Hebreos 10

1Gun leey ni Moisees nañ gal nu na tub sheñ de coz rishli. Coz ze', nde' de coz nap nu cyid par lo. Tees leey ze', nde' walab ub lañ, sinu sheñ zi'l ñi. Nunu nu nac leey ze', de ña'n la rbic dey de gun lo Ñgyoozh. Tees rila wac gyicy nap leey ze' de mbecy nu gyecha' lom nu nac gun nu rniiñ nu cuic dey, 2gun benu ñgyecy cyi de mbecy nu driib zily Ñgyoozh nu nac gun ze', orze' wat lo dey nu nac ñii. Nunu checa dey nu cuic yu gun. 3Tees de gun ze' ricy ñi nu de ña'n la yeza' lagy de mbecy de cyiy. 4Gun reñ tor nu reñ chiib rila wac za' loñ cyi mbecy. 5Nde' nu ornu Crisht biid mi gyishlombecy ii, orze' nam rab mi Ñgyoozh: Ru walagy ru nu cut mbecy bañcyug lor. Ni walagy ru nu cuic dey gun lor, sinu bzu lily ru cuerp ne̱. 6Ni wagyu' lagy ru nu rbic mbecy gun par nu gya' lo cyi dey. 7Orze' ya̱ mne̱e̱ lom: “Ñgyoozh, ii zu̱ par nu gyicya̱ gal nu rlagy ru. Ii zu̱ par nu gyicya̱ gal nu bi cañ lo gyicy nir nu gyicya̱”, mne̱e̱, na Jesuuz. 8Nu loga la mniim nu Ñgyoozh walagy mi de gun nu rbic mbecy. Walagy mi de bañcyug nu rbic dey lom. Walagy mi de bañcyug nu rcaa dey gyi par nu gya' lo cyi dey. Ni wagyedzu' lagy mi de nu nde'. Ni mniim mas rbic dey dela gun ze' gal nu rnii leey. 9Orze' niga mnii Crisht lo Ñgyoozh: “Ñgyoozh, ii zu̱ par nu gyicya̱ gal nu rlagy ru”, nam. Orze' Ñgyoozh bzu chum mod nu briic dey gun gulas. Orze' bzu nap mi tuuba' mod cub. Mod ze', nde' mod ni gun ornu briic Jesuuz ub mi. 10Como Jesucrisht bicy mi gal nu rlagy Ñgyoozh, orze' bya' lo dela cyi den nu nac nu tub tir zi'l briic mi cuerp nim par tub gun lo Ñgyoozh. 11Na dela uz nu zu riiñ lo Ñgyoozh de dzi la zu dey lom, nunu zaab rbic la dey laab laab zi'l gun ze' lo Ñgyoozh. Tees gun ze' rila wac za' loñ de cyi. 12Ze' Crisht tub zi gun briic mi par cyi den. Nunu gun ze' cyiiñ ñi tub la. Gaze' nu gusub mi par yaa bee Ñgyoozh. 13Ze' zub mi na nu rbez mi gashtal ornu gyicy Ñgyoozh nu gyub ic mi de losa' yuum. 14Nu nac tub zi gun bzu nap mi de mbecy tub la, de yu nu bi bya' lo dela cyi. 15Nunu Espiriit Yon ni Ñgyoozh rbic mi nu gad lagy den laab ni' zi'l coz. Nu loga la nam: 16Shuaan der nam: Ni mod za trat nu gyicy du̱ de mbecy Israeel. Ornu shuub dzi ze', ya̱ gyicya̱ nu caa ic dey de riidz nu rne̱e̱. Gyicya̱ nu gad lagy dey ñi nañ lardooy, na Shuaan der, na Espiriit Yon ni Ñgyoozh. 17Orze' gaze' nu nam: Orze' wayeza' ga' lagya̱ de cyi dey. Wayeza' ga' lagya̱ nu shiñ bicy dey, nam. 18Orze' ornu Ñgyoozh gyicy sulagy mi de cyi mbecy, orze' walagya'ñ gun par nu za' loñ de cyi dey. 19Nde' nu der bicy na, na gac nu wadzib lagy la den nu chan ze' nu yon zir par de' zir lugaar nu nac nu pshuu reñ Jesuuz. 20Mi ze' bicy mi nu gad tub mod par nu ded den ro' negy ze' nu chu' den lo nu loo la gal lo Ñgyoozh. Mod ze', nde' tub mod cub. Nde' tub mod nu rbic gyel mbañ nu nac cuerp ni Jesuuz. 21Gun Jesuuz nac mi tub uz lily ni den. Mi ze' zum riiñ nu riib ic mi nañ yu' ni Ñgyoozh. 