Colosenses 1

1Ya̱ Baly naca̱ aposht ni Jesucrisht, gun nde' coz nu rlagy Ñgyoozh. Ya̱ nu biicy na Timoteo tublaazh la zeed de̱ gyicy ii lo der, 2lo de ru mbecy ni Ñgyoozh nu yu' Colosas, lo de ru bicy na nu ricy paa nu de coz ni Crisht. Ñgyoozh Uz den gyicy mi faboor nu nap gyicy num der, nunu gyicy mi nu cheti ri añ ni der. 3Dub laa tiem ornu rne̱e̱ du̱ de̱ Ñgyoozh, Uz Shuaan den Jesucrisht, nu nac de ru, orze' dric de̱ gras nim. 4Gun bi gud lagy de̱ nu fert ricy cup der consuel lo Jesucrisht, nunu dzi rca der dela losa'r nu nac mbecy ni Ñgyoozh. 5Nu nac nu rgyish lo der lo de coz nu bi yu' choow nir gyibaa, nde' nu dzi rca der losa'r. De ru bi bzuub gyidag der de riidz ni de coz nu rgyish lo der lo ze' lat nu güeñ der de riidz nu rishli, de riidz nap nu rnii lac mod gruu mbañ de mbecy. 6Orze' de riidz nu bdunii lo der ze', zaab za lañ dela lugaar ni gyishlombecy, nunu ricy ñi mod nu nap nu de mbecy, laab ni' zi'l gal nu guc lat de ru nese ornu güeñ der nu rnii de mbecy nu nap ricy Ñgyoozh num den nunu gud lagy der nu rishli gal nu mnii dey. 7De nde' coz nu blyuu Epafras ni der, yu nu dzi razañ lagya̱ ze'. Yu ze' yu nu ricy riiñ lat de ru lugaar ne̱ ya̱. Nac yu tub yu nu ricy riiñ ni Jesucrisht lat der, nunu tona' la ricy paay. 8Nunu laab yu ze' mniiy lo̱ de̱ nu Espiriit Yon ni Ñgyoozh bicy mi nu tona' la rca der losa'r, nay. 9Nde' nu nese dzi nu güeñ de̱ de nu nde', orze' zaab rne̱e̱ du̱ la̱ de̱ Ñgyoozh nu nac der, nunu rdiñ de̱ lom nu nap gyet lag der cuen ni de coz nu rlagy mi, nunu rdiñ de̱ lom nu cuic mi de lo la shcab nap nu druu lo Espiriit Yon nim ni der. 10Gun benu ni, orze' gac cyiiñ der gal mod nu rlagy Shuaan den Jesuuz, nunu dub laa tiem gyicy der de coz nu gyet lagy mi. Nunu zañ coz nap gyicy der nu nac mod nu rcyiiñ der. Nunu cugyi' nu nap zir cu' lo der Ñgyoozh. 11Nunu rdiñ de̱ lom nu gyicy fert mi der nu nac nu dzi lily nam ornu ricy mi de coz ily. Orze' de ru nu pase̱z fert la ragyee der mas deet rac. 12Bet lagy der, nunu briic der gras ni Ñgyoozh, Uz den, gun mi ze' bi bzu lily mi de ru nu gyash yaa der ca na coz nu ca lo cuen nu gad ni de mbecy nu nac num lugaar ze' nu yu' yaa nim. 13Gun Ñgyoozh bi bloo nap mi de ub na lugaar ze' nu cow, ze' nu riib ic nuras. Orze' ya num de ub na par lugaar ze' nu riib ic I'ñ mi nu dzi rcam. 14Nu nac I'ñ mi ze' bloo mbañ mi de ub na, nunu bicy sulagy mi dela cyi den. 15Ñgyoozh wac zac nam, tees gal nu na Ñgyoozh ni' zi'l na Crisht, biñ nu gac zac na. Orze' mi ze' I'ñ logam, biñ nu gya zir zu par dela coz nu psa' lagy Ñgyoozh. 