Gálatas 2

1Ornu bza' trotap ña'n, orze' bya̱a̱ tuuba' tir Jerusaleeng nu Bernabee. Nunu gaza' Tito bya du̱ yu. 2Bya̱a̱ gun Ñgyoozh bicy mi nu gud lagya̱ nu rlagy ñi nu gya̱. Orze' ornu bri̱ Jerusaleeng, byatublaazha̱ nu de yu zub lo zi'l. Orze' wangac chu' reña' mbecy. Mne̱e̱ de riidz nu sac ni Crisht nu rshaala̱ lat de mbecy nu walab mbecy Israeel lo dey. Mne̱e̱ lo dey, gun dzi ga leew la bicya̱ de riiñ nu bi bicya̱, gal nu de riiñ nu gal na ricya̱. 3Tito, losa̱' nu rded du̱, mas nac yu tub mbecy griego, tees wannii dey nu ca beey sircunsision cuerp niy par nu gabe nu nac yu mbecy ni Ñgyoozh. 4Ni a̱' nii la too dey ti ca beey ze' cuerp niy benu cue' nu bru'ña la be bicy na nu rnii coz fals. De yu ze' dze ga gu' dey lat de̱. Gu' dey par nu siiñ yu ne̱ de̱, gun rlagy dey gad lagy yu lac mod ricy de̱ gyi' nu nac de̱ mbecy ni Jesucrisht. Nunu rlagy dey gad lagy yu ben a ricy pa̱a̱ de̱ nu de leey ni de mbecy Israeel. Nunu gu' dey par nu yub dey mod nu gyicy de̱ de coz nu rnii de leey ze'. 5Mas lac ru', tees wanguugy lardo̱o̱ de̱ par ni ñuu miiñ la nu ñgyicy de̱ de coz nu rlagy dey, gun orze' de riidz rishli ni Crisht wadza lañ lat der. 6Nunu de mbecy zub lo, wancyaañ dey de coz nu lyu̱u̱, nunu dela mbecy rad lagy dey nu nac yu mbecy zub lo. (Mas nac dey mbecy zub lo, par ya̱ se la la nde', gun Ñgyoozh wagüiim mod nu na mbecy.) 7Lugaar nu ñcyaañ dey de coz nu rlyu̱u̱, ca nu mnii dey nu rabee nu Ñgyoozh bzum ya̱ nu gyicya̱ riiñ nu shaala̱ de riidz nu sac ni Crisht lat de mbecy nu walab mbecy Israeel, gal nu bzu ga'm Bed nu ricy yu riiñ nu rshaal yu riidz nu sac ni Crisht lat de mbecy Israeel. 8Gun laab zir Ñgyoozh nap ricy num de mbecy Israeel nu nac Bed, nunu laab mi nap ricy num de mbecy nu walab mbecy Israeel nu nac ya̱. 9Orze' Santiag, nu Bed, nu Waa, de yu nu rnii mbecy nu nac yu zub lo, de yu ze' gud lagy dey nu Ñgyoozh bicy mi faboor nu nap bicy num ya̱. Orze' bicy losa' dey ya̱ nu Bernabee. Mnii dey nu de̱ ya̱ cha shaala̱ de riidz nu sac ni Crisht ze' nu yu' de mbecy nu walab mbecy Israeel. Ze' de ub yu shaal yu de riidz nu sac ni Crisht ze' nu yu' de mbecy Israeel. 10Nomaas nu mnii dey nu ca ga ic de̱ nu locyuuba̱ de mbecy zi. Nunu ya̱ ni' zi'l zu̱ shcab nu nac nde'. 11Tees ornu Bed guay gyedz nu la Antioquía, orze' pshuu du̱ yu lo lay, gun yu' falt niy. 12Gun anzir nu ru'ña la be de mbecy nu rsya' lo Santiag, orze' Bed bdow yu gyit tublaazh la nu de mbecy nu walab mbecy Israeel. Tees ornu bru'ña de mbecy ze', orze' bicy zet lagy yu. Orze' bruu chuy lat dey, gun gudzib yu lo de mbecy nu rnii nu dela mbecy ni Crisht rlagy ñi nu gyicy yac dey ni de leey ni de mbecy Israeel. 13Orze' gaza' de mbecy Israeel nu nac mbecy ni Crisht bzuu lo dey gal nu bicy Bed. Orze' bicy zet lagy dey bruu chuy lat de mbecy nu walab mbecy Israeel, nunu gaza' Bernabee bruu chuy lat dey. 14Tees ornu bzaca̱ de mod nu ricy dey nu wasaap ñi de riidz rishli ni Crisht, orze' mne̱e̱ lo Bed lat dela mbecy zigy: “Ru, mas nac ru mbecy Israeel, tees rcyiiñ ru mod nu rcyiiñ mbecy nu walab mbecy Israeel. Benu ni, ¿walab gaal gac caar de mbecy nu walab mbecy Israeel nu gyicy dey mod nu ricy de mbecy Israeel?” rugya̱ yu. 15De̱ ya̱ nac de̱ mbecy Israeel nese nu gul la̱a̱ de̱. Walab nu bru̱u̱ de̱ lat reña' mbecy, de mbecy nu ricy cyi. 16Tees neñ den nu ni tub la mbecy wayanap dey lo Ñgyoozh nu nac nu ricy yac dey ni leey nu bzeeñ Moisees, sinu tub lo zi'l nu gyanap dey lom nu nac nu gyicy cup zi'l dey consuel lo Jesucrisht. Ni' de̱ ya̱ ricy cup de̱ consuel lo Jesucrisht, gun orze' gyanap de̱ lo Ñgyoozh nu nac nu ricy cup de̱ consuel lo Crisht. Walab nu nac nu gyicy yac de̱ ni de leey ze'. Walab nde' gyicy ñi nu gyanap den lo Ñgyoozh. Gun ni tub la mbecy wac gyanap yu lom nu nac nu ricy yac yu ni de leey ze'. 17Nunu benu gyicy cup den consuel lo Crisht par nu gyanap na lo Ñgyoozh, ze' despuees nii too den nu wangyanap na lom, gun wagyicy yac den ni leey ni de mbecy Israeel, orze' ¿walab gaal Crisht ricy zir mi nu nac den mbecy cyi? ¡Mas lac ru' tees walab ni! 18Ze' benu ya̱ lyu̱u̱ ni de mbecy nu rlagy ñi nu gyicy yac dey ni leey ni de mbecy Israeel, ze' ii ya̱ bi bzu chu̱ leey ze', orze' ya̱ naca̱ mbecy cyi. 19Gun lat nu psya̱' leey ni Ñgyoozh, orze' bet laga̱ cuen nu wac grish lo̱ looñ par nu gyanapa̱. Nde' nu na ya̱ na̱ gal nu na mbecy gut par lo leey ze'. 20Orze' nde' nu walaba' nu rcyiiña̱ gal nu pcyiiña̱ gulas, sinu rcyiiña̱ gal mod nu rlagy Crisht. Na nu zu̱ gyishlombecy ii, se coz nu rlagy zi'l ñi nu gyicy mbecy nu ricy cup consuel lo i'ñ Ñgyoozh, se nde' zi'l coz nu ricya̱. Gun i'ñ mi pcam ya̱, nunu pshet ic mi nu gut mi nu nac gaza' ya̱. 21Nde' nu ya̱ wazuub ya̱a̱ de faboor nu bicy Ñgyoozh nu gut Crisht lo cruuz, gun bi bicy na nu mbecy ñgyanap dey lo Ñgyoozh nu nac leey nu bzeeñ Moisees, orze' leew zi'l nu gut Crisht.

will be added

X\