Efesios 2

1Anzir de ru na der gal nu na mbecy gut nu nac de cyi gal nu de coz a̱' nap nu ricy der. 2Zaab ricy la der de cyi ze' lat nu bicy der gal nu ricy cyu zi'l mbecy nu yu' gyishlombecy ii, nunu lat nu bicy der coz nu rlagy nuras, yu nu riib ic de yu a̱' nap nu rded lo bi, yu nu rbic baloor ni de mbecy nu wacsuub gyidag ni Ñgyoozh. 3Gaza' de ub na gu' den mod ni de yu ze' tub tiem par ich. Bicy den coz nu rlagy ub zi'l na. “O” mnii den ni de coz cyi nu druu nañ lardoon, nu de coz a̱' nap nu druu nañ shcab ni den. Nde' nu yad ñi nu cuic Ñgyoozh cashtig ily ni den gal nu cuic mi ni de' zir de mbecy. 4Tees Ñgyoozh nac mi tub biñ nu tona' la rashni lagy nunu tona' la rcaa lagy mi de ub na. 5Gulas de ub na na den gal nu na mbecy gut nu nac de cyi nu bicy na. Tees tiem ze' gal nu bicy Ñgyoozh nu byabañ Crisht, ni' zi'l bicy mi nu byabañ de ub na. Nu nac faboor nu ricy nu Ñgyoozh de ub na, nde' nu gruu mbañ den. 6Orze' Ñgyoozh gyicy mi nu gyabañ den tublaazh la nu Crisht, gun orze' gzub dun mi gyibaa. Ni gyicy num der nu nac Jesucrisht. 7Ni bicy mi gun orze' par lo gad lagy den nu tona' la coz ily de faboor nim. Rad lagy na nde' nu nac nu pcam de ub na nu nac Jesucrisht. 8Gun Ñgyoozh bicy mi tub faboor num den nu bloo mbañ mi den nu nac nu ricy cup den consuel lo Crisht. Walab nu ni bicy mi nu nac de coz nu de ub na bicy na, sinu nde' tub coz nu leew la bicy nu Ñgyoozh de ub na. 9Walab nu nac de coz nap nu ricy den, nde' nu gruu mbañ naa. Nde' nu walagy ñi nu gyicy zily mbecy ub yu. 10Gun de ub na nac naa mbecy nu psa' lagy Ñgyoozh. Bicy cub mi den nu nac Jesucrisht, gun orze' gyicy den de coz nap nu bzu yem gulas nu gyicy den. 11Nde' nu bicy der nu gyeza' lagy ru nu gulas a̱' nac der mbecy ni Ñgyoozh. Guc der mbecy nu walab mbecy Israeel nu nac gyitoo bel ni der. De mbecy nu ca beey sircunsision cuerp ni mnii dey nu de ru nac der mbecy nu sac beey sircunsision cuerp ni. Tees coz nu rzat dey, nde' coz nu ricy dey nu cuerp ni ub zi'l yu. 12Orze' bicy der nu gyeza' lagy ru nu tiem ze' a̱' nac der mbecy ni Crisht. A̱' nac der mbecy guledz Israeel. Nunu trat nu bicy Ñgyoozh nu de mbecy Israeel, nde' walab par de ru. Lat nu gu' der gyishlombecy ii, ni wangad lagy der cyu nac mi, nunu ni wancyish lo der nu cui mbañ ru. 13Orze' nde' nu anzir nañ gal nu na nu zet zu der lo Ñgyoozh. Tees na nu nac Jesucrisht, nu nac nu pshu reñ mi, nde' nu byagaab der lo Ñgyoozh. 14Gun Crisht bicy mi nu byanap yu' den nu losa'n. Bicy mi nu de mbecy Israeel, gal nu de mbecy nu walab mbecy Israeel byac se tub nac zi'l den. Ptily mi bzaa nu bzu gazel den. 15Orze' Crisht bicy mi nu bya' lo de coz nu rnii leey ni de mbecy Israeel. Gun lo cyup nac mbecy bicy mi nu byac se tub nac zi'l mbecy cub nu nac ub mi. Ni mod bicy mi par nu chu' gyel ri zu lat de mbecy. 16Nu nac nu gut Crisht lo cruuz, nde' nu bza' lom de gyel cha' ic nu yu' lat rup nac la mbecy. Nunu nu nac nu gut mi lo cruuz, nde' nu lo cyup nac mbecy byac se tub nac zi'l yu, nunu bicy mi nu byanap yu' dey nu Ñgyoozh. 17Orze' Crisht biid num de riidz ni gyel ri zu lo dela mbecy: tant lo de ru nu na der gal nu na mbecy nu zet zu lo Ñgyoozh, gal nu lo de mbecy Israeel nu na gal nu na mbecy nu yu' gaab lom. 18Gun Espiriit Yon nim rbic mi nez nu gya rup nac la den par lo Ñgyoozh nu nac Crisht. 19Nde' nu de ru a̱' naca' der mbecy yad, ni a̱' naca' der mbecy nu walab mbecy guledz, sinu nac der mbecy gyibaa nu de' zir de mbecy ni Ñgyoozh. Bi nac der famil nim. 20De ru na der gal nu na tub yu' nu zub too tub simient. Ze' simient ze', nde' de aposht gal nu de yu nu mnii por cuen ni Ñgyoozh. Nunu Jesucrisht nam gal nu na gyita' ni simient nu ricy zir ñi presis ze'. 21Mi ze' biñ nu nac cyuub dutuub la cuerp ni yu' ze'. Bicy mi nu dela lugaar ni yu' ze' nash ñii losa'ñ. Orze' zaab rzup lañ gashtal gyac lañ tub yu' yon nim. 22Bicy mi nu gaza' de ru nash losa' der par nu gyac der tub yu' nu rcyiiñ Ñgyoozh nu nac Espiriit Yon nim.

will be added

X\