Gálatas 5

1Crisht bicy mi nu wayuba' ic leey ze' de ub na. Orze' nap bicy yac der nu de coz nu bicy mi, nunu cue' shet ic der nu gyub ic leey ze' der tuuba' tir. 2Bzuub gyidag der ne̱ ya̱, Baly, gun ne̱e̱ de riidz ii lo der: Benu zaan der nu caa mbecy beey sircunsision cuerp ni der, orze' par de ru se la' la cyiiñ Crisht. 3Ya̱ ne̱e̱ lo der tuuba' tir: Benu ca na mbecy zaan yu nu caa dey beey sircunsision cuerp niy, orze' yu ze' rlagy ñi nu gyicy yac yu nu dela leey ni Moisees par nu gyanap yu lo Ñgyoozh. 4De ru mbecy nu rnii too nu gyanap lo Ñgyoozh nu nac leey ze', de ru bi bruu chu der lo Crisht. Ñgyoozh wayicy mi faboor num der. 5Ze' de ub na, par nu nac Espiriit Yon ni Ñgyoozh nunu par nu nac nu ricy cup den consuel lo Crisht, nde' nu drish lo den lo Ñgyoozh nu gyanap den lom. 6Gun benu nac du den Crisht, se la la cyiiñ nu ca beey sircunsision cuerp ni den, nunu ni' zi'l se la la cyiiñ ñi mas sac beey sircunsision ze' cuerp ni den. Coz nu cyiiñ, nde' nu gyicy cup den consuel lo Crisht. Nunu par nu nac nde' rca den Ñgyoozh, nunu rcaa ga' den losa'n. 7De ru tona' la nap bicy der. Na, ¿cyu bicy nu guca der nu ricy yac ru nu de coz rishli? 8Walab ni bicy Ñgyoozh, biñ nu bzu der par nu gac ru mbecy nim. 9Benu ri tub mbecy nu radza lat der, orze' yu ze' nay gal nu na lebadur. Gal nu lebadur rbic ñi fers ni dela cub gyishtily, ni' zi'l ricy yu ze' nu rnu dela de ru. 10Tees ya̱, ricy cupa̱ consuel lo Shuaan den Jesuuz. Nde' nu ya̱ rnii to̱o̱ nu de ru rila washa' der reña' shcab, nunu de mbecy nu ricy deet lat der, de yu ze' Ñgyoozh cuic mi cashtig ni dey. Ni gyicy num yu mas cyur mbecy nac yu. 11Yu' mbecy rnii dey nu ya̱ rlyu̱u̱ nu ca beey sircunsision cuerp ni mbecy. Benu ni ricya̱, orze' ¿lagu rshet zi dey ya̱, beni? Benu ni bicya̱, orze' wazi lagy de mbecy lo̱ ornu rshaala̱ de riidz ni de coz nu bzac Crisht lo cruuz. 12Tees par de mbecy nu ricy deet lat der nu nac leey ni sircunsision, nap zir benu gyicy capo̱o̱ dey ub yu tub tir zi'l. 13Der bicy na, Ñgyoozh bloo sum de ru par nu gac der mbecy nu wayuba' ic de leey ze'. Orze' cue' cuic der lugaar ni ub ru nu gyicy der de gusht a̱' nap, par nu nac nu bi bla der ni de leey ze'. Sinu de mod la par nu nac nu rca der losa'r, orze' bicy der coz nu galagy de' zir dey. 14Gun benu ricy yac der nu tub zi riidz, orze' ricy yac der dela coz nu ca lo leey ze'. Riidz ze', nde': “Pca der losa'r gal nu rcar ub ru”, rniiñ. 15Tees benu de ru gyicy der gal nu ricy bañcyug dañ, cucua' der nunu gow der losa'r, orze' gnu der de losa'r. 16Coz nu rne̱e̱ nde' nu bzaan der nu gyub ic Espiriit Yon ni Ñgyoozh der nunu cue' shet ic der nu gyicy ru de gusht a̱' nap. 17Gun de gusht a̱' nap ze' zañ contr ni coz nu rlagy Espiriit Yon ni Ñgyoozh, nunu coz nu rlagy Espiriit Yon nim za ga'ñ contr ni de gusht a̱' nap ze'. Lo cyup de coz ze' zañ contr ni losa'ñ. Nunu nde' nu wagac gyicy der coz nu rlagy ub der. 18Tees benu Espiriit Yon ni Ñgyoozh riib ic mi de ru, orze' leey ze' walaba'ñ riib ic ñi der. 19Naal la gad lagy na la na coz nu druu lo de gusht a̱' nap ze'. Druu nu ral dey losa'y nu wanchelaay, ricy dey coz a̱' nap, ricy dey coz nu walab se'ñ. 20Nunu driib zily dey nab. Ricy tu' dey losa'y. Rzi lagy dey lo losa'y. Ricy dey nu deet rzu' losa'y. Ricy saap dey ich losa'y. Nac dey mbecy dza' ic. Zu dey shcab nu ded loy lo losa'y. Ricy dey nu yacyup nac de mbecy nu losa'y. 21Nac dey mbecy lagy saap. Nac dey mbecy rzugy. Row shaad dey de coz nu a̱' yada'ñ nu gow dey. Benu de coz a̱' nap ze' gyub ic ñi mbecy, orze' dela nde' ricy dey, nunu yu' zir coz nu na gal nu na de nde' ricy dey. Na ya̱ rdo̱o̱ rishlo der nu gyicy cuidad der ub ru, gal nu bi mne̱e̱ lo der anzir. Dela de mbecy nu ricy de coz ze' rila wazac dey lo gyel gubier ni Ñgyoozh. 22Ze' benu Espiriit ni Ñgyoozh riib ic mi mbecy, orze' rca dey losa'y. Zu cyit lagy dey. Yu' gyel ri zu nañ lardoo dey. Nac dey mbecy pase̱z. Nunu nap ricy nu dey losa'y. Nac dey mbecy nap. Ricy yac dey nu de riidz nu rniiy. 23Nunu wagyicy lily dey ub yu. Nunu nap riib ic dey ub yu. Dela de nu nde' ricy mbecy benu Espiriit Yon ni Ñgyoozh riib ic mi dey. Nunu sac ni tub la leey nu chañ contr ni de coz ze'. 24De mbecy nu bi nac ni Jesucrisht, orze' nde' nañ gal nu na nu bi gut dey lo cruuz nu Crisht. Orze' walaba' de coz a̱' nap ze' riib ic ñi dey. Ni wagyuba' ic de coz nu rlagy ub zi'l dey nañ lardooy. 25Como de ub na cui mbañ na par nu nac de coz nu ricy Espiriit Yon ni Ñgyoozh, orze' rlagy ñi nu shet ic na nu gyub ic mi den. 26Walagy ñi nu gac den mbecy le'. Ni walagy ñi nu caa yuu den losa'n. Ni walagy ñi nu gazaap lagy den nu nac losa'n.

will be added

X\