Efesios 4

1Nde' nu ya̱, tub mbecy nu ri pres nu nac Shuaan den Jesuuz, rnishba̱a̱ lo der nu chesa der gal mod nu rlagy ñi nu chesa mbecy nu bzu Ñgyoozh nu gac nim, gun ni bicy mi num der. 2Guc der mbecy nu ricy gyel gyidz ni. Guc der mbecy gugy na. Nunu guc der mbecy pase̱z. Gugyee tub, gugyee tub zi'l der lo losa'r nu nac nu rcar yu. 3Bloo lo der nu dub laa tiem tub zi'l gac der nu losa'r. Gun nde' coz nu druu lo Espiriit Yon ni Ñgyoozh, nunu mi ze' locyuub mi der nu nap chu'r nu de losa'r. Orze' nu nde' gyicy ñi nu tub zi'l nac der nu losa'r. 4Gun dela mbecy ni Crisht nac dey se tub zi'l cuerp. Nunu zu tub zi Espiriit Yon ni Ñgyoozh. Nunu Ñgyoozh bzum de ub na nu gac naa nim, gun orze' tub zi'l mod nu grish lon lo de coz nu yad par lo. 5Zu tub zi Shuaan den Jesuuz, nunu tub zi mod nu gyicy cup den consuel lom, nunu tuuba' zi mod nu gzu nis na. 6Zu tub zi Ñgyoozh, Uz dela de ub na. Nunu riib ic mi dela den. Nunu ricy mi riiñ nim nu nac dela den. Nunu rcyiiñ mi nañ lardoo dela den. 7Tub ga la den guud riiñ nu cyiiñ den nu gyicy na dub gal mod nu rlagy Crisht nu cuic mi. 8Nde' nu lat de riidz ni Ñgyoozh rniiñ: Ornu gup mi gyibaa, orze' ya num de losa' yuum pres. Nunu leew la briic mi coz ni de mbecy nim. Ni rniiñ lat de riidz ni Ñgyoozh. 9¿Lac yaruu riidz nu gup mi ze'? Nde' yaruuñ nu bet mi gyishlombecy ii loga la. 10Laab biñ nu bet gyishlombecy ii, laaba' mi ze' gup mi gashtal ze' nu blaazha' zir nu gya ni de baa, gun orze' dutuub la zum. 11Nunu laab mi ze' bicy mi nu la be dey gac yu aposht. Ze' la be ga' dey gac yu yu nu nii por cuen ni Ñgyoozh. Ze' la be ga' dey gac yu yu nu shaal de riidz nu sac nim. Ze' yu' ga' dey nu gac yu yu nu ña de mbecy nim. Nunu laab de yu ze' nac yu yu nu rlyuu ni mbecy nim. 12Ni mod bzu lily mi de mbecy nu nac nim, par nu gyicy dey riiñ nim, gun orze' gyicy dey nu gyafert zir de mbecy ni Crisht, de yu nu nac cuerp nim. 13Gun orze' gyac den mbecy nu gyicy cup consuel lo laab ni' zi'l coz, nunu gac den mbecy nu gzu tub zi'l shcab nu nac Jesuuz, I'ñ Ñgyoozh. Ni mod orze' gac den mbecy nu bi gul shcab ni. Gun orze' gac den tub nac mbecy nu gal gaa la na nu Crisht. 14Gun cue' nu gac naa gal nu na yu nguzh, gun de yu nguzh a̱' biigy la dza shcab ni dey. Nunu na dey gal nu na doob nu rne' bi par re par ii la. “O” rnii dey ni la zi'l riidz rguu nu rnii de mbecy a̱' nap. De mbecy a̱' nap ze' ricy dey nu radza mbecy nu nac de gyel rguu nu rboo ic dey. 15Tees nap zir nu gnii den nu riidz nu rishli nu gabe nu dzi rca den losa'n, gun orze' gal shcab ni den gashtal gyac lan mbecy nu na gal nu na Crisht. Orze' mi ze' nam gal nu na too cuerp. Ze' de mbecy nim na dey gal nu na de' zir lugaar ni cuerp ze'. 