Gálatas 4

1De coz nu rlagya̱ ne̱e̱, nde' de nu nii: Benu tub mbecy gat yu, nunu zeeñ yu gyel nap niy yaa i'ñ yu lat nu miiñ yu, mas rishli gaal nac yu shuaan dela gyel nap ze', tees gyicy nu dey yu gal nu ricy nu dey moz por fers la. 2Lat nu miiñ yu, yu' mbecy nu rña dey yu nguzh ze', nunu yu' ga' mbecy nu ryub ic yu de coz nu ricy cup yu nguzh ze'. Ni gyicy dey gashtal shuub la dzi gal nu mnii gyitoo uz yu. 3Ni' zi'l mod rac nu de ub na. Gulas de coz nu blyuu mbecy ni gyishlombecy ii, nde' zi'l byub ic ñi de ub na. 4Tees ornu pshuub tiem nu Ñgyoozh mniim, orze' bzuu nez mi I'ñ mi biid mi. Gul mi ni tub biñ mñaa, nunu pcyiiñ mi lat leey nu bzeeñ Moisees. 5Biid mi bicy mi nu bla den ni leey nu pcyiiñ den lat ze' gulas, gun orze' Ñgyoozh bicy i'ñ mi de ub na. 6Par nu gabe nu nac den i'ñ mi, orze' bzeed mi Espiriit Yon ni I'ñ mi nu cyiiñ mi nañ lardoo den. Espiriit ze' rniim: “Ñgyoozh, Uza̱”, rniim. 7Orze' na a̱' naca' den moz por fers ni leey ze', sinu na nac den i'ñ Ñgyoozh. Na como bi nac na i'ñ mi, orze' cuic mi dela gyel nap nim ni den. 8Gulas wangad lagy der cyu Ñgyoozh. Orze' bicy yac der dela coz nu rlagy de ñgyoozh nu walab ñgyoozh nu rishli. 9Tees na bi yu' lo der Ñgyoozh. O nap zir nu ne̱e̱ nu Ñgyoozh yu' lom de ru. Orze' na ¿lagu rlagy der gash ru leey nu wacyiiñ ze' par nu gyub ic ñi de ru tuuba' tir? 10De ru, yu' dzi gabee ricy zily der ñii. Nunu yu' ga' beey nu ricy zily der. Yu' tiem nu ni' ricy zily der. Nunu ni' zi'l yu' ga' ña'n nu ricy zily der ñii. 11¡Ya̱ tona' la rdziba̱ nu leew la bicya̱ riiñ ni Ñgyoozh lat der! 12Der bicy na, ya̱ rnishbaa lo der nu gyicy der gal nu ya̱ ricya̱. Ni' ricya̱ uba̱ par mbecy nu na gal nu na de ru. De ru rila walab nu shiñ bicy nur ya̱. 13De ru rad lagy der nu tir loga la nu pshaala̱ riidz ni Crisht lat der, orze' guud mod nu gyicya̱ ñii nu nac nu gurata̱ tub güii tiem ze'. 14Mas güiñ lagy der güii nu gurata̱, tees wansu chu der ya̱, nunu wangüii naañ der lo̱, sinu “O” mnii der nu cyiiña̱ lat der. Gal nu rnii der lo tub anc ni Ñgyoozh ni mnii der lo̱. Mnii der lo̱ gal nu rnii der lo ub la Jesucrisht. 15De ru tona' la bet lagy der. Ze' na, ¿la coz bzac der? Ya̱ gac ne̱e̱ tub coz par nu gyabica̱ gyel mbecy ni der. Bi bicy na nu ñgyac, mas gashtal urlo der mboor nu mbic ru ne̱. 16Ze' na ¿a byaca̱ losa' yuu der nu nac nu rne̱e̱ de coz rishli? 