Colosenses 4

1Na de ru patro̱o̱, bicy der mod nu se'ñ nu de mbecy nu nac moz por fers la ni der. Bicy der nu gyeza' lagy ru nu ni' de ru zu tub patro̱o̱ nir gyibaa. 2Nunu zaab mnii nu laa der Ñgyoozh. Zaab zu laa der altant nu cuic ru gras nim lat nu rnii nu der mi. 3Nunu ni' zi'l bdiiñ der lom par nu nac de̱ ya̱, gun orze' cuic mi mod nu shaal de̱ de riidz ni Crisht, de riidz nu wangad lagy de mbecy gulas. Gun par nu nac de riidz ze' ri̱ pres. 4Orze' bdiiñ der lom, gun cuic mi mod nu naal la ne̱e̱ lo de mbecy gal mod nu rlagy ñi nu gyicya̱. 5Bicy der tub mod nu raso̱o̱ nu de mbecy nu wagyicy cup consuel lo Crisht. Cue' zaan der nu nit lo tiem ornu gad mod nu gyicy der riiñ ni Crisht. 6Dub laa tiem, ornu go der riidz nu de mbecy, orze' mnii der riidz nap, gal nu riidz nu gyet lagy dey. Nunu rlagy ñi nu gad lagy der lac mod tush cyar riidz lo tub ga mbecy. 7Bicy den Tíquico, yu nu dzi rcaan, guc yu tub yu nu bicy paa ornu blocyuub yu de ub na, nunu ricy yu riiñ ni Shuaan den Jesuuz nu ya̱. Yu ze' cyid nuy raso̱o̱ ne̱ lo der. 8Nde' nu ya̱ zuu neza̱ yu cyid yu lo der. Orze' niiy lo der lac yu̱' de̱ par ii. Orze' cuic yu baloor ni der. 9Laab nu Tíquico cyid bicy na Onésimo, yu nu dzi ricy paa. Yu ze' laab losa' de ru. De yu ze' gyooy rishlo der dela coz nu rac par ii. 10Aristarco, losa̱' nu ri̱ nañ yu' gyiib, zeed yu ñgyoozh ni der. Ni' zi'l Marc zeeda'y ñgyoozh ni der. Yu ze' bicy cueñ Bernabee. De ru bi bri tub gyicy lo der nu rzat ñi Marc. Benu cyid güiiy de ru, orze' nap bicy nu der yu. 11Ni' zi'l Jesuuz, yu nu rnii dey Jusht, zeed yu ñgyoozh ni der. Nomaas de yu ii zi'l yu nu yu' lat de mbecy Israeel nu ricy cup consuel lo Crisht nu yu' du̱ ii. De yu ii zi'l ricy du̱ riiñ ni gyel gubier ni Ñgyoozh. De yu ii nac dey tub consuel ily ne̱. 12Epafras ni' zi'l zeed yu ñgyoozh ni der, nunu nac yu tub yu nu ricy riiñ ni Jesucrisht. Yu ze' laab losa' de ru. Dub laa tiem rnishbaay lo Ñgyoozh par nu nac de ru ornu rnii nuy mi, gun orze' gyafert der, nunu gac nap la der, gal nu na mbecy nu gul shcab ni. Gac der mbecy nu wagyicy cyup ic, nunu gyicy der gal nu rlagy mi. 13Ya̱ Baly naca̱ teshtig ni dela coz nu ricy Epafras. Tona' la rzu bich yu nu nac de ru gal nu de mbecy nu yu' Laodicea, gal nu de mbecy nu yu' Hierápolis. 14Luc, yu nu nac doctoor, yu nu dzi rca den, zeed yu ñgyoozh ni der. Ni' zi'l Demas. 15Gab der de bicy na nu yu' Laodicea shnu dey. Gab der Ninfa shnuñ gal nu de mbecy ni Crisht nu ryatublaazh yu'ñ. 16Na ornu lazh lab der lo gyicy ii, orze' gzeed der ñii chañ lat de mbecy ni Crisht nu yu' gyedz Laodicea. Gun orze' ni' zi'l de yu ze' lab dey loñ. Ze' na ni' zi'l de ru laba' der lo gyicy nu gruu gyedz ze'. 17Nii der lo Arquipo ni raso̱o̱ nu zeeda̱ ii: nu ca ic yu nu gyicy yu de riiñ nu bdu' Shuaan den Jesuuz yaay. 18Ya̱ Baly ca̱a̱ de riidz ii nu ya̱a̱ nu letr ne̱ nu zeeda̱ ñgyoozh ni der: Ca ic der nu ya̱ ri̱ nañ yu' gyiib. Ñgyoozh gyicy mi faboor nu nap gyicy num der.

will be added

X\