Gálatas 3

1¡A̱ der mbecy Gálatas, dzi ga mbecy ton nac der! ¿Cyu bicy tu' de ru par nu cue' gyicy yac der ni de riidz rishli? Naal la pshaal de̱ lat der de coz nu guc ornu gut Jesucrisht lo cruuz. 2Rlagy ñi nu nii der tub coz nu dugyi̱' lor: ¿Lac mod guud Espiriit Yon ni Ñgyoozh ni der? ¿A guud mi nu nac nu bicy yac der nu leey nu bzeeñ Moisees, o ti par nu nac nu güeñ der de riidz ni Jesucrisht, nunu bicy cup der consuel loñ? 3¿Lagu' dzi ga ton na de ru? Ornu nu loga brugyi' ricy der coz nu rlagy Ñgyoozh. Nu nac Espiriit Yon nim bicy der ñii. Ze' na ¿a rlagy der nu za' lor coz nu rlagy mi nu shcab ni ub zi'l der? 4¿A se la la pcyiiñ ñi nu bzac zi der nu nac Jesucrisht? ¡Mas lac ru', tees walab ni, gun nde' segur la pcyiiñ ñi ni der! 5Ornu Ñgyoozh briic mi Espiriit Yon nim ni der, nunu ornu bicy mi nusuriidz lat der, ¿lagu ni bicy mi? Walab nu nac nu ricy paa der nu leey nu bzeeñ Moisees, nde' nu ni bicy mi, sinu par nu nac nu bzuub gyidag der ni de riidz ni Jesucrisht, nunu bicy cup der consuel loñ. 6Ze' Abraham bicy cup yu consuel lo Ñgyoozh. Nu nac nde', nde' nu Ñgyoozh bicy mi yu par tub mbecy nap. 7Nde' nu dela de ru rlagy ñi nu gad lagy der nu dela de mbecy nu ricy cup consuel lo Ñgyoozh, rishli nac dey nez Abraham. 8De riidz nu bzeeñ Ñgyoozh rniiñ nu par lo, Ñgyoozh gyicy mi nu de mbecy nu walab mbecy Israeel gyanap dey lom par nu nac nu gyicy cup dey consuel lom. Nde' nu Ñgyoozh nam rab mi Abraham lat de riidz ze' nim: “Ya̱ nap gyicy du̱ de lo la mbecy nu nac nu gyicy cup dey consuel lo̱ gal nu ricy cupa' ru consuel lo̱”, nam. 9Nde' nu Ñgyoozh nap ricy num de mbecy nu ricy cup consuel lom, gal nu bicy mi nu Abraham, yu nu bicy cup consuel lom. 10De mbecy nu rgyish lo lo leey nu bzeeñ Moisees par nu gruu mbañ yu, de yu ze' byanduuy, gun lat de riidz ni Ñgyoozh rniiñ: “Cyu zi'l mbecy nu wagyicy yac nu dela coz nu ta' lo libr ni leey, de yu ze' byanduuy”, rniiñ. 11Orze' na naal la rabee nu, ni tub la mbecy rila wac gyanap yu lo Ñgyoozh nu nac nu gyicy yac yu nu leey nu bzeeñ Moisees. Gun lat de riidz ni Ñgyoozh rniiñ: “De mbecy nu byanap lo Ñgyoozh nu nac nu ricy cup dey consuel lom, orze' nu nac nde' cui mbañ dey”, rniiñ. 12Tees benu gyicy yac den nu leey nu bzeeñ Moisees par nu ruu mbañ naa, orze' reña' mod gyicy den par mod nu gyicy cup na consuel lo Ñgyoozh. Gun lat de riidz nu bzeeñ Moisees rniiñ: “De mbecy nu gyicy yac nu dela coz nu rnii leey ze', de yu ze' cui mbañ dey par nu nac ñii”, rniiñ. 13Ze' na Crisht bicy mi nu a̱' nac den mbecy byanduu nu nac leey nu bzeeñ Moisees. Ni bicy mi ornu pshet ic mi nu gal mi duu par nu guud mod nu locyuub mi de ub na. Jesucrisht byanduum, gun lat de riidz nu bzeeñ Ñgyoozh rniiñ: “Yu nu gat nu ca lo tub yag, yu ze' byanduuy”, rniiñ. Ze' Jesuuz pcam lo cruuz. Orze' nde' nu byanduum. 14Ni bzac mi gun orze' dela coz nu mnii Ñgyoozh nu cuic mi ni Abraham ni' zi'l cuic mi ni de mbecy nu walab mbecy Israeel. Cuic mi ñii nu nac Jesucrisht. Nunu par nu nac nu ni bzac mi, nde' nu Ñgyoozh briic mi Espiriit Yon nim ni de ub na par nu nac nu ricy cup den consuel lom. Nde' tub coz nu bi mniim nu segur la gyicy mi. 15Der bicy na, ya̱ shaal la̱ lo der lac yaruu de riidz nu bi mne̱e̱. Mne̱e̱ lo der mod nu ricy mbecy nu losa'y. Benu tub mbecy gyicy yu tub trat nu losa'y, na despuees ornu bi bzu nap dey trat ze', orze' wac zuub zir yu riidz lo de coz nu bi mniiy. Nunu ni wac gya' ich yu gal nu bi mniiy. Sinu rlagy ñi nu gyicy yac yu gal nu mniiy loga. 16Na Ñgyoozh bi mniim nu segur la nap gyicy num Abraham nu nez yu. De riidz ni Ñgyoozh wagniiñ: “De nez yu”, gun nde' yaruuñ nu zigy de nez yu, sinu rniiñ: “Nez yu”, rniiñ. Nez yu ze', nde' Crisht. 