16Orze' nu nac Crisht dela lugaar ni cuerp ze' nap nash losa'ñ. Nap nash ñii dela lugaar ze' nu ñgyiid ñi nu losa'ñ. Nunu ornu tub ga la lugaar ni cuerp nap ricy ñi riiñ, orze' dutuub la cuerp galy ñi nunu gyanap ñi nu nac nu de mbecy rca tub rca tub zi'l dey losa'y. 17Orze' nii tub coz nu ne̱e̱ lo der. Nii tub riiñ nu du̱' yaa der nu nac Shuaan den Jesuuz: nu cue' ga' chesa der gal nu rded de mbecy nu a̱' yu' lo Ñgyoozh. Gun de yu ze' rded yu ca na la nu rnii shcab ton ni dey. 18Byoow nañ shcab ni dey. Reña' mod rcyiiñ dey par mod nu druu lo Ñgyoozh, gun shtee dey nu nac nu gut shcab niy. 19Bicy cyig too dey, nunu gutib ic bis dey. Nunu ric la añ ni dey nu gyicy yu de lo la coz a̱' nap. 20Tees de ru walab ni mod psya' der lo Crisht par nu chesar. 21Sinu de ru rishli güeñ der de riidz nu zaab nu nac mi. Nunu de ru psya' der lom ca na de coz rishli. 22Rlagy ñi nu ne' der de mod nu bicy ru nu gusar gulas. Gun gulas guc der mbecy bdunu nu nac de coz a̱' nap nu dzi bzaab lagy der lo. De nu nde' bguuñ de ru gulas. 23Tees na, de ru rlagy ñi nu gyicy cup ru tub shcab cub, nunu rlagy ñi nu gyicy cub der nañ lardoor. 24Orze' rlagy ñi gyac der tub mbecy cub, dub gal mod nu psa' lagy Ñgyoozh. Orze' rabee nu ni na der nu nac nu ricy ru mod nu se'ñ, mod nu rlagy Ñgyoozh. Ricy der mod nu rishli. 25Orze' nde' nu na cue' ga' guu der losa'r, sinu tub ga la der niir riidz nu rishli lo losa'r, gun dela den nac naa reñ ga la lugaar ni tub zi'l cuerp. 26Benu cha' ic der, orze' cue' shet ic der nu gyicy ñi nu gyicy ru cyi. Cue' cha' ic der dub laa dzi. 27Cue' cuic der lugaar ni nuras. 28De yu nu ricy gubaan, rlagy ñi nu checay ni fis ze'. Orze' rlagy ñi gyicy yu riiñ. Gyicy yu riiñ nap nu shic yu, gun orze' rusub ñuu tiñ nu cuic yu ni yu nu ricy falt ñi ni. 29Cue' grib riidz a̱' nap ru' der, sinu du ub riidz nap la nii der. Nii der riidz nu locyuub ñi mbecy. Nii der gal mod nu rlagy ñi. Nii der de riidz nu gyicy ñi coz nap nu de mbecy nu zuub gyidag. 30Cue' gyicy der nu gyicy shni Espiriit Yon ni Ñgyoozh. Gun nu nac nu ricy cup der Espiriit Yon ze' gabe nu nac der mbecy ni Ñgyoozh gashtal ornu shuub dzi nu wagyuba' ic cyi der. 31Bloo der dela bis nu guti nañ lardoor. Blaa yaa der nu rgyiiñ lagy ru lo de coz nu ricy ru nañ lardoor. Cue' gazi lagy der. Cue' cush ti der nu gyel rzi lagy. Ni cue' gab zi der losa'r. Ni cue' gyicy der ni tub la coz a̱' nap. 32Guc der mbecy gugy na, mbecy pase̱z nu losa'. Nunu bicy sulagy tub, bicy sulagy tub zi'l der ni losa'r, gal nu Ñgyoozh bicy sulagya'm ni de ru nu nac Crisht.

will be added

X\