ni tub la mbecy wazac yu lo Ñgyoozh benu a̱' nac yu mbecy cacy. 15Bicy cuidad der nis ruu su tub mbecy lat der nu wazac yu lo de coz nap nu leew la ricy nu Ñgyoozh de ub na. Nunu bicy cuidad der nis gyac der gal nu na tub gyish lya. Ornu lazh galy ñi, orze' gyicy ñi da̱y nu zañ mbecy nu benen niñ. 16Bicy cuidad der nu ni tub la der cue' gal ru mbecy nu wanchelaar. Nunu bicy cuidad der nu ni tub la der cue' zat naañ der coz nu druu lo Ñgyoozh. Gun Esaú ni bicy yu. Biit yu dela coz nu yad ñi nu gad niy nu nac yu i'ñ loga par tub zi comid. 17Orze' rad lagy der nu despuees ngulagy yu nu nii uz yu nu nap gyicy nu Ñgyoozh yu, tees bzuub yaa uz yu rishniiy, gun mas biiñ lay nu byub yu mod nu ñgyicy nap yu coz nu bicy yu, tees wangada' mod. 18Na de ru wangyicy der gal nu bicy de mbecy Israeel ornu becha' dey bicy Sinaí. Becha' dey lo tub coz nu guc bzaac dey. Becha' dey bicy Sinaí, ze' nu rca gyi ily, nunu ze' nu cow, lugaar shni, ze' nu druu bi ily. 19Becha' dey ze' nu rdulaa trompet. Becha' dey ze' nu zaab ti' Ñgyoozh nu rniim. Becha' dey lugaar ze'. Orze' ornu de mbecy zigy güeñ dey nu rnii Ñgyoozh, orze' mnishbaa dey lom nu cue' ga' niim. 20Gun wangagyee dey ornu güeñ dey nu rniim ornu nam: “Mas gal tub bañcyug, benu zuub gyi' ma too bicy ii, orze' rlagy ñi goow gyita' dey ma gal gat la ma o rlagy ñi nu cut dey ma nu yag too lyuch”, nam. 21Tanta' nu coz ily bzaac dey. Mas Moisees nay: “Rash la bisa̱ tanta' nu rdziba̱”, nay. 22Ze' na de ru becha' der bicy Sión, gyedz ni Ñgyoozh mbañ, gyedz Jerusaleeng nu ri gyibaa. Becha' der ze' nu yu' anc zigy tona' la. 23Becha' der ze' nu yu' tublaazh de i'ñ Ñgyoozh, de yu nu ca nu la gyibaa. Becha' der lo Ñgyoozh, biñ nu gri bee ni dela mbecy. Becha' der lo de espiriit ni de mbecy nap nu gu' gulas, de yu nu byanap lo Ñgyoozh. 24Becha' der lo Jesuuz, biñ nu bzu tub trat cub. Becha' der lo reñ mi, reñ nu bicy caacy de ub na. Reñ Abeel mniiñ nu rlagy ñi cashtig, tees reñ Jesuuz nap zir rniiñ. 25Orze' bicy cuidad der nu cue' zuub yaa der rishnii biñ nu rnii nu den. Gun de yu nu bzuub yaa riidz nu mnii Ñgyoozh gyishlombecy ii ornu mniim lo dey nu gyicy cuidad dey, de yu ze' wangac ndruu dey lo cashtig. Benu ni, orze' segur la wac ruu chu den lo cashtig, benu zuub yaa den biñ nu gashtal gyibaa rnii nu gyicy cuidad den. 26Tiem ze' ornu mniim, bicy mi nu pcueñ la gyishlombecy ii, tees na rniim loon: “Stub tir ya̱ cueña̱ gyishlombecy, nunu ni' zi'l cueña̱ gyibaa”, nam. 27Ornu mniim “Stub tir”, orze' naal la rabee nu de coz nu psa' lagy mi, cueñ mi ñii. Orze' co chum de coz nu rcueñ, gun orze' de coz nu wacueñ, gyiyeeñ ñi. 28Tees gyel gubier ni Ñgyoozh nu rbic mi ni den, nde' coz nu wacueñ. Nde' nu gyicy den graseer ni Ñgyoozh, nunu griib zily den mi tub mod nu gyedzu' lagy mi. Ca lagy den lom, nunu dzib na lom. 29Gun Ñgyoozh, biñ nu nac du den, mi ze' nam gal nu na tub gyi nu rnit lo.

will be added

X\