Hechos 8

1Nunu Saulo bet lagy yu nu biit dey Shteb. Laab dzi ze' de mbecy nu ricy cup consuel lo Crisht Jerusaleeng brugyi' nu tona' la rzac zi dey. Orze' dela dey brush las yu par dela lugaar ni Judea nu dela lugaar ni Samaria. Nomaas de aposht zi'l wancyuu dey Jerusaleeng. 2Tees la be mbecy nu tona' la rca lagy lo Ñgyoozh, de yu ze' pcach dey Shteb, nunu tona' la bicy dey sentiir. 3Tees Saulo mbicy peey nu nit loy dela mbecy nu ricy cup consuel lo Crisht. Gaza' yu' gaza' yu' la rzu'y. Bgayu tuñ lay mñaa gyeey la de yu nu ricy cup consuel lo Crisht par nu cha nuy dey nañ yu' gyiib. 4Na de mbecy nu ricy cup consuel lo Crisht brush las dey zay dela lugaar. Za shaal dey riidz ni Crisht. 5Orze' Lip guay gyedz nu la Samaria. Lo de mbecy ze' pshaal yu riidz ni Crisht. 6De mbecy zigy dzi nap bicy cuen dey de riidz nu mnii Lip. Bzuub gyidag dey riidz nu mniiy, nunu bzaac dey de nusuriidz nu bicy yu. 7Nunu zigy mbecy nu bicy ni nuras byac yu. De nuras tona' la rbish tiy. Orze' bruu chuy lo dey. Zañ mbecy chi̱, gal nu zañ mbecy coj byac yu. 8Nunu de mbecy Samaria tona' la gucyit lagy dey. 9Na laab gyedz ze' rcyiiñ tub mbecy nu la Simo̱o̱. Bi rac tiem rguuy de mbecy Samaria nu fis gyel tu' niy. Mniiy nu tona' la mbecy lily nac yu. 10Dela mbecy nu yu' gyedz ze' dzi nap bicy cuen dey de riidz nu rniiy gush lañ de yu shni gashtal de yu lily. Mnii dey: ―Simo̱o̱ nac yu biñ ni Ñgyoozh nu dzi cyiiñ nu gyicy coz ily ―rnii dey. 11Tona' la bicy cuen de mbecy yu gun dzi gulas rguuy dey nu fis gyel tu' niy. 12Tees ornu bicy cup de mbecy consuel lo de riidz nap ni gyel gubier ni Ñgyoozh nunu de riidz nap ni Jesucrisht, de riidz nu mnii Lip, orze' bzu nis dey. Bzu nis de yu gyeey nunu bzu nisa' de biñ mñaa. 13Ni' Simo̱o̱ bicy cup yu consuel lo Crisht. Ornu bzu nis yu, orze' gua cay ich Lip dela lugaar ze' nu zay, nunu tona' la gua nu ic yu ornu bzaac yu nu ricy Lip nusuriidz, gal nu de' zir de coz ily. 14Na de aposht nu yu' Jerusaleeng güeñ dey nu de mbecy Samaria gush dey de riidz ni Ñgyoozh. Orze' bzuu nez dey Bed nu Waa nu chay lo dey. 15Na ornu bru'ña dey, mnii nu dey Ñgyoozh nu nac de mbecy nu ricy cup consuel lo Crisht. Bdiiñ dey lo Ñgyoozh nu cuic mi Espiriit Yon nim ni dey, 16gun Espiriit Yon ni Ñgyoozh nigul gyicy nim ni tub la dey. Nomaas nu bi bzu nis zi'l dey par nu gabe nu nac yu mbecy ni Crisht. 17Orze' Bed nu Waa gul yaa dey de mbecy ze', nunu Ñgyoozh briic mi Espiriit Yon nim ni dey. 18Na Simo̱o̱ bzaac yu nu Ñgyoozh briic mi Espiriit Yon nim ni de mbecy ornu gul yaa de aposht dey. Orze' mniiy nu cuic yu tiñ ni Bed nu ni Waa. 19Orze' nay: ―Gyicy ru nu gac gyicy ya̱ nde', gun orze' cyu zi'l mbecy nu gal ya̱a̱ Ñgyoozh cuic mi Espiriit Yon nim niy ―nay. 20Orze' na Bed rab yu Simo̱o̱: ―¡Ru nu dela tiñ nir gyar gabily! Gun ru rnii toor nu gac zir coz nu cuic Ñgyoozh. 21Riiñ nu ricy de̱ ya̱ nii rila wac gyicy ru ñii, gun a̱' nap lardoor par lo Ñgyoozh. 22Orze' mne' coz a̱' nap nu rlagy ru gyicy ru ze' nunu bdiiñ lo Ñgyoozh ben a gyicy sulagy mi nir par nu nac coz nu psa' lagy ru nañ lardoor. 