Hebreos 11

1Nu gyicy cup den consuel, nde' laab ni' zi'l nu gad lagy den nu segur la gzac na de coz nu drish lon. Nunu nu gyicy cup den consuel, nde' laab ni' zi'l nu gzu fert den nu nac de coz nu wacsac na. 2De gyitoo bel ni den nu gu' gulas, de yu ze' byedzu' lagy Ñgyoozh de coz nu bicy dey nu nac nu bicy cup yu consuel lom. 3Nu nac nu ricy cup den consuel lom, orze' rad lagy den nu psa' lagy mi de lo la coz nu yu' gyishlombecy nu riidz nu rnii zi'l mi. Psa' lagy mi de coz nu rzac den, tees byaañ nu coz nu wansac den. 4Na Abeel, nu nac nu bicy cup yu consuel lom, briic yu tub gun nim nu nap zir gaze' gun nu briic Caiing. Nunu nu nac nde', Ñgyoozh bicy mi yu par tub mbecy nu sac falt ni. Nunu gush mi gun ze' niy. Nunu nu nac nu bicy cup yu consuel lom, gabee rlyuuy ni den mas bi gut yu. 5Na Enoc, nu nac nu bicy cup yu consuel lo Ñgyoozh, orze' Ñgyoozh byash mi yu, gun orze' cue' nu ñgyat yu. Orze' wangyad yu ca zay, gun Ñgyoozh ya num yu. Tees riidz ni Ñgyoozh rniiñ nu anzir nu gya num yu, orze' bicy yu nu byedzu' lagy mi loy. 6Tees ni tub la mbecy wac gyicy yu nu gyedzu' lagy Ñgyoozh loy, benu wagyicy cup yu consuel lom. Gun cyu zi'l mbecy nu rlagy gyecha' lo Ñgyoozh, orze' rlagy ñi nu cheña lagy yu nu zum, nunu rlagy ñi nu cheña lagy yu nu benu yub yum, orze' gyabic mi iy. 7Na Noé, nu nac nu bicy cup yu consuel lo Ñgyoozh, ornu mniim loy nu gyicy cuidad yu de coz nu yad par lo, de coz nu nigul sac yu. Orze' bzuub gyidag yu nim. Orze' bzaay tub barc. Nañ barc ze' bruu mbañ yu nu dela famil niy. Nunu ni mod blyuuy nu yu' falt ni dela mbecy nu yu' gyishlombecy. Nunu Ñgyoozh bicy mi yu par tub mbecy nu sac cyi nu nac nu bicy cup yu consuel lom. 8Na Abraham, nu nac nu bicy cup yu consuel lom, bicy yac yu nim ornu mniim nu ruuy ledz yu. Guay tub lugaar nu mnii Ñgyoozh nu segur la cuic mi niy. Bruuy ledz yu mas wangad lagy yu ca par chay. 9Nu nac nu bicy cup yu consuel lom, pcyiiñ yu lugaar nu mnii Ñgyoozh nu segur la cuic mi niy. Pcyiiñ yu lugaar ze' mod nu rcyiiñ mbecy nu walab mbecy guledz. Pcyiiñ yu nañ yu' negy gal nu pcyiiñ Isaac, nu Jacob, nu de yu nu mnii ga' Ñgyoozh nu cuic mi laab lugaar ze' niy. 10Gun Abraham blez yu tub gyedz nu bloo ic Ñgyoozh, tub gyedz nu bzaam, tub gyedz nu rila waded ni. 11Na Sara, nu nac nu bicy cup mi consuel lo Ñgyoozh, orze' guud mod nu gu' i'ñ mi mas tona' la guush mi. Bi bded tiem nu gaal mi mdoo, tees bguul mi tub mdoo, gun guña lagy mi nu Ñgyoozh gyicy mi gal nu mniim. 