17De' zir de mbecy ze' dzi zu dey shcab nu nac de ru. Par walab nu rishli rlagy dey nu gruu nap der, sinu coz nu rlagy dey, nde' nu gyareñ de ru nu de̱ ya̱, gun orze' ni' de yu ze' rlagy dey nu de ru gzu der shcab nu nac dey. 18Na nde' tub coz nap nu gzu den shcab nu nac de losa'n benu rishli rlagy den nu gruu nap dey. Tees napa' benu ni gyicy de mbecy ze' dub laa tiem, cue' ornu zu̱ zi'la̱ lat der. 19De ru yu feñ ne̱, tuuba' tir ya̱ rzaca̱ gal nu rzac tub biñ mñaa ornu gaal mi mdoo. Tona' la rzac deeta̱. Gashtal gyac la der gal nu na Crisht, orze' checa̱ nu rzac deeta̱. 20¡Bi guc nu gac bi zu̱ lat der na na la, orze' gac ne̱e̱ lo der! ¡Na wagad lagya̱ ca na coz nu nii to̱o̱ nu nac de ru! 21Ze' de ru, mbecy nu rlagy gyub ic leey ze', ya̱ rlagya̱ dugyi̱' tub coz lo der: ¿walab gaal wagad lagy der de coz nu rnii leey ze'? 22Rniiñ nu zu cyup i'ñ Abraham. Tub yu gul yu ni tub biñ mñaa nu nac moz por fers la niy. Ze' tuuba'y gul yu ni mñaa gaal yu, tub biñ mñaa nu a̱' nac moz por fers la. 23Mod nu gul i'ñ moz por fers la ze', mod ze' ral cualcyer la mbecy gyishlombecy ii. Ze' i'ñ biñ mñaa nu a̱' nac moz ze', yu ze' gul yu par nu nac nu Ñgyoozh mniim nu segur la cuic mi tub i'ñ Abraham yu gyeey. 24Riidz ze' cyiiñ ñi par nu gad lagy na lac gyicy na. Lo cyup de biñ mñaa ze', nde' cyup trat nu bicy Ñgyoozh num de ub na. Biñ nu nac moz por fers la ze', mi ze' lam Agar. Mi ze' yaruum trat nu guud bicy Sinaí. De mbecy nu ricy cup trat ze', de yu ze' nac yu moz por fers la. 25Agar yaruum bicy Sinaí nu zub lugaar nu la Arabia. Ni' zi'l mi ze' yaruum mbecy gyedz Jerusaleeng gal mod nu yu' dey na. De mbecy nu yu' gyedz ze' nac dey moz por fers la ni de leey ze'. 26Ze' biñ mñaa nu a̱' nac moz ze', mi ze' nu la Sara. Mi ze' yaruum gyedz Jerusaleeng, ze' nu riib ic Ñgyoozh, nunu de ub na nac dun trat nu yaruuñ Sara. 27Gun Ñgyoozh mniim tub riidz nu sñuu ga saap ñi de nu nde' ornu nam: Bet lagy ru biñ mñaa nu wagac gaal mdoo. Brish ti la nu nac nu dzi yet lagy ru, ru biñ nu rila wangad lagy lac rac ni güii ni mdoo. Gun biñ mñaa nu byeeñ ub zi, dzi zir chu' i'ñ mi gaze' biñ mñaa nu zu ñgyee. 28Na de ru bicy na, de ru nar gal nu na Isaac, i'ñ biñ mñaa nu a̱' nac moz, gun nac der i'ñ Ñgyoozh par nu nac de riidz nu mniim nu segur la gyicy mi. 29Gulas yu nu gul mod ni cualcyer la mbecy ze' bicy ras nuy yu nu bicy Espiriit ni Ñgyoozh nu gul. Ni' zi'l rac tiem na. 30Tees ¿lac rniiñ lat de riidz ni Ñgyoozh? Orze' rniiñ: “Cyuu nur biñ mñaa nu nac moz por fers la ze' nu i'ñ lam. Gun i'ñ mi ze' wac gyash yu de gyel nap ni uz yu, sinu i'ñ biñ mñaa nu a̱' nac moz ze', yu ze' gyash yu de gyel nap ni uz yu”, rniiñ lat de riidz ni Ñgyoozh. 31Orze' der bicy na, de ub na a̱' nac naa i'ñ moz por fers la ze', sinu nac naa i'ñ biñ mñaa nu a̱' nac moz ze'.

will be added

X\