23Gun ya̱ rad lagya̱ nu ru dza laa nañ lardoor yu' coz lya nunu coz cyi riib ic ñi ru ―nay. 24Orze' na Simo̱o̱ rab yu Bed nu Waa: ―Bdiiñ lo Ñgyoozh ne̱ nu cue' gzaca̱ de coz nu mniir ze' ―nay. 25Na ornu Bed nu Waa pshaal dey de coz nap nu bicy Jesuuz num dey, nunu mnii dey riidz ni Ñgyoozh, orze' bruu dey Samaria ya dey par Jerusaleeng. Lat nu ya dey, zañ tir pshaal dey de riidz nu sac nu bruu lo Ñgyoozh de gyedz nu yu' lo yu ni Samaria. 26Orze' tub anc ni Ñgyoozh mniiy lo Lip. Orze' nay: ―Bzu lily, nunu gua par yaa been ornu güiin ze' nu driib doo par ze' nu riib nez nu za par Gaza ―nay. Laab nez nu za ze' rded ñi tub lugaar ub zi. 27Orze' Lip bzu lily yu. Orze' zay. Na laab nez nu zay ze' bdzeel yu tub mbecy Etiopía. Yu ze' nac yu mbecy capo̱o̱. Tona' la riiñ ily zuy. Nac yu tesorer ni biñ mñaa nu nac rey ni de mbecy Etiopía. Yu ze' guay Jerusaleeng par nu riib zily yu Ñgyoozh, tees 28bi bish cyay yay par ledz yu. Zub yu nañ caret niy rsya'y libr ni Isaías, tub yu nu mnii por cuen ni Ñgyoozh. 29Orze' na Espiriit Yon ni Ñgyoozh rab mi Lip: ―Becha' lo caret re, nunu cue' gyazet ru looñ ―nam. 30Orze' ornu becha' Lip lo caret ze', orze' güeñ yu nu rlab mbecy ze' riidz ni libr ni Isaías, yu nu mnii por cuen ni Ñgyoozh. Orze' nay rab yu mbecy ze': ―¿A yet lag ru cuen de riidz nu rlab ru? ―nay. 31Orze' na mbecy ze' rab yu Lip: ―¿Lac gyicya̱ gyet laga̱ cuen, ze' sac cyu yu nu shaal lo̱? ―nay. Orze' mniiy lo Lip nu chu'y nañ caret nu gzub nuy yu. 32Na ze' nu rlab yu lo riidz ni Ñgyoozh ze' rniiñ: Mi ze' nam gal na tub shily nu za nu dey lo mbecy par nu cut yu ma. Mi ze' nam gal nu tub shily nu wanii la ma ornu rshi'ñ mbecy gyich ma. Ni tub riidz wanniim. 33Mbecy bicy gyidz dey mi, nunu wangyicy dey gyel fushtiz nuy mi. Ni tub la mbecy wac zat dey nez mi, gun bza' lo dey lo yum, rniiñ. 34Orze' mbecy nu zu riiñ ze' nay rab yu Lip: ―Mnii lo̱ cyu mbecy rzat yu nu mnii por cuen ni Ñgyoozh lat nu pcaay riidz ii. ¿A laab ub yu rzat yu uti reña' mbecy? ―nay. 35Orze' Lip brugyi' rniiy. Gush yu nu loga la ze' nu blab mbecy ze' lo libr ni Isaías. Orze' mniiy dela riidz nap ni Crisht. 36Na lat nu zaab za dey nez, bru'ña dey tub lugaar ze' nu yu' nis. Orze' na yu nu zu riiñ ze' rab yu Lip: ―Ii yu' nis. ¿A wac zu nisa̱? ―nay. 37Orze' na Lip rab yuy: ―Gac zu nis ru, benu ru ricy cup ru consuel lo Crisht nu dutuub la lardoor ―nay. Orze' nay rab yu Lip: ―Ya̱ zeña lagya̱ nu Jesucrisht nac mi I'ñ Ñgyoozh ―nay. 38Orze' yu nu zu riiñ ze' mnii nuy mbecy nu rsaa caret ze' nu chesuy. Na orze' bruuy nañ caret za nuy Lip tublaazh la par lo nis. Orze' Lip briib nis yuy. 39Na ornu bruuy lo nis, orze' Espiriit Yon ni Ñgyoozh byash mi Lip za num yu. Mbecy nu zu riiñ ze' wansaaca'y Lip tuuba' tir, tees lat nu zaab zay nez, tona' la zu cyit lagy yu. 40Na Lip gud lagy yu nu zuy tub gyedz nu la Azoto. Orze' zay gaza' gyedz la pshaal yu de riidz nu sac nu bruu lo Ñgyoozh gashtal bru'ña lay tub gyedz nu la Cesarea.

will be added

X\