Hechos 7

1Yu nu riib ic de uz ni de mbecy Israeel nay rab yu Shteb: ―¿A laab rishli? ―nay. 2Orze' na Shteb rab yu de mbecy zigy: ―De ru bicya̱ gal nu de ru uza̱ bzuub gyidag der ne̱. Ñgyoozh, biñ nu zily zir nac, bruu zac mi lo gyitoo bel nin Abraham, lat nu pcyiiñ yu Mesopotamia, anzir nu chay cyiiñ yu Harán. 3Orze' nam rab mi yu: “Bzeeñ famil nir, nunu bzeeñ ledz ru. Gua lo yu nu ya̱ lyu̱u̱ lor”, nam. 4Orze' bruu Abraham lo de yu ni Caldea. Zay cyiiñ yu Harán. Na ornu gut uz yu, orze' Ñgyoozh bicy mi nu yad yu de lugaar ii cyiiñ yu. Ledz na ii pcyiiñ yu. 5Tees Ñgyoozh wancuic mi ni tub lugaar ganiy. Ni ñuu miiñ yu wancuic mi niy. Tees mniim nu segur la cuic mi de lugaar ii ganiy. Mniim nu segur la nu de lugaar ii gac niy, nunu gac ni de nez yu par lo, mas tiem ze' sac i'ñ yu. 6Nii coz nu mnii Ñgyoozh lo Abraham: “De nez ru rcyiiñ yu tub lugaar nu walab ledz yu. Gac yu moz ni mbecy por fers la. De mbecy lugaar ze' tona' la shiñ gyicy nu dey yu lat tap gaynal na'ñ. 7Tees ya̱ rica̱ cashtig ni de yu nu shiñ gyicy ze'. Gaze' nu gruu de nez ru lugaar ze', nunu ca dey ya̱ ii”, nam. 8Orze' Ñgyoozh bicy mi tub trat nu Abraham, nunu mniim nu rlagy ñi ca beey nu la sircunsision cuerp ni de yu gyeey par nu gabe nu nac nuy trat ze'. Orze' gaze' nu gul Isaac, i'ñ yu. Ornu bza' shuñ dzi nu gul Isaac, orze' pcaay beey sircunsision cuerp niy. Orze' despuees Isaac pcaay beey sircunsision cuerp ni i'ñ yu Jacob. Jacob pcaay beey sircunsision cuerp ni trocyup i'ñ yu: laab lo de yu ze' guch trocyup nac nez de mbecy Israeel. 9’Tees de i'ñ yu bicy saap lagy dey ich bicy yu See. Orze' biit dey yu. Orze' mbecy wii dey yu. Byac yu moz por fers la ni tub mbecy Egipto. Tees Ñgyoozh gusa num yu. 10Nunu Ñgyoozh bloo nap mi yu lat dela gyel deet nu bzac yu. Ornu bru'ñay lo Faraón, yu nu riib ic Egipto, orze' Ñgyoozh bicy mi nu gud lagy Faraón nu nap yu, nunu yu' shcab niy. Orze' Faraón bdu'y riiñ yaay nu gyub ic yu lo dela yu ni Egipto, nunu gyub ic yu nañ yu'y. 11’Na biid cubiñ lo dela de yu ni Egipto nu lo de yu ni Canaán. Tona' la bzac zi mbecy nu nac cubiñ ze'. Wangad coz nu gow de gyitoo bel ni den. 12Ornu Jacob güeñ yu nu yu' trig Egipto, bzuu nez yu de i'ñ yu, de yu nu nac gyitoo bel ni den, nu cha dey ze'. Nde' byaj loga la nu gya dey. 13Byaj cyup See mniiy lo de bicy yu cyu nac yu. Orze' gud lagy Faraón cyu nez nac See. 14Orze' See bzeed yu raso̱o̱ lo uz yu, nunu lo dela famil niy. Mniiy nu cha dey gashtal Egipto. Chon gal ruub gaay dey nac yu. 15Orze' Jacob guay Egipto. Ze' gut yu nu dela too bel ni den. 16Orze' despuees gua nu dey cuerp ni See, gal nu cuerp ni Jacob par Siquem. Pcach dey ñi nañ tub gyeeg ni blyuu nu wii Abraham par la be pezh lo de nez Hamor. 17’Na or bi pshuub dzi nu gyicy yac Ñgyoozh ni de riidz nu mniim lo Abraham, orze' tona' la byañ de nez na Egipto. 18Orze' reña' mbecy gutib ic yu Egipto. Yu ze' wanchu' loy See. 19Bguuy de nez den. Shiñ bicy nuy dey. Pcaay de nez den por fers la nu ne' dey de mdoo gyeey nu sa gul ni dey, gun orze' gat yu. 20Orze' tiem ze' gul Moisees. Tona' la bet lagy Ñgyoozh yu. Nañ chon beey bguul dey yu yu' uz yu. 21Ornu bloo chu dey yu, orze' byash i'ñ Faraón yu. Bicy i'ñ ñiy. Bguul ñiy gal i'ñ lañ. 22Orze' de mbecy blyuu dey ni Moisees dela shcab lily ni de mbecy Egipto. Orze' Moisees byac yu tub mbecy nu tona' la lily na. Coz ily bicy yu, nunu coz ily mniiy. 