Efesios 1

1Ya̱ Baly, tub yu nu nac aposht ni Jesucrisht, gun nde' coz nu rlagy Ñgyoozh. Ya̱ zeeda̱ gyicy ii lo de ru mbecy ni Ñgyoozh nu yu' gyedz Éfeso, de mbecy nu ricy cup consuel lo Jesucrisht. 2Ñgyoozh, Uz den, nu Shuaan den Jesucrisht gyicy mi faboor nu nap gyicy num de ru, nunu gyicy mi nu cheti ri añ ni der. 3Rlagy ñi nu gyabic den gyel mbecy ni Ñgyoozh, biñ nu nac uz Shuaan den Jesucrisht, gun mi ze' nap ricy num den nu nac Crisht, gun rbic mi de lo la coz gyibaa nu druu lo Espiriit Yon nim ni den. 4Gun nil nese anzir nu gzub gyi' gyishlombecy, Ñgyoozh pcuim de ub na nu cyiiñ dun mi nu nac Crisht, gun orze' par lom gac naa mbecy nu sac falt ni. Nu nac nu rcam de ub na, 5nde' nu bi ca lo cuen nu gyicy i'ñ mi de ub na nu nac Jesucrisht. Ni gyicy mi gun nde' coz nu yet lagy mi nunu coz nu rlagy mi. 6Par nu nac nde', orze' gyabic den gyel mbecy ni Ñgyoozh dub laa tiem, gun tona' la cyit ricy num de ub na. Nde' tub faboor nu leew la ricy num den nu nac I'ñ mi nu dzi rcam. 7Nu nac nu Ñgyoozh tona' la rcam de ub na, nde' nu bicy mi nu pshu reñ I'ñ mi Jesucrisht, gun orze' gla den ni de coz cyi. Orze' bicy sulagy mi de cyi nu bicy den. 8Ñgyoozh rca za' lam de ub na. Briic mi shcab ni den, nunu rlocyuub mi de ub na nu gyet lag na cuen de coz nim. 9Briic mi nu gad lagy den tub coz nu wangad lagy mbecy gulas. Coz ze', nde' riiñ nu bza' lom nu nac Crisht. Nde' riiñ nu bloo ic ub mi. 10Riiñ nu bloo ic mi ze', nde' bza' lom ñii tiem niñ. Nde' nu ricy mi nu riib ic Crisht gaza' dela coz nu psa' lagy mi. Tant de coz gyibaa, gal nu de coz gyishlombecy ii riib ic mi ñii. 11Ñgyoozh nil nese anzir bi pcuim de ub na par nu gyiyeeñ de gyel nap nim yaan nu nac Crisht gal nu bloo ic ub mi, gun nde' coz nu rlagy mi. 12Orze' de̱ ya̱ nac de̱ de mbecy nu brish lo lo Crisht loga. Orze' gyicy de̱ nu gyed gyel mbecy nim nu nac nu dzi lily nam. 13Ni' zi'l de ru, ornu güeñ der de riidz nu rishli, de riidz nap nu rnii lac mod gruu mbañ den, orze' bicy cup der consuel lo Crisht, nunu Ñgyoozh bicy mi nu rabee nu nac der mbecy nim ornu briic mi Espiriit Yon nim ni der, gal nu mniim nu segur la gyicy mi. 14Briic mi Espiriit Yon nim ni den par nu gabe nu segur la gyiyeeñ gyel nap nim yaa den ornu gya' lo nu gruu de ub na, mbecy nim, lo de coz cyi. Orze' rlagy ñi nu gyabic den gyel mbecy nim nu nac nu dzi lily nam. 15Nde' nu, como rad lagya̱ nu ricy cup der consuel lo Shuaan den Jesuuz, nunu como dzi rca der de mbecy ni Ñgyoozh, 16nde' nu wacheca̱ nu drica̱ gras ni Ñgyoozh nu nac de ru, nunu ryeza' lagya̱ der lat nu rne̱e̱ du̱m. 17Ñgyoozh ni Shuaan den Jesucrisht, mi ze' tona' la lily nam. Orze' ya̱ rnishba̱a̱ lom nu gyicy mi nu locyuub Espiriit Yon nim de ru nu gyet lag der cuen de coz nim, nunu shaal mi shcab ni der, gun orze' nap zir chu' lo der mi. 18Rdiña̱ lom nu shaal mi nañ shcab ni der, gun orze' gad lagy der de coz nu rgyish lo der lo. De ru mbecy nu mniim lo nu gac nim. Orze' gad lagy der nu tona' la coz ily gyel nap nim nu zeeñ mi yaa de ru, mbecy nim. 19Nunu gad lagy der nu bded ru' ga' la coz ily gyicy nu Ñgyoozh de ub na, mbecy nu ricy cup consuel lo Crisht. Gun coz ily nu ricy num de ub na, nde' nañ gal nu na coz ily 20nu bicy mi ornu bicy mi nu byabañ Jesucrisht despuees ornu gut mi, nunu nde' nañ gal nu na coz nu bicy mi ornu bzuub mi Jesuuz par yaa beem gyibaa. 21Ñgyoozh bicy mi nu gya zir zum par dela mbecy nu ricy coz ily, par dela mbecy nu riib ic, par dela fushtiz, par dela patro̱o̱. Gya zir zum par dela mbecy nu zu riiñ: tant gyishlombecy ii, gal nu gyishlombecy nu yad par lo. 22Ñgyoozh bicy mi nu riib ic Crisht dela coz, nunu bdu'm riiñ yaam nu chetib ic mi dela mbecy nim. 23Gun de mbecy ni Crisht na dey gal nu na cuerp nim. Nunu nañ lardoo dey rcyiiñ mi, biñ nu zu dela lugaar.

will be added

X\