Hechos 9

1Laab tiem ze' Saulo gabee mniiy nu cut yu de mbecy nu ricy cup consuel lo Shuaan den. Orze' guay lo mbecy nu riib ic de uz. 2Lo yu ze' blooy tub gyicy ni rishbeey nu cha nuy lo de mbecy nu rza nañ yu' nu rsya' mbecy Israeel riidz ni Ñgyoozh, de yu nu yu' Damasco. Orze' nu gyicy ze' ricy cup yu rishbeey nu gya nuy de yu nu gush nez cub ni Crisht par Jerusaleeng. Tant yu gyeey nunu tant biñ mñaa gya nuy. 3Na nez nu zay, ornu birgaab Damasco, orze' sij la bet tub yaa. Bruuñ gashtal baa bet ñi dub yub la lo Saulo. 4Orze' wes saay lo yu. Orze' güeñ yu nu zaab ti' tub mbecy rniim. Orze' nam rab mi yu: ―Saulo, Saulo, ¿lagu rsheed zir ya̱? ―nam. 5Orze' na Saulo: ―¿Cyu ru Shuaana̱? ―nay. Orze' na ga' biñ nu zaab ti' nu rnii ze'. ―Ya̱ naca̱ Jesuuz, biñ nu ru rsheed zir. 6Weshte. Gu' lat gyedz. Ze' nii mbecy la coz rlagy ñi nu gyicy ru ―nam. 7Orze' de yu nu za nuy wagnii la dey, gun tona' la gudzib dey, gun güeñ dey nu rnii mbecy, tees wansac yu ni tub la mbecy. 8Orze' Saulo weshtey. Na ornu pshaal yu urloy na, orze' wangac zac yu ni tub la coz. Orze' bdu' yaa dey yaay za nu dey yu par Damasco. 9Chon dzi wangac zac yu. Chon dzi nde' rila wangoy gyit, nunu rila wango'y nis. 10Ze' Damasco zu tub mbecy nu ricy cup consuel lo Crisht, yu nu la Ananías. Orze' Shuaan den bruu zac mi loy. Orze' nam rab mi yu: ―¡Ananías! ―nam. Orze' na Ananías: ―Ii zu, Shuaana̱ ―nay. 11Orze' na Shuaan den rab mi yu: ―Wes su. Gua tub cay nu la Cay nu Li. Orze' yu' Judas ze' cugyi'r tub mbecy nu ledz Tarso, yu nu la Saulo. Zuy rnii nuy ya̱. 12Orze' mod ni pcaal bde' tub mbecy nu la Ananías loy. Gal yaay yu gun orze' zac yu tuuba' tir ―nam rab mi Ananías. 13Orze' Ananías nay rab yum: ―Zañ mbecy rniiy coz nu ricy yu ze' lo̱. Zañ coz a̱' nap bicy nuy de mbecy nir nu yu' Jerusaleeng. 14Orze' na briy Damasco nu rishbeey nu bruu lo mbecy nu riib ic de uz par nu gya nuy dela mbecy nu rzat ru pres ―na Ananías. 15Orze' na Shuaan den rab mi yu: ―Gua gun ya̱ bloo su̱ yu nu gyicy yu riiñ ne̱, nunu zat yu ya̱ lo de mbecy. Zat yu ya̱ lo de mbecy nu walab mbecy Israeel. Nunu zat yu ya̱ lo de mbecy nu zu riiñ. Nunu zat yu ya̱ lo de mbecy Israeel. 16Laab ub la̱ lyu̱u̱ loy dela coz nu gzac ziy nu nac ya̱ ―nam. 17Orze' gua Ananías. Gu'y nañ yu' ze'. Gul yaay Saulo. Orze' nay rab yuy: ―Bicya̱ Saulo, Shuaan den Jesuuz, biñ nu bruu zac lor nez nu yad ru, bzuu nez mi ya̱ nu yapa̱ lor, gun orze' zac ru tuuba' tir, nunu gac ru mbecy nu gyub ic za' la Espiriit Yon ni Ñgyoozh nañ lardoo ―nay. 18Orze' lueg la tub coz nu na gal na gyid ich bel bruuñ urlo Saulo bet lag ñi. Orze' brugyi' rzac yu tuuba' tir. Orze' wes suy, nunu bzu nis yu. 19Na ornu bdoy gyit, orze' guud fers niy. Orze' Saulo byeeñ yu la be dzi nu de yu nu ricy cup consuel lo Crisht, de yu nu yu' Damasco. 20Orze' lueg la za Saulo yu' ze' nu rsya' de mbecy Israeel riidz ni Ñgyoozh, nunu brugyi' nu rshaal yu de coz ni Crisht. Orze' nay: ―Mi ze' nac mi i'ñ Ñgyoozh ―nay. 21Dela mbecy nu güeñ ze' tona' la za nu ic dey. Orze' na dey: ―¿A walab yu ii mbecy nu gusa pshet zi de mbecy nu rzat Jesuuz Jerusaleeng? Nunu ¿a walab nu yad yu ii par nu cha nuy dey pres, nunu gu'y dey yaa de yu zub lo ni uz? ―na dey. 22Tees niga niga byanap zir rshaal Saulo de riidz ni Crisht. Tona' la nap blyuuy nu Jesuuz nac mi Mesías, biñ nu ca lo cuen nu co mbañ mbecy. Ni wangaca' la nii de mbecy Israeel nu yu' Damasco nu radzay. 