16Par nu nac I'ñ mi ze' psa' lagy mi dela coz nu yu' gyibaa, gal nu dela coz nu yu' gyishlombecy ii. Laab nu nac I'ñ mi psa' lagy mi de coz nu gac zac na, gal nu de coz nu wac zac na. Gaza' de anc nu riib ic, gal nu de anc fert, par nu nac mi ze' Ñgyoozh psa' lagy mi dela de yu ze'. Orze' Ñgyoozh psa' lagy mi dela coz nu nac I'ñ mi, nunu psa' lagy mi dela coz par I'ñ mi. 17Crisht nil zum nese anzir nu gruu zac dela coz, nunu par nu nac mi ze', dela coz yu'ñ gal mod nu rlagy ñi. 18Dela mbecy ni Crisht na dey gal nu na tub cuerp. Ze' Crisht nac mi too cuerp ze'. Laab mi ze' zum nese nu loga la. Nunu laab mi byabañ mi nu loga la ornu gut mi, gun orze' gya zir zum par dela coz. 19Gal nu na Ñgyoozh ni' zi'l na Jesucrisht, gun nde' coz nu rlagy mi. 20Gun par nu nac Crisht, Ñgyoozh rlagy mi zu nap mi dela coz nu psa' lagy mi, de coz nu yu' gyishlombecy ii, gal nu de coz nu yu' gyibaa. Gun orze' nap yu' num dela coz par nu nac nu pshu reñ Jesuuz ornu pcam lo cruuz. 21Gulas de ru walab mbecy ni Ñgyoozh nac der, sinu guc der losa' yuum nañ lardoor par nu nac de coz a̱' nap nu bicy der. 22Tees na laab Ñgyoozh bicy mi nu nap yu' nu der mi nu nac mod nu bzac Crisht ornu gut cuerp nim. Ni bicy mi, gun orze' gad mod nu gyecha' der lom. Byac der mbecy nu bi zu chu par nu gac nim. Byac der mbecy cacy, mbecy nu sac falt ni. 23Tees par nu ni ricy Ñgyoozh num de ru, orze' rlagy ñi nu gzu fert der nu nac de coz nu bi ricy cup der consuel lo. Orze' cue' glaa yaa der de coz nu rgyish lo der lo, de coz nu guud ni der ornu güeñ ru de riidz nu sac ni Jesucrisht. De nde' riidz nu rdunii lo de mbecy dutuub la gyishlombecy. Nunu gaza̱' ya̱ Baly rlocyuuba̱ nu rshaala̱ de riidz ze'. 24Na ya̱ yet lagya̱ nu rzac zi̱ nu nac de ru, gun nil bi ca lo cuen nu tona' la gzac zi de mbecy. Na ya̱ rzac zi̱ nu cuerp la ne̱ gal nu bzac zi Crisht, gun orze' gaza̱' locyuuba̱ nu shuub laz ni de nu rzac zi de mbecy ni Crisht. Ya̱ rzac zi̱ nu nac de mbecy ni Crisht, de yu nu bi nac cuerp nim. 25Orze' Ñgyoozh bicy mi nu gyicya̱ riiñ ni dela mbecy nim. Bdu'm riiñ ze' ya̱a̱ nu locyuuba̱ de ru. Ze' riiñ ze', nde' nu rshaala̱ dela riidz nim. 26Ya̱ rshaal nap la̱ de riidz nu rila wangad lagy de mbecy gulas. Tees na Ñgyoozh rbic mi nu gad lagy dela mbecy nim ni de riidz ze'. 27Orze' Ñgyoozh rlagy mi cuic mi nu gad lagy de mbecy tub coz ngach nim nu tona' la coz nap, nunu tona' la cyit. Coz ngach ze', nde' par dela mbecy mas yu nu walab mbecy Israeel. Coz ngach ze', nde' Crisht, biñ nu rcyiiñ nañ lardoo de ru. Orze' nu nac mi ze' segur la gzac der lo de coz cyit na nu gad ni der par lo. 28De̱ ya̱ rzat de̱ Crisht, nunu rshu̱u̱ du̱ de̱ dela mbecy, nunu rlyu̱u̱ ni dey nu de shcab lily nu ricy cup de̱. Orze' gu̱' de̱ de mbecy ni Crisht nu bi gul shcab ni yaa Ñgyoozh. 29Nde' nu ricya̱ riiñ, nunu tona' la rloo lo̱ nu dela fers ne̱. Rac ricya̱ ñii gun Crisht rbic mi fers ne̱.

will be added

X\