1 Rlagya̱ nu gad lagy der nu tona' la rloo lo̱ nu ricya̱ riiñ ni de ru, gal nu ni de mbecy Laodicea, nunu ni' zi'l ni de mbecy nu nigul zaca̱ lo nu loo la. 2 Tona' la rloo lo̱ par nu grica̱ baloor ni dela der nañ lardoor, gun orze' dub laa tiem zaab ca zir der losa'r, gun orze' nap gad lagy der de coz rishli. Gun orze' cyiiñ ñi ni der par nu nap gad lagy der de coz rishli. Orze' gad lagy der de coz nu wansaan Ñgyoozh nu ñgyad lagy de mbecy gulas. Coz ze', nde' Crisht. 3 Crisht nam gal nu na tub gyiñ nu yu' choow gyel nap ni Ñgyoozh, gun nu nac mi ze' gad lagy den dela shcab lily ni Ñgyoozh. 4 De nu nii drica̱ nu gad lagy der, gun orze' cue' nu guu ni tub la mbecy de ru nu de riidz nu dzi le' za. 5 Mas ya̱ saca̱ lat der, tees ca ica̱ de ru. Ya̱ yet lagya̱ ornu gud lagya̱ nu yu' der gal mod nu rlagy ñi, nunu yet lagya̱ nu nac nu fert ricy cup der consuel lo Crisht. 6 Orze' como de ru “O” mnii der ni Shuaan den Jesucrisht, nde' nu rlagy ñi nu cyiiñ der gal mod nu rcyiiñ de mbecy nim. 7 Jesucrisht nam gal nu na tub nac yu. Orze' pshet lyu der lo yu ze', nunu zuub der yu'r laab lo yu ze', gun orze' gyafert zir gyicy cup der consuel lom, gun nde' coz nu bdulyuu ni der. Nunu dub laa tiem cuic der gras ni Ñgyoozh. 8 Bzu der cuidad. Cue' zaan der nu guu de mbecy ru nu nac de riidz fals nu rboo ic mbecy zi'l. De riidz ni de mbecy ze' walab lo Crisht bruuñ, sinu de nu nde' coz nu bzeeñ de gyitoo bel ni dey, nunu laab nu nde' riidz ni nuras, yu nu riib ic gyishlombecy ii. 9 Gal mod nu na Ñgyoozh, ni' zi'l na Jesucrisht lat nu gusam gyishlombecy ii. 10 Orze' de ru ricy cup za' la der Ñgyoozh, par nu nac nu nac nu der Crisht. Mi ze' riib ic mi dela mbecy nu riib ic, gal nu de espiriit. 11 Nunu ni' zi'l par nu nac nu nac nu der Crisht, orze' nde' nañ gal nu na nu pca beey sircunsision cuerp ni der. Nde' walab mbecy pcaay beey ze' cuerp ni der, sinu ub la Crisht pcaam beey ze' cuerp ni der. Beey nu pcaa mi ze', nde' yaruuñ nu bi bla der ni de coz cyi nañ lardoor. 12 Gun ornu rzu nis der, orze' nañ gal nu na nu tublaazh la bgach der nu Crisht. Nunu ni' zi'l laab ornu bzu nis der ze', orze' nañ gal nu na nu tublaazh la byabañ nu der mi nu nac nu bicy cup der consuel lo Ñgyoozh, biñ nu bicy nu byabañ Crisht. Mi ze' rac ricy mi coz ily tona' la. 13 Gulas de ru na der gal nu na mbecy gut par Ñgyoozh nu nac de cyi nu bicy der, nunu nu nac nu sac beey sircunsision cuerp ni der. Tees na Ñgyoozh bicy mi nu tublaazh la byabañ der nu Crisht. Ni bicy mi ornu bicy sulagy mi dela cyi nu bicy der. 14 Ñgyoozh mnit lom dela di'ñ na nu ca lo cuen ni den nu za contr nin, nunu mnit lom dela coz nu ca lo cuen nu rish na nu nac di'ñ ze'. Ornu bza' lom de di'ñ ze', orze' nañ gal nu na nu pcaam ñii lo cruuz. 15 Par nu nac Crisht, Ñgyoozh bicy mi gan de nuras nu riib ic. Nde' nañ gal nu na nu bloom gyel mbecy ni dey ornu gua num dey pres nez lo rgüii dela de mbecy. 16 Nde' nu cue' shet ic der nu nii zi de mbecy ni der nu nac de coz nu row der, gal nu de coz nu ro'r. Ni cue' shet ic der nu nii zi mbecy nir nu nac cushtom ni de sa' mi' ni dey, gal nu sa' nu rzu' dey ornu sa rca beey mi', gal nu ni de dzi nu rzu lagy mbecy. 17 Dela de coz ii nañ gal nu na sheñ zi'l de coz nu yad par lo. Ze' Jesucrisht, mi ze' laab tub zi'l mi. 18 Yu' mbecy nu rniiy nu rlagy ñi nu riib zily dey de anc. Nunu rnii dey nu Ñgyoozh bicy mi nu bde' loy. Ricy yu nu nac yu mbecy shni. Ze' rishli nac dey mbecy le' nu nac nu ricy cup dey shcab ni mbecy zi'l. Nunu waca bee la la gyi' ricy le' dey. Cue' shet ic der nu nii de mbecy ze' nu yu' falt ni der nu nac de coz ze'. 19 De yu ze' a̱' nac nu dey Crisht, biñ nu nac too tub cuerp. Nunu mi ze' ricy mi nu raly dutuub la cuerp ze' nu nac nu rgoow mi ñii, nunu rzuub mi tub ga lañ nu lugaar niñ. Orze' raly ñi dub gal mod nu rlagy Ñgyoozh. 20 De ru gut der ornu gut Crisht. Nde' nu na walaba' nuras, yu nu riib ic gyishlombecy ii, riib ic yu de ru. Benu ni, orze' ¿lagu gabee rcyiiñ der gal nu rcyiiñ de mbecy ni gyishlombecy ii? ¿Lagu gabee “O” rnii der ni de leey mi' ze'? 21 Gal nu na de nu nii: Cue' gan ru de coz ze'. Ze' tuuba'ñ: Cue' gow ru de nu nde'. Ze' tuuba'ñ: Cue' gal ru de nu nde'. Ni rnii de leey ze'. 22 Tees de coz nu rzat de leey ze' nac ñii coz nu ded ni, ornu bi bicy nu mbecy ñii riiñ. Nunu de leey ze' guud ñi nu nac shcab ni mbecy zi'l. 23 Rishli de mbecy nu bloo ic de leey mi' ze', rlyu nu siñ too dey, tees walab rishli. De leey ze' ricy ñi tub mod nu dzi ta par nu gyicy de mbecy par lo Ñgyoozh. Rniiñ nu gyicy gyidz mbecy ub yu. Rniiñ nu dzi ta gyicy nuy cuerp niy. Mas ni rnii de leey mi' ze', tees rila wacyiiñ ñi nu soow ñi lo de cyi nu yu' nañ lardoo den.