23’Na ornu Moisees yu'y tub ña'n cyuu, orze' mnii tooy nu cha güiiy la ricy de losa'y, de mbecy Israeel. 24Orze' bzaac yu nu shiñ ricy tub mbecy Egipto nu tub losa'y. Orze' pcay yu. Orze' bicy gal gay nu mbecy Egipto ze'. Orze' biit yuy. 25Psa' lagy yu nu de losa'y ñgyet lag dey cuen nu Ñgyoozh gyicy mi nu laab yu co nap yu de losa'y yaa de mbecy Egipto. Tees wangyet lag dey cuen. 26Na tuuba' dzi bzaac yu nu rucoo tub mbecy Israeel laab nu losa'y. Bicy peey nu ñgyicy yu nu ganap lagy dey lo losa'y. Orze' nay rab yu dey: “¡Bzub gyidag der! De ru bicy ru losa'r. ¿Lagu shiñ ricy nur losa'r?” nay. 27Orze' yu nu shiñ ricy nu losa' ze' bzuub yaay Moisees par cuit yu. Orze' nay rab yuy: “Se cyu la briib riiñ ic ru nu gyub ic ru de̱ ya̱, nunu par nu gri beer ne̱ de̱. 28Ze' na, ¿a cuta'r ya̱ gal nu biit ru mbecy Egipto ze' naag?” nay. 29’Na ornu güeñ Moisees nde' na, orze' bruu chuy Egipto. Orze' gua yat yu. Guay pcyiiñ yu lo de yu nu la Madián. Ze' pchelaay. Orze' gul cyup i'ñ gyeey yu. 30Na ornu bza' cyuu ña'n, orze' bruu zac tub anc loy lat lyush gyi nu rcañ tub yag tub lugaar ub zi gaab ga bicy Sinaí. 31Tona' la za nu ic yu par nu nac coz nu bzaac yu. Orze' byagaab yu lo yag ze' par nu zac nap zir yuñ. Orze' güeñ yu nu rnii Ñgyoozh. 32Orze' nam: “Ya̱ naca̱ Ñgyoozh ni de gyitoo bel nir: Ñgyoozh ni Abraham, Ñgyoozh ni Isaac, Ñgyoozh ni Jacob”, nam. Orze' gush bis yu nu gudzib yu nu nac de coz nu bzaac yu. Orze' wancuica'y baloor nu ngüiiy lo yag ze'. 33Orze' na Ñgyoozh rab mi yu: “Bloo gyid lab ru, gun ze' nu zur ze', ze' lugaar yon. 34Ya̱ rzaca̱ nu dzi rzac zi de mbecy ne̱ Egipto, nunu reña̱ nu rzuub ti' dey. Nde' nu ya̱ bi beta̱ na, par nu gloo mbaña̱ dey. Da, gun ya̱ zuu neza̱ ru gyar par Egipto”, na Ñgyoozh rab mi Moisees. 35’Moisees, bdiily lo de mbecy Israeel loy. Mnii dey: “Se cyu la bicy nu ru gyub ic ru de̱ ya̱, nunu ri beer ne̱ de̱”, mnii dey. Ze' Moisees Ñgyoozh bzuu nez mi yu nu gyub ic yu dey, nunu par nu co nap yu dey. Ni bicy mi nu nac anc nu bruu zac lat yag nu pca gyi ze'. 36Orze' laab Moisees gua nuy de mbecy ornu bruu dey Egipto. Bicy yu nusuriidz, nunu bicy yu coz nu za nu ic mbecy. Bicy yu de nde' Egipto, gal nu ru' nisyudoo ña, gal nu de lugaar ub zi de nez nu gusa dey cyuu ña'n. 37Laab Moisees mniiy gugy yu de mbecy Israeel: “Ñgyoozh gzuu nez mi tub mbecy nu nii por cuen nim gal nu bzuu nez mi ya̱. Mbecy ze' gruuy lat nez de ru”, na Moisees. 38Moisees, yu ze' yu nu gusa lat de mbecy zigy, de mbecy Israeel, lugaar ub zi. Gusa nuy de gyitoo bel ni den, nunu gusa nuy anc, yu nu mnii loy too bicy Sinaí. Laab yu gush yu riidz ni Ñgyoozh, riidz nu rnii lac mod cyiiñ den. Orze' bzeeñ yuñ par de ub na. 39’De gyitoo bel bdiily lo dey loy. Wansuub gyidag dey niy. Bzu chu dey yu, nunu bicy pee dey mbish cya ga'y par Egipto. 