12Nde' nu mas Abraham bi zuy nu gat yu, tees ni mod guud zañ nez yu. Zañ dey. Gal nu zañ de bel baa ni zañ dey. Gal nu sheñ yu uzh nu nguaa ru' nisyudoo ni' zi'l zigy dey byac yu. Waca' la lab na dey. 13Dela mbecy ze' gut dey, nunu wansac dey lo de coz nu mnii Ñgyoozh nu segur la cuic mi. Tees como bicy cup dey consuel lom, orze' gud lagy dey nu par lo gyu' ni riidz nim, nunu bet lagy dey. Nunu naal la mnii dey nu a̱' nac dey mbecy guledz gyishlombecy ii, sinu nac yu mbecy zu nez. 14Gun de yu nu ni rnii, de yu ze' naal la rbic dey nu gad lagy den nu rded dey ryub yu tub lugaar nu gac ledz yu. 15Wangash dey shcab nu nac lugaar ze' nu bruu dey. Gun benu ñgyash dey shcab, orze' ñgyac mbish cya dey. 16Tees rlagy dey tub lugaar nap zir par nu gac ledz yu. Rlagy dey tub lugaar gyibaa par nu gac ledz yu. Nde' nu Ñgyoozh wagat lom ornu rnii dey: “Ru Ñgyoozh ne̱”, rnii dey, gun mi ze' bzu lily mi tub gyedz nu gac ni dey. 17Tiem nu bicy Ñgyoozh preb Abraham, pshet ic yu nu cuic yu i'ñ yu par tub gun lom nu nac nu bicy cup yu consuel lom. Bzu lily yu par nu cuic yu tub gun lom, mas mniim loy nu segur la ornu mniim: 18“Nu nac Isaac chechu' de nez ru”, nam. 19Abraham bicy yu Ñgyoozh par tub biñ nu gyicy nu gyabañ de mbecy, mas bi gut yu. Nunu nde' nañ gal nu na nu Ñgyoozh ñgyabic mi Isaac ni uz yu ornu ñgyat yu. 20Nu nac nu bicy cup Isaac consuel lo Ñgyoozh, mniiy lo Jacob nu lo Esaú nu lac gyicy nu Ñgyoozh dey par lo. 21Nu nac nu bicy cup Jacob consuel lom, mniiy lac gyicy num de i'ñ See. Ni bicy yu ornu bi rgaab gat yu. Nunu briib zily yum lat nu bzaab tiily yu lo yangay. 22Nu nac nu bicy cup See consuel lom, ornu sñuu ga gat yu, bzat yu tiem nu gruu de mbecy Israeel lo yu ni Egipto. Nu nac nu bicy cup yu consuel lom, bzeeñ yu tub riidz niy lo de losa'y. Orze' mniiy lo dey lac gyicy nu dey rit yu. 23Nu nac nu bicy cup de uz Moisees consuel lom, orze' pcach dey yu nañ tub chon beey despuees ornu gul yu. Gun bzaac dey nu yalagy nay nunu wanchib dey lo rey Faraón. Wansuub gyidag dey ni de riidz niy, nu mniiy nu cut dey de mdoo gyeey. 24Nu nac nu bicy cup Moisees consuel lom, ornu bi guush yu, wansaan yu nu nii mbecy nu nac yu i'ñ fiñ feñ ni rey Faraón. 25Guziiy nu nap zir nu zac zi nuy de mbecy ni Ñgyoozh, gaze' nu gyicy yu gusht nu nac coz cyi par ñuu zi zi tiem. 26Mnii tooy nu benu mbecy güii naañ dey loy nu nac Mesías, biñ nu cyid par lo, orze' dzi zir sac ñi gaze' dela gyel nap ni Egipto, gun pcaa ic yu iy nu gyabic Ñgyoozh par lo. 27Nu nac nu bicy cup yu consuel lom, bruuy Egipto. Wanchib yu ornu guzi lagy rey Faraón. Sinu bzu fert yu nu nac coz nu bicy yu. Bicy yu gal nu ricy tub mbecy nu gzac lo Ñgyoozh, biñ nu wacsac na. 28Nu nac nu bicy cup yu consuel lom, bzu yey sa' ni Pas, nunu pcaay de mbecy nu ta'y reñ lo yaro', gun orze' anc nu cut de mbecy ze' wut yu de mdoo gyeey loga ni de mbecy Israeel. 