23Ornu bza' la be dzi, byatublaazh de mbecy Israeel, nunu psaap dey riidz nu cut dey Saulo. 24Tees mbecy mnii dey loy de coz nu rlagy dey gyicy nuy yu. Dzi rel la mña dey de ro' nu druu mbecy ru' gyedz, gun rlagy dey cut yuy. 25Orze' de mbecy nu ricy cup consuel lo Crisht bri dey yu nañ tub chicyiw ily. Pshet dey yu par ich lo' ni gyedz ze' rel. Ni mod briib dzey. 26Na ornu Saulo briy Jerusaleeng, bicy peey nu ñgyac nuy de mbecy nu ricy cup consuel lo Crisht, tees wancheña lagy dey nu ricy cup yu consuel lom, nunu rdzib dela dey loy. 27Orze' Bernabee blocyuub yuy. Gua nuy yu lo de aposht. Orze' pshaal yu lo dey nu bzaac Saulo Shuaan den gyernez, nunu mnii num yu. Mniiy nu Saulo wacchib lay bzat yu Crisht lat de mbecy Damasco. 28Orze' Saulo byeeñ nuy dey, nunu gusay dutuub la lat gyedz Jerusaleeng. Wacchib lay rzat yu Crisht lat de mbecy. 29Orze' bee nuy de mbecy Israeel riidz, de yu nu rnii riidz griego. Nunu ptub su losa' dey nu riidz. Tees de mbecy ze' mbicy pee dey nu ñgyut dey yu. 30Tees ornu gud lagy de bicy na, orze' gua nu dey Saulo par Cesarea. Orze' bzuu nez dey yu yay Tarso. 31Orze' dela de mbecy ni Crisht nu yu' lo de yu ni Judea, gal nu lo de yu ni Galilea, gal nu lo de yu ni Samaria, bi yu' gyel ri zu lat dey, nunu byafert zir dey nañ lardooy. Nunu Espiriit Yon ni Ñgyoozh blocyuub mi dey nu byañ zir yu lat nu gusa dey nu pca lagy dey lo Ñgyoozh. 32Ze' Bed gusay lat de mbecy ni Crisht. Guay lat de mbecy ni Crisht nu yu' Lida. 33Ze' bdzeel yu tub mbecy nu la Eneas. Yu ze' tub mbecy chi̱. Bi bza' shuñ ña'n nu wagac gyeshtey. Orze' Bed nay rab yuy: 34―Eneas, Jesucrisht gyicy yac mi ru. Weshte, nunu byash da' nir ―nay. Orze' lueg la weshte Eneas. 35Orze' dela mbecy nu yu' Lida, nunu dela mbecy nu yu' lo de yu ni Sarón byac dey mbecy nu ricy cup consuel lo Shuaan den ornu bzaac dey nu byac yu ze'. 36Na zu tub biñ mñaa nu la Tabita nu ricy cup consuel lo Crisht. Benu nu riidz griego, orze' lam Dorcas. Rcyiiñ mi tub gyedz nu la Jope. Dub laa lat nu bzu biñ mñaa ze' gyishlombecy, bicy mi coz nap. Blocyuub mi de mbecy zi. 37Laab tiem ze' gush güiim gut mi. Orze' blaagy dey mi. Gaze' nu briish dey mi nañ tub yu'. Shily cyup nu zub gya briish dey mi. 38Na Jope gaab ga riñ nu Lida. Orze' ornu güeñ de yu nu ricy cup consuel lo Crisht, de yu nu yu' Jope nu ri Bed Lida, orze' bzuu nez dey cyup mbecy nu cha nuy raso̱o̱ nu gyicy lal Bed chay lo dey. 39Orze' Bed bzu lily yu za nuy dey. Na ornu briy lugaar ze' na, orze' gup nu dey yu nañ yu' cyup shily nu zub gya ze'. Orze' dela de byud bde' dem loy nu ruun dem. Nunu blyuu dem dela yaag, nu dela negy nu bzaa Dorcas ornu bzum gyishlombecy loy. 40Orze' Bed bloo chuy dem par ich yu'. Orze' gusu tib yu mnii nuy Ñgyoozh. Orze' bgüiiy lo biñ mñaa gut ze'. Orze' nay rab yum: ―¡Tabita, weshte! ―nay. Orze' mi ze' mbi bgüiim loy. Ornu bzaac mi Bed, orze' weshtem. Gusub mi. 41Orze' Bed bdu' yaay yaam blocyuub yum. Gaze' nu wes sum. Orze' bredz mbecy de yu nu ricy cup consuel, gal nu de byud. Orze' blyuuy mi lo dey nu mbañ mi. 42Orze' bzu laa riidz ni de coz nu bicy yu dutuub la gyedz Jope. Nunu zañ mbecy bicy cup dey consuel lo Shuaan den. 43Orze' Bed byeeñ yu Jope zañ dzi. Ze' pcyiiñ nuy tub mbecy, tub yu nu rcuugy gyid bañcyug, tub yu nu la Simo̱o̱.

will be added

X\