Efesios 3

1Nu nac nu nde', ya̱ Baly, ri̱ pres nu nac Jesucrisht. Ri̱ pres nu nac nu blocyuuba̱ de ru mbecy nu walab mbecy Israeel. 2Tees de ru segur la bi neñ der nu Ñgyoozh dzi nap mi. Nde' nu bdu'm riiñ ya̱a̱, gun nu nde' coz nu cyiiñ par de ru. 3Ñgyoozh briic mi nu gad lagya̱ de coz nu bloo ic mi nu gyicy mi. De nde' coz nu wangad lagy de mbecy gulas. Ya̱ bi pca̱a̱ ñumi' de riidz nu brica̱ nu gad lagy der. 4Na ornu sya' der ñii, orze' gad lagy der de coz nu ya̱ rad lagya̱ ni Crisht. Nde' de coz nu wangad lagy mbecy gulas. 5Ñgyoozh wancuic mi nu gad lagy ni tub la mbecy de coz ze' gulas, tees na Espiriit Yon nim briic mi nu gad lagy de aposht nim gal nu de yu nu mnii por cuen nim. 6Ze' de riidz nu wangad lagy mbecy ze', nde' nu nac de riidz nu sac ni Crisht, coz nu cuic Ñgyoozh ni de mbecy Israeel, laaba' nde' cuic mi ni de mbecy nu walab mbecy Israeel. Orze' gac dey gal nu na tub zi'l cuerp. Nunu de coz nu mnii Ñgyoozh nu segur la gyicy mi nu nac Jesucrisht, orze' de coz ze' gaza' de mbecy nu walab mbecy Israeel dugyiy ñi. 7Ñgyoozh bdu'm riiñ ya̱a̱ nu gyicya̱ riiñ ni de riidz ze' mas rila wangyapa̱ nu ni gyicy num ya̱. Mi ze' bdu'm ñii ya̱a̱ nu nac nu dzi coz ily ricy mi. 8Ya̱ naca̱ mbecy nu gash zir zu par de mbecy nu blaazha' zir gash zu nu yu' lat de mbecy ni Ñgyoozh. Mas ni, tees Ñgyoozh nap bicy num ya̱ ornu bdu'm riiñ ya̱a̱ nu shaala̱ de riidz nu blaazha' la ñgyup sac ni Crisht lat de mbecy nu walab mbecy Israeel. 9Bdu'm de riiñ ze' ya̱a̱ nu gyicya̱ nu gad lagy dela mbecy ca na de coz nu bloo ic Ñgyoozh nu gyicy mi. Nese gulas tona' la wangad lagy de mbecy de coz nu bloo ic Ñgyoozh ze'. Nunu laab mi psa' lagy mi dela coz. 10Ni bicy mi, gun orze' dela mbecy nu riib ic gyibaa gad lagy dey la na de lo la shcab nim nu nac de mbecy ni Crisht. 11Ñgyoozh, ni bicy mi ñii, gun nde' coz nu nil rlagy mi nu gyicy mi nese nu bzub gyi' tiem. Orze' briib mi ñii ic Shuaan den Jesucrisht nu gyicy mi ñii. 12Orze' nu nac Crisht rila wadzib lagy den nu gyecha'n lo Ñgyoozh. Nunu wadzib den nu gyecha'n lom nu nac consuel nu ricy cup na lom. 13Nde' nu ya̱ rnishba̱a̱ lo der nu cue' shi'ñ der baloor nu nac nu rzac zi̱ nu nac de ru, gun de nu rzac zi̱ ii, nii coz nap par de ru. 14Nu nac de nu nde', orze' ya̱ rzu tiba̱ lo Ñgyoozh Uz den. 15Orze' lo Ñgyoozh bruu nu la dela de mbecy nim: de yu nu yu' gyibaa, gal nu de mbecy nu yu' gyishlombecy ii. 16Ya̱ diña̱ lo Ñgyoozh, Uz den, nu cuic mi faboor cyit na nim ni der, faboor lily nu gruu lat zañ de faboor cyit na nu ricy cup mi. Nunu faboor nu cuic mi ze', nde' nu gyicy mi nu cyiiñ der, nunu cuic mi fers ni der nañ lardoor nu nac Espiriit Yon nim. 17Nunu diña̱ lom nu Crisht cyiiñ mi nañ lardoo der nu nac nu ricy cup der consuel lom. Orze' de ru zaab fert zir ca der Ñgyoozh. 18Gun orze' gad lagy dela mbecy ni Ñgyoozh nu tona' la coz ily rca Crisht dey. Gyel rca nim, nde' nañ gal nu na tub coz nu blaazha' la she, nu blaazha' la tuñ, nu blaazha' la gyi, nu blaazha' la gya. 19Rdiña̱ lom nu gad lagy der nu rcam de ru. Tees par de nu nde' tona' la coz ily, nde' nu wagagyee shcab ni der nu gad lagy ru. Rlagy ñi nu gad lagy der nu rcam de ru, gun orze' gyicy cup za' la der Ñgyoozh. 20Orze' na rlagy ñi gyabic den gyel mbecy ni Ñgyoozh. Mi ze' biñ nu gac gyicy coz ilya' zir gaze' de coz nu rdiñ na lom, nunu coz ily zir ricy mi gaze' de coz nu rnii too den. Gyicy mi ñii nu nac de mod nu ricy mi nañ lardoo den. 21¡Orze' dela mbecy ni Crisht rlagy ñi nu gyabic dey gyel mbecy ni Ñgyoozh nu nac Jesucrisht tub la, nunu dub laa tiem! ¡Laab ni gac ñii!

will be added

X\