22Orze' rlagy ñi nu gyecha' den lo Ñgyoozh, nunu gac den tub mbecy nu sac gyel rguu nañ lardoo. Nunu ornu gyecha' den lom, orze' gyicy cup na consuel lom. Tees bicy caacy mi lardoo den, gun orze' wat lo den nu nac cyin. Nunu bicy caacy mi cuerp ni den nu nis cacy nu bzu nis den. 23Orze' rlagy ñi nu gzu fert den nu nac de coz ni Crisht nu rzeña lagy den. Rlagy ñi nu cue' nu gyicy cyup ic den, gun Ñgyoozh segur la gyicy yac mi de coz nu mniim nu gyicy mi. 24Tub ga la den rlagy ñi nu rush den shcab nu nac losa'n ben a wad tub mod nu locyuub na dey par nu ca zir yu losa'y, nunu par nu locyuub na dey nu gyicy yu de coz nap. 25Nunu walagy ñi nu checa den nu gyatublaazh na gal nu ricy la be mbecy. Lugaar nu checa den, rlagy ñi nu gric zir den baloor ni losa'n. Nunu briic zir der baloor ni dey como rad lagy der nu bi rgaab shuub dzi nu cyid Shuaan den. 26Gun sac reña' gun par nu za' loñ cyi den benu zaab gyicy nap la den cyi despuees ornu bi gu' lo den de coz rishli. 27Gun benu ni gyicy den, orze' se tub zi la mod nu gac, nde' nu dzib den nu gzac den lo cashtig ily ni Ñgyoozh, nunu gzac den lo gyi ily nu nit lo de losa' yuum. 28Na benu tub mbecy zay contr ni leey ni Moisees, nunu benu yu' tub cyup chon teshtig nu rniiy nu bzaac yu nu ni bicy yu, orze' washni lagy dey yu, sinu nii dey nu gat yu. 29Benu ni, orze' dzi zir cashtig ily gad ni mbecy nu rzuub yaa I'ñ Ñgyoozh. Dzi zir cashtig ily gad ni mbecy nu rgüii naañ lo reñ mi, reñ nu bzu nap trat nu bicy nu byacaacy yu. Dzi zir cashtig ily gad ni mbecy nu rnii zi ni Espiriit Yon ni Ñgyoozh, biñ nu nap ricy nu de ub na. 30Gun rad lagy den nu Shuaan den nam: “Nde' cuen ne̱ ya̱ nu rica̱ cashtig. Ya̱ naca̱ biñ nu gyabic i yu nu shiñ ricy”, nam. Nunu rniiñ tuuba' se' nu nam: “Shuaan der ri beem ni de mbecy nim”, nam. 31¡Dzi ga coz ily nu gyet lag den yaa Ñgyoozh mbañ! 32Orze' pcaa ic der mod nu bzac der gulas. Na bi gud lagy der de coz ni Ñgyoozh, orze' gugyee der nu gzac zir zañ lo coz. 33Yu' mbecy lat der nu lo rgüii la zigy mbecy mnii zi mbecy ni dey, nunu shiñ bicy nu dey yu. Yu' ga' mbecy lat der nu nac nuy de mbecy nu ni mod bzac zi ze'. 34Orze' gushni lagy der de yu nu ri pres. Nunu ornu rboo mbecy suu der, orze' gugyee der, nunu gucyit lagy der, gun rad lagy der nu gyibaa yu' coz nap zir ni der, coz nu rila waded ni. 35Orze' cue' gac der mbecy dzidz, gun orze' gyad tub i der nu tona' la coz ily nu nac nu ricy cup der baloor. 36Rlagy ñi nu gagye der, gun orze' gyicy der gal nu rlagy Ñgyoozh, nunu gyash yaa der de coz nu mniim nu segur la cuic mi ni der. 37Gun de riidz nim rniiñ: Se ñuu zi zi tiem par nu cyid biñ nu rlagy ñi nu cyid. Wayicy gul lagy mi. 38Orze' Ñgyoozh nam: Tees de yu nu byanap lo̱ cui mbañ dey nu nac nu ricy cup dey consuel lo̱. Tees benu ca nay gya' ich yu, orze' wadzeel reña̱y, na Ñgyoozh, rniiñ. 39Par de ub na a̱' nac den mbecy nu gya' ich. Ni a̱' nac den mbecy nu cha lo cashtig. Sinu nac den mbecy nu ricy cup consuel lom, mbecy nu gruu mbañ.

will be added

X\