17Orze' na ya̱ shaal la̱ lo der lac yaruu de coz nu bi mne̱e̱ ze'. Leey ni Moisees bruu zac ñi tap gaynal zub gal rup tii ña'n despuees ornu bicy Ñgyoozh trat nu Abraham. Tees Ñgyoozh bicy mi tub trat num Abraham. Orze' leey ni Moisees wac gyub ic ñi trat nu bi bzu nap Ñgyoozh nu Abraham. Wac gyicy ñi nu wayicy Ñgyoozh gal nu mniim nu gyicy mi. 18Benu mbic mi gyel nap nim ni den nu nac leey, orze' walab nu cuic mi ñii nu nac de riidz nu mniim nu segur la gyicy mi. Tees Ñgyoozh leew la briic mi gyel nap nim ni Abraham nu nac nu bicy cup yu consuel lo de riidz nu mniim nu segur la gyicy mi. Nde' nu rad lagy den nu wad ñi nu nac leey ze'. 19Orze' ¿la cyiiñ leey nu bzeeñ Moisees? Ñgyoozh briic mi ñii despuees par nu gad lagy na ornu mbecy ricy yu cyi. Ñgyoozh rlagy mi nu zuñ gashtal ornu shuub la tiem nu gruu zac biñ nu nac nez Abraham. Mi ze' biñ nu bzat Ñgyoozh lat de riidz ze'. Leey nu bzeeñ Moisees, Ñgyoozh briic mi ñii ni de anc. Orze' de anc ze' briic yuñ ni Moisees. Gaze' nu Moisees briic yuñ ni de mbecy. 20Tees ornu Ñgyoozh mniim lo Abraham nu segur la nap gyicy num yu, ni walab anc mniiy nunu ni walab mbecy mniiy, sinu ub la Ñgyoozh mniim de nu nde'. 21¿Lac yaruu de riidz nu ya̱ bi mne̱e̱ lo der ze'? ¿A yaruuñ nu leey ni Moisees zañ contr ni de riidz nu mnii Ñgyoozh nu segur la gyicy mi? ¡Walab ni! Gun Ñgyoozh wancuic mi leey ze' ni Moisees par nu gyicy ñi nu cui mbañ de mbecy tub la. Gun bi bicy na nu mbic mi ñii par nu cui mbañ mbecy tub la, orze' cyiiñ ñi par nu gyicy ñi nu gyanap mbecy lo Ñgyoozh. 22Tees Ñgyoozh bicy mi reña' mod par nu gac gyanap mbecy nuy mi. Gun lat de riidz ni Ñgyoozh rniiñ: “Cyi riib ic ñi dela mbecy.” Gun orze' de mbecy nu gyicy cup consuel lo Crisht, de yu ze' nap gyicy nu Ñgyoozh dey gal nu bi mniim nu segur la gyicy mi. 23Anzir nu shuub tiem nu gyicy cup den consuel lo Crisht, orze' na den gal nu na de mbecy nu yu' pres par nu nac leey ni Moisees. Ni mod pcyiiñ den gashtal Ñgyoozh briic mi nu gad lagy den lac mod gyicy cup na consuel lom. 24Nde' nu leey ni Moisees nañ gal nu na tub moscuel nu rlyuuñ ni de ub na nu lac mod gyicy den gashtal ornu pshuub la tiem nu biid Crisht, gun orze' gyanap den lo Ñgyoozh nu nac nu gyicy cup den consuel lo Crisht. 25Na como bi pshuub tiem nu gyicy cup den consuel lo Crisht, nde' nu leey ni Moisees walaba'ñ nu riib ic ñi de ub na. 26Nde' nu na dela de ru nac ru i'ñ Ñgyoozh nu nac nu ricy cup der consuel lo Jesucrisht. 27De ru bzu nis der par nu gabe nu bi nac der mbecy ni Crisht. Nde' nu na de ru bi zu der gal mod nu ub mi zum. 28Orze' na tub zi'l na de mbecy Israeel nu de mbecy griego. Nunu tub zi'l na de yu nu nac moz por fers la nu de mbecy nu sac patro̱o̱ ni. Nunu tub zi'l na de yu gyeey nu de biñ mñaa. Nde' nu dela den, tub zi'l nac naa par lo Jesucrisht. 29Benu nac den ni Crisht, orze' nac den nez Abraham. Nunu Ñgyoozh nap gyicy num de ub na gal nu bi mne' ic mi nu segur la gyicy mi.

will be added

X\