Hebreos 1

1Gulas mnii Ñgyoozh lo de gyitoo bel nu nac de yu nu mnii por cuen nim. Nunu zañ tir, nunu zañ mod mniim lo dey. 2Tees lat tiem nu yu' den na, orze' rniim lo den nu nac I'ñ mi. Nunu nu nac I'ñ mi psa' lagy mi gyishlombecy. Nunu bzum mi ze' par nu gyiyeeñ dela coz yaam. 3Lo I'ñ mi ze' gabe gyel lily nim, nunu gal nu na Ñgyoozh Uz mi ni' zi'l nam. Nunu laab I'ñ mi ze' ricy mi nu ni mod yu' dela coz. Ni ricy mi nu riidz nim nu dzi rcyiiñ. Na ornu blazh bdiib mi cyi de mbecy, orze' gusub mi ze' nu zub mbecy nu gya zir zu par yaa bee Ñgyoozh gyibaa. 4Orze' I'ñ mi ze' nac mi tub biñ nu zily zir nac gaze' de anc, nunu Ñgyoozh briic mi tub nu lam nu gya zir sac gaze' de nu la anc. 5Gun Ñgyoozh rila wanniim lo ni tub la anc gal nu mniim lo I'ñ mi ornu nam: Ru I'ña̱. Dzi na ya̱ ne̱e̱ nu ru nac ru biñ nu nac I'ña̱, nam. Ni' zi'l Ñgyoozh wansat mi ni tub anc mod nu bzat mi I'ñ mi ornu nam: Ya̱ naca̱ Uz mi, nunu mi ze' nac mi I'ña̱, nam. 6Ornu Ñgyoozh bzuu nez mi I'ñ mi nu gul loga nim nu biid mi gyishlombecy, orze' nam: Dela anc rlagy ñi nu riib zily dey mi, nam. 7Ze' par de anc, i mod mniim: Ya̱ bicya̱ nu anc ne̱ nay gal nu na bi. Nac dey moz ne̱ nu na gal nu na lyush gyi, nam. 8Tees lo I'ñ mi mniim: Ñgyoozh, ru nac ru biñ nu gyub ic tub la. Ru gyub ic ru mod nu se'ñ. 9Ru yet lagy ru nu ricy ru de coz nu laab ñi, nunu wayet lagy ru nu gyicy ru de coz a̱' nap. Nde' nu ya̱, Ñgyoozh nir, pcui̱ ru, nunu bicya̱ nu zu cyit zir lagy ru gaze' de' zir mbecy, nam. 10Ni' zi'l Ñgyoozh bzat mi I'ñ mi ornu de yu nu mnii por cuen nim mnii dey lo I'ñ mi: Shuaan de̱, ornu ru bzuub ru gyi' gyishlombecy, ru psa' lagy ru ñii. Nunu laab nu yaar psa' lagy ru gyibaa. 11Tees de nu nde' nit loñ, tees ru ni zi'l zur. De nu nde' gyaguush ñi gal nu ricy tub shab mbecy. 12Orze' cu' choow ru ñii, nunu zur tuuba' shab cub ru. Tees ru ni zi'l nar tub la. Orze' rila waded ni tiem nir, na dey. 13Ñgyoozh rila wanniim lo ni tub la anc gal nu mniim lo I'ñ mi ornu nam: Bzub par yaa be̱e̱ gashtal gyicy la̱ nu gyub ic ru de losa' yuur. Rila wanniim ni mod lo ni tub la anc. 14Orze' de anc, yu ze' nac yu espiriit nu ricy yac nu de coz nu rnii Ñgyoozh. Nunu Ñgyoozh rzuu nez mi dey par nu locyuub yu de mbecy nu gruu mbañ.

will be added

X\