29Nu nac nu bicy cup de mbecy Israeel consuel lom, orze' bded dey lo nisyudoo ña lo yu wach. Orze' de mbecy Egipto bicy pee ga' dey nu ni ñgyicy yu. Orze' de yu ze' gut dey lo nis. 30Nu nac nu bicy cup de mbecy Israeel consuel lo Ñgyoozh, orze' ornu blazh bicy dey marchaar gagy dzi dub yub la ich lo' nu rsoow ru' gyedz Jericó, orze' wes saa lañ. 31Nu nac nu bicy cup tub biñ congal nu la Rahab consuel lo Ñgyoozh, orze' wancut dey mi ornu biit dey de' zir mbecy wangyeñ, gun Rahab bredz mi de yu nu gua tu' cuen por cuen ni de mbecy Israeel nu cha dey yu'm. 32Walagy ñi nu ne̱e̱ zira̱. Sac tiem par nu zata̱ Gedeón, par nu zata̱ Barac, par nu zata̱ Sansón, par nu zata̱ Jefté, par nu zata̱ Dabi, par nu zata̱ Samueel, par nu zata̱ de yu nu mnii por cuen ni Ñgyoozh. Sac tiem nu zata̱ de yu ze' lor. 33Tees nu nac nu bicy cup dey consuel lo Ñgyoozh, gu' dey gyel yuu, nunu bicy dey gan bee nasyoong la. Bicy dey gyel fushtiz gal nu rlagy ñi. Ñgyoozh briic mi de coz nu mniim nu segur la cuic mi ni dey. Psoow dey ru' biidz. 34Psu dey gyi ily. Bruu chu dey lo mbecy nu ngulagy nu ñgyut dey nu mandzicy. De yu nu gugyidz byafert dey. Nunu lily na dey lo gyel yuu. Bicy dey gan bee nac gaa la soldad nu nac losa' yuuy. 35Nu nac nu bicy cup de biñ mñaa consuel lo Ñgyoozh, orze' byabañ famil nim ornu gut yu. Yu' ga' dey nu pshet zi mbecy yu gal gut lay. Wanshet ic dey nu laa mbecy yu, gun orze' ornu gyabañ yu, orze' cyiiñ yu tub mod nu nap zir. 36Yu' nu mnii zi mbecy ni dey. Yu' nu bgaaz mbecy dey nu cuart. Yu' nu pca cuuñ mbecy dey nu caden, nunu pshet lag dey yu nañ yu' gyiib. 37Yu' nu bgoow gyita' dey yu. Yu' nu bicy cyup la' mbecy dey nu sier. Yu' nu biit mbecy dey nu mandzicy. Yu' nu gusa dey nu shab yu nu byaa nu gyid shily o nu gyid chiib. Yu' nu nac dey mbecy zi. Yu' nu psheed zi mbecy dey. Yu' nu bicy ras nu mbecy dey. 38A̱' yad ñi ni cualcyer la mbecy gyishlombecy ii nu chesa de mbecy nap ze' lat dey. Tees gusa dey gal gusa de mbecy zu nez. Gusa dey lugaar ub zi, nunu gusa dey too bicy. Pcyiiñ dey gyeegy nu bduuñ dey lo yu, nunu pcyiiñ dey nañ blyuu. 39De yu ze', mas byedzu' lagy Ñgyoozh lo dey nu nac nu bicy cup dey consuel lom, tees wansac dey lo coz nu mniim nu segur la gyicy mi. 40Gun Ñgyoozh bloo ic mi tub mod nu nap zir par de ub na. Mod ze', nde' nu gyicy nap mi dey nu de ub na.

will be added

X\