40Nde' nu na dey rab yu Aroong: “Bzaa la be ñgyoozh nu cha gam par lo den, gun wagad lagy den la bzac Moisees, yu nu bloo de ub na Egipto”, na dey. 41Gaze' nu bzaa dey tub nab mod nu na tub biser. Orze' biit dey bañcyug. Pshu dey reñ ma looñ. Tona' la bet lagy dey coz nu bzaa dey nu yaay. 42Orze' Ñgyoozh bruum lat dey. Nunu bzaan mi nu gyicy ñgyoozh dey de bel baa. Nde' coz nu bi ca lo libr ni de mbecy nu mnii por cuen ni Ñgyoozh. Orze' rniiñ: Ñgyoozh nam: De ru mbecy Israeel, walab lo ya̱ biit der bañcyug nu pshur reñ lat cyuu ña'n nu gusa der de lugaar ub zi. 43Sinu biit der bañcyug nañ yu' ni ñgyoozh nu la Moloc, tub ñgyoozh nu gusa nu der tiem ze'. Nunu biit der bañcyug lo nab bel baa, tub ñgyoozh ni der nu la Refán. De nde' nab nu bzaa der. Bicy der ñii par ñgyoozh ni der. Orze' ya̱ zuu neza̱ der gal lugaar nu zeta' zir par Babilonia, nam, ni pcaa de mbecy nu mnii por cuen nim. 44’De gyitoo bel ni den bicy cup dey tub yu' negy ze' nu pca dey Ñgyoozh lat nu gusa dey de lugaar ub zi. Yu' ze' byaañ mod nu mnii Ñgyoozh lo Moisees. Mod nu bzaac yu, ni mod bzaa dey ñi. 45Ornu gusa nu dey Josué, orze' za nu dey yu' negy ze' lugaar ze' nu bloo dey yu yaa reña' mbecy, de mbecy nu bloo chu Ñgyoozh. Orze' lo de yu ze' byeeñ yu' negy ze' gal pshuub la tiem ni Dabi. 46Dabi bicy yu mod nu nap bicy nu Ñgyoozh yu. Orze' bdiiñ yu rishbeey lo Ñgyoozh nu zaay tub yu' par ub mi, laab biñ nu briib zily Jacob. 47Tees Salomoong, yu ze' bzaay yu' ze' ni Ñgyoozh. 48Tees mi ze', biñ nu zily zir nac wac cyiiñ mi nañ yu' nu rzaa mbecy. Nde' nu ni mnii de yu nu mnii por cuen nim ornu nay: 49Ñgyoozh nam: “Gyibaa, ze' nañ gal nu na tub yashily nu zuba̱ riib ica̱ dela coz. Ze' gyishlombecy ii nañ gal nu na tub coz nu zub gyi̱'. ¿La na yu' nu zaa der ne̱? ¿Ca zu tub lugaar nu zu lagya̱? 50¿A walab ya̱ bza̱a̱ dela coz ii?” mniim, na de yu nu mnii por cuen nim. 51’¡Dzi ga cyigy too der! ¡Lardoo der nañ gal nu na lardoo tub mbecy nu a̱' yu' lo Ñgyoozh! Na der gal nu na tub mbecy go̱' par lo de riidz ni Ñgyoozh. De ru nar gal na' zi'l de gyitoo bel nir. Dub laa tiem ricy der coz nu za contr ni Espiriit Yon ni Ñgyoozh. 52Sac ni tub mbecy nu mnii por cuen ni Ñgyoozh nu wansheed zi de gyitoo bel ni der. Tees biit dey dela mbecy nu mnii nu cyid biñ Yon, biñ nu ricy yac dela coz nu rnii Ñgyoozh. Orze' na de ru bish cya der ich biñ yon ze', nunu biit der mi. 53Laab de ru mbecy nu byeeñ leey ni Ñgyoozh yaa, leey nu bzeeñ de anc, tees wagyicy yac der niñ ―na Shteb. 54Ornu de mbecy nu yu' junt ze' güeñ dey de riidz nu mnii Shteb, orze' tona' la guzi lagy dey, nunu psiigy lay dey loy. 55Tees Espiriit Yon ni Ñgyoozh briib ic za' lam nañ lardoo Shteb. Orze' bgüiiy par gyibaa, nunu bzaac yu gyel lily ni Ñgyoozh, nunu bzaac yu Jesuuz zum par yaa bee Ñgyoozh. 56Orze' nay: ―¡Güii der! Ya̱ rzaca̱ ryaal baa, nunu biñ nu byac mbecy zum par yaa bee Ñgyoozh ―nay. 57Orze' de mbecy psoow dey gyidag yu, nunu brish ti dey. Orze' bgo la dey too Shteb. 58Orze' bruu nu dey yu lat gyedz. Orze' bgoow gyita' dey yu par nu gat yu. De mbecy nu mnii nu bzaac nu shiñ bicy Shteb ze' bzeeñ dey shab yu nu ña tub yu feñ nu la Saulo. 59Orze' de mbecy fert la yu' dey rgoow gyita'y Shteb lat nu rnii nuy Ñgyoozh. Orze' nay: ―Jesuuz, Shuaana̱, byash espiriit ne̱ ―nay. 60Orze' gusu tib yu. Gaze' nu ye la mniiy. Orze' nay: ―Shuaana̱, cue' cuic ru cashtig ni dey nu nac coz nu ricy yu ―nay. Na ornu mniiy nde', orze' gut lay.

will be added

X\