Gálatas 1

1Ya̱ Baly tub aposht, tub yu nu rded riiñ ni Jesucrisht. Riiñ nu bdugyi̱, nde' walab coz nu bruu lo de mbecy, nunu walab riiñ nu briib mbecy ica̱, sinu Jesucrisht nu Ñgyoozh, uz na, briib mi ñii ica̱. Nunu Ñgyoozh, uz den bicy mi nu byabañ Jesucrisht. 2Ya̱ nu de bicy na nu yu' ii zeed de̱ ñgyoozh ni dela mbecy ni Crisht nu yu' de gyedz nu yu' lo de yu nu la Galacia. 3Orze' Ñgyoozh, uz den, nunu Shuaan den Jesucrisht gyicy dem faboor nu nap gyicy num de ru, nunu gyicy mi nu cheti ri añ ni der. 4Jesucrisht pshet ic mi nu gut mi par nu cyish mi cyi den. Ni bicy mi, gun orze' locyuub mi den lat nu rded na lat de mbecy shiñ ricy nu yu' gyishlombecy ii. Ni bicy mi gun nde' coz nu rlagy Ñgyoozh, uz den. 5Rlagy ñi gyabic na gyel mbecy nim tub la. ¡Laab ni gac ñii! 6Ya̱ tona' la za du ica̱ nu wangac tuñ la bi rlaa yaa der Ñgyoozh, biñ nu pcui de ub na nu gac nim nu nac faboor nu bicy Crisht. Rlaa yaa der Ñgyoozh par nu ricy cup der consuel lo reña' riidz nu rniiñ nu reña' mod ruu mbañ naa. 7Rishli walab nu yu' reña' riidz nu rniiñ lac mod gruu mbañ mbecy, tees yu' la be mbecy nu rcan yu shcab ni der, nunu rlagy yu chaay de riidz nu sac ni Crisht. 8Tees mas de̱ ya̱, o mas tub anc nu ruu gal gyibaa shaal yu tub riidz nu za contr ni riidz nu pshaal de̱ lo der, orze' yu ze' byanduuy. 9Gal nu bi mne̱e̱ lo der, laaba' nde' ne̱e̱ ga̱' na. Benu ca na mbecy shaal yu tub riidz nu za contr ni de riidz nu sac ni Jesucrisht, de riidz nu ricy cup der consuel lo ze', orze' yu ze' byanduuy. 10Ya̱ wagne̱e̱ de coz nu yet zi'l lagy mbecy, sinu rne̱e̱ de coz nu yet lagy Ñgyoozh. Walab nu ricya̱ nu gyet lagy mbecy ya̱, gun benu ni gyicya̱ par nu gyet lagy mbecy ya̱, orze' wagyicy yaca̱ nu de mandaar nu rnii Crisht. 11Ya̱ rlagya̱ rica̱ nu gad lagy der bicy na, nu de riidz ni Jesuuz nu rshaala̱, nde' walab coz nu bloo ic mbecy. 12Ni walab lo mbecy blo̱o̱ ñii. Ni walab mbecy blyuuy ne̱. Sinu Jesucrisht bicy mi nu gud lagya̱ ñii. 13Gun de ru bi güeñ der mod nu bicya̱ gulas, lat nu pca lagya̱ lo cushtom ni de mbecy Israeel. Ya̱ fert la bzaba̱ nu psheed zi̱ de mbecy ni Crisht. Nunu mnii to̱o̱ nu nit lo̱ dey. 14Ya̱ bicy pa̱a̱ zira̱ nu de cushtom ni de mbecy Israeel gaze' de' zir de losa̱' mbecy Israeel, de losa̱' nu tub zi'l ña'n de̱, gun ya̱ tona' la bicy zilya̱ de cushtom ni de gyitoo bel ne̱. 15Tees Ñgyoozh nil bloo sum ya̱ nu gaca̱ nim nese anzir nu gala̱ ni ñaa. Orze' bicy mi tub faboor ily briib mi riiñ nim ica̱. Nunu bet lagy mi 16nu bicy mi nu gu' lo̱ i'ñ mi, Jesuuz, gun orze' ya̱ gac shaala̱ riidz ni Jesuuz lat de mbecy nu walab mbecy Israeel. Ornu bicy mi nde', ya̱ wansaapa̱ riidz nu ni tub la mbecy. 17Ni wancha̱ Jerusaleeng nu ñgya̱ güi̱i̱ de' zir de yu nu bi nac aposht anzir nu ya̱ gaca̱ aposht. Sinu lueg la gua̱ gal Arabia. Orze' bru̱u̱ Arabia, gaze' nu bish cya̱ za̱ par Damasco. 18Gal bza' chon ña'n, gaze' nu bru̱u̱ Damasco ya̱a̱ par Jerusaleeng nu du' lo̱ Bed. Orze' pcyiiñ du̱ yu tiiñ dzi. 19Tees wansaca̱ de' zir de aposht. Nomaas Santiag bicy Shuaan den, yu ze' zi'l bzaaca̱. 20Ñgyoozh rad lagy mi nu de coz nu ca̱a̱ lo gyicy ii, nii coz rishli. 21Despuees gaze' nu bru̱u̱ Jerusaleeng. Gua̱ de lugaar ni Siria nunu gua̱ de lugaar ni Cilicia. 22Nunu de mbecy ni Crisht, de yu nu yu' Judea, gabee nigul chu' lo dey ya̱ nu zac la dey lo̱. 23Nomaas reñ zi'l dey nu zaab riidz nu rnii mbecy: “Yu nu bzab ich den gulas, na bi rded yu rshaal yu riidz nu ricy cup den consuel lo, riidz nu ngulagy yu nu nnit loy gulas”, rnii mbecy. 24Orze' ryabicy dey gyel mbecy ni Ñgyoozh nu nac ya